Матта
16 Соңра фарисейлер, саддукейлер гелдилер ве Исаны сынаҗак болуп, гөкден бир аламат гөркезмегини сорадылар. 2 Ол шейле җогап берди: «Гүн яшанда сиз: „Хова говы болар, себәби асманың йүзи гып-гызыл“ диййәрсиңиз. 3 Ирден болса: „Бу гүн хова совук ве ягышлы болар, себәби асманың йүзи гызыл болса-да, булутлы“ диййәрсиңиз. Сиз асмана середип, хованың нәхили болҗакдыгыны айдып билйәрсиңиз, эмма шу гүнки болян вакаларың манысына дүшүнмейәрсиңиз. 4 Залым ве бивепа* несил хемише аламат агтаряр, йөне оңа Юнусың аламатындан башга аламат гөркезилмез». Бу сөзлери айдып, Иса оларың янындан гитди.
5 Соңра шәгиртлер деңзиң бейлеки тарапына гечдилер, йөне чөрек алмагы ятдан чыкарыпдырлар. 6 Иса олара: «Хүшгәр болуң, фарисейлериң ве саддукейлериң хамырмаясындан әгә болуң» дийди. 7 Шәгиртлер өз арасында: «Ол муны бизиң чөрек алмандыгымыз үчин айдян болмалы» дийишдилер. 8 Иса муны билип, шейле дийди: «Эй иманы азлар, сиз нәме үчин өз араңызда чөрек алмандыгыңыз барада гүррүң эдйәрсиңиз? 9 Сиз хенизем дүшүнмедиңизми я-да 5 мүң адамың чөрек ийип дояндан соң, галан чөреклери йыгнаныңызда нәче себет долдурандыгыңызы унутдыңызмы? 10 Я-да еди чөрек билен 4 мүң адамың дояндыгыны ве нәче саны улы себет йыгнандыгыңызы ятдан чыкардыңызмы? 11 Сизе чөрек хакда айтмандыгыма нәме үчин дүшүнмейәрсиңиз? Сиз фарисейлериң ве саддукейлериң хамырмаясындан әгә болуң». 12 Шонда шәгиртлер чөрегиң хамырмаясындан дәл-де, фарисейлериң ве саддукейлериң таглыматындан әгә болмалыдыгына дүшүндилер.
13 Иса Кайсария-Филипә баранда, шәгиртлеринден: «Адамлар Ынсан оглуна ким диййәрлер?» дийип сорады. 14 Олар шейле дийдилер: «Кәбири сува чүмдүрйән Яхя, кәбири болса Ыляс, башгалары Еремия я-да пыгамберлериң биридир диййәрлер». 15 Иса олардан: «Сиз маңа ким диййәрсиңиз?» дийип сорады. 16 Шонда Симун Петрус: «Сен дири Худайың Оглы Месихсиң» дийип җогап берди. 17 Иса оңа шейле дийди: «Эй Юнус оглы Симун, сен багтлысың, чүнки муны саңа ынсан* дәл-де, гөкдәки Атам ачды. 18 Мен саңа диййәрин: сен — Петрус*, мен йыгнагымы шу гаяның үстүнде гурарын ве Габрың* дервезелери оны еңип билмез. 19 Мен саңа гөкдәки Патышалыгың ачарларыны берерин. Сениң ер йүзүнде баглан задың гөкде-де багланар, ер йүзүнде чөзен задың гөкде-де чөзүлер». 20 Соңра Иса шәгиртлерине өзүниң Месихдигини хич киме айтмазлыгы берк табшырды.
21 Иса шол гүнден башлап шәгиртлерине өзүниң Иерусалиме гидип, ехуды ёлбашчыларының, улы руханыларың ве канунчыларың элинден көп эҗир чекмелидигини, соңра өлдүрилип, үчүнҗи гүни дирелдилҗекдигини дүшүндирйәрди. 22 Шонда Петрус оны гыра чекип: «Халыпам, өзүңе хайпың гелсин; бейле зат саңа асла болмасын» дийип гаршы чыкып башлады. 23 Иса аркасына өврүлип, Петруса: «Чекил өңүмден, Шейтан! Сен маңа Худайың ислегини берҗай этмәге пәсгел берйәрсиң*. Себәби сен Худайың дәл-де, адамларың пикир эдиши ялы пикирленйәрсиң» дийди.
24 Соңра Иса шәгиртлерине шейле дийди: «Ким мениң ызыма эермек ислесе, өзүнден гечсин-де, җебир пүрсүни* алып, ызыма дүшсүн. 25 Ким өз җаныны халас этмек ислесе, оны йитирер, ким җаныны мениң угрумда йитирсе, оны халас эдер. 26 Догрудан-да, адам бүтин дүнйәни газанып, йөне җаныны йитирсе, оңа нәме пейдасы бар? Я-да адам өз җанына дерек нәме берип билер? 27 Ынсан оглы Атасындан улы ыгтыяр алып геленде, перишделери билен адамлары хөкүм эдип, эрбет иш эдйәнлери җезалар, ягшы иш эдйәнлери болса сылаглар. 28 Сизе догрусыны айдярын, шу ерде дуранларың кәбири Ынсан оглуның Патышалыгында гелшини гөрмән өлүми асла датмаз».