2 Коринфлилер

4 Шейлеликде, биз өзүмизе эдилен рехимдарлык аркалы шейле гуллуга эе боландыгымыз үчин рухдан дүшмейәрис. 2 Йөне биз хаясыз, гизлин ишлерден йүз өвүрдик ве хилегәрлик этмейәрис. Худайың сөзүни ёйман, гайтам, ондакы хакыкаты аян эдйәрис ве әхли адамларың ынсабы үчин Худайың өңүнде өзүмизи гөрелдели алып барярыс. 3 Аслында, бизиң вагыз эдйән хош хабарымыз перде аркалы гизленги болса-да, ол хеләк болҗак адамлар үчин гизленгидир. 4 Себәби Худайың кешби болан Месихиң шөхратлы хош хабарының нуры олары ягтыландырмаз ялы, шу дүнйәниң* таңрысы имансызларың аң-дүшүнҗесини күтелдендир. 5 Биз вагыз эденимизде, өзүмиз хакда дәл-де, Иса Месихиң Халыпамыздыгы, өзүмизиң болса Исаның хатырасы үчин сизиң гулларыңыздыгы хакда гүррүң берйәрис. 6 Себәби: «Гой, гараңкылыкда нур шөхле сачсын» диен Худай Месих* аркалы өзи хакдакы аҗайып билим билен йүреклеримизи ягтыландырды.

7 Эмма муны өз гүйҗүмиз билен дәл-де, Худайың гүйҗи билен эдйәндигимиз айдың болар ялы, биз ол хазынаны топракдан ясалан гапларда саклаярыс. 8 Биз дүрли кынчылыклар себәпли хер тарапдан гысылярыс, йөне овранмаярыс; биз алҗыраңңы ягдайдадырыс, йөне чыкалгасыз дәлдирис*. 9 Биз ызарланярыс, йөне ташланан дәлдирис; биз хорлук чекйәрис, йөне өлен дәлдирис. 10 Шейле-де Исаның яшайшы бизиң беденимиз аркалы мәлим болар ялы, биз элмыдама Иса ялы өлүм билен йүзбе-йүз болярыс. 11 Биз яшаярыс, йөне Исаның ызына эерйәндигимиз үчин җанымыз элмыдама ховп астындадыр. Шейлеликде, адамлар бизиң Иса ялы хорлук чекйәндигимизи гөрйәрлер. 12 Биз өлүм билен йүзбе-йүз болсак-да, сизиң үчин яшаярыс.

13 «Мен иман этдим, шонуң үчин хем гепледим» дийип язылышы ялы, биз хем шейле имана* эе боландыгымыз үчин геплейәрис. 14 Себәби Исаны өлүмден дирелден Худайың бизи-де дирелтҗекдигини ве сизиң билен билеликде Исаның өңүне гетирҗекдигини билйәрис. 15 Худайың мерхеметини хас көп адамлар алып билер ялы, буларың бары сизиң пейдаңыз үчин эдилйәндир. Себәби Худайың шөхраты аркалы гитдигиче көп адамлар оңа миннетдар болярлар.

16 Шейлеликде, беденимиз солса-да, рухдан дүшмейәрис, гайтам, йүрегимиз ве пикиримиз гүнсайын тәзеленйәр. 17 Себәби вагтлайын ве еңил кынчылыклар бизе хас гымматлы хем-де эбеди шөхрат гетирер. 18 Биз гөрүнйән затлара дәл-де, гөрүнмейән затлара середйәрис. Себәби гөрүнйән затлар вагтлайын, гөрүнмейән затлар болса бакыдыр.