Матта
17 Алты гүн геченсоң, Иса Петрусы, Якубы ве онуң доганы Яхяны янына алып, бир бейик дага чыкды. 2 Шонда оларың гөзлериниң алнында Исаның даш кешби өзгерди. Онуң йүзи Гүн ялы шөхле сачярды, эгин-эшиги болса гөвхер дашы кимин өвшүн атярды*. 3 Ине, шәгиртлер Исаның Муса хем-де Ыляс билен геплешип дурандыгыны гөрдүлер. 4 Шонда Петрус Иса йүзленип: «Агам, бу ер бизиң үчин дийсең говы. Эгер ислесең, үч чадыр гурайын: бирини саңа, бирини Муса, бирини Ыляса» дийди. 5 Ол хениз гепләп дурка, ине, олары ак булут гуршап алды ве булутдан: «Бу мениң сөйгүли Оглум, мен ондан разыдырын. Оңа гулак асың» диен сес эшидилди. 6 Шәгиртлер бу сеси эшиденлеринде, җуда горкуп, ере йүзин йыкылдылар. 7 Шонда Иса янларына гелип, олара элини дегирди-де: «Туруң, горкмаң» дийди. 8 Олар башыны галдырып середенлеринде, Исадан башга хич кими гөрмедилер. 9 Дагдан дүшүп гелйәркәлер, Иса олара: «Ынсан оглы өлүмден дирелйәнчә, бу гөрен гөрнүшиңиз хакда хич киме айдаймаң» дийип табшырды.
10 Шәгиртлер Иса йүзленип: «Нәме үчин канунчылар илки Ыляс гелмели диййәрлер?» дийип сорадылар. 11 Ол шейле җогап берди: «Догрудан-да, илки Ыляс гелип, әхли затлары дүзетмелиди. 12 Эмма мен сизе диййәрин, Ыляс эййәм гелди, йөне оны танамадылар, гайтам, олар өз халанларыны эдип, оны өлдүрдилер. Эдил шонуң ялы-да Ынсан оглы оларың элинден эҗир чекер». 13 Шонда шәгиртлер Исаның сува чүмдүрйән Яхя барада гүррүң эдйәндигине дүшүндилер.
14 Олар мәрекәниң янына геленлеринде, бир адам гелди-де, дыза чөкүп, Иса шейле дийди: 15 «Мугаллым, оглума рехим эт, ол гарагуш кеселинден эҗир чекйәр, ягдайы гаты агыр. Ол өзүни бир ода, бир сува уряр. 16 Мен оны шәгиртлериңе гөркездим, йөне олар сагалдып билмедилер». 17 Иса шейле җогап берди: «Эй имансыз ве азгын несил, мен хачана ченли сизиң билен болмалы? Сизе хачана ченли чыдамалы? Огланы мениң яныма гетириң». 18 Иса җына кәйәнде, ол огландан чыкып гитди. Оглан шол бада сагалды. 19 Шәгиртлер Иса билен икичәк галанда, ондан: «Биз нәме үчин җыны чыкарып билмедик?» дийип сорадылар. 20 Ол: «Иманыңызың азлыгы үчин. Сизе догрусыны айдярын, эгер сизиң бир горчиса дәнеси* ялы иманыңыз болуп, шу дага „Бу ерден ол ере гөч“ дийсеңиз, ол гөчер. Сизе башартмаҗак зат болмаз» дийди. 21 *——
22 Олар Җелилә геленлеринде, Иса шәгиртлерине шейле дийди: «Ынсан оглы душманларың элине берлер. 23 Олар оны өлдүрерлер, эмма ол үчүнҗи гүни дирелер». Шәгиртлери муны эшидип, өрән гынандылар.
24 Олар Капернаума геленлеринде, салгыт йыгнаян адамлар Петрусдан: «Сениң мугаллымың ики теңңе* салгыт төлемезми?» дийдилер. 25 Ол: «Хава, төләр» дийди. Эмма Петрус өе гиренде, Иса ондан: «Симун, сениң пикириңче, патышалар салгыды я-да гүмрүги кимлерден алярлар? Өз огулларынданмы я-да башга адамлардан?» дийип сорады 26 Ол: «Башга адамлардан» диенде, Иса шейле дийди: «Догры, диймек, огуллар салгытдан азатдыр. 27 Йөне дава турмаз ялы, деңзе бар-да, чеңңеги ташла. Биринҗи тутан балыгың агзыны ачаныңда, дөрт күмүш теңңе тапарсың. Соңра олары алып, өзүң ве мениң үчин салгыт төләп гайт».