Маркус
15 Даң атан бадына, улы руханылар, яшулулар, канунчылар, ягны Меҗлисиң* әхли агзалары маслахатлашдылар. Соңра Исаның эллерини даңып, алып гитдилер-де, Пилатусың элине табшырдылар. 2 Пилатус ондан: «Сен ехудыларың Патышасымы?» дийип сорады. Иса оңа: «Муны сениң өзүң айдярсың» дийип җогап берди. 3 Эмма улы руханылар оны көп затда айыплаярдылар. 4 Шонда Пилатус ене-де: «Сен нәме үчин җогап бермейәрсиң? Саңа гаршы айдылян шунча затлары эшитмейәрмисиң?» дийип сорады. 5 Йөне Иса башга хич зат җогап бермеди. Пилатус муңа гаты гең галды.
6 Пилатус хер йыл Пасха байрамында халкың ислегине гөрә, туссаглыкда отуран бир адамы бошадярды. 7 Шол вагт түрмеде җенаятчыларың арасында Бараббас атлы бири барды. Олар хөкүмдара гаршы гозгалаң турзуп, адам өлдүрипдилер. 8 Мәреке хем гелип, Пилатусдан адат боюнча бир җенаятчыны бошатмагы хайыш эдип башлады. 9 Пилатус олардан: «Сиз ехудыларың Патышасыны бошатмагымы ислейәрсиңизми?» дийип сорады. 10 Аслында, Пилатус улы руханыларың Иса гөриплик эдип туссаг эдендиклерини билйәрди. 11 Эмма улы руханылар Исаның ерине Бараббасы бошатдырмак үчин халкы ырярдылар. 12 Пилатус ене-де халкдан: «Онда мен ехудыларың Патышасы дийилйән адамы нәме эдейин?» дийип сорады. 13 Мәреке ене-де: «Оны пүрсе чүйле!» дийип гыгырды. 14 Эмма Пилатус: «Нәме үчин? Ол нәме яманлык этди?» дийди. Олар болса: «Пүрсе чүйле!» дийип, хас бетер гыгырышдылар. 15 Шонда Пилатус мәрекә яранҗак болуп, Бараббасы азат этди, Исаны болса гамчыладып*, пүрсе чүйлемәге берди.
16 Эсгерлер Исаны ховла, ягны хөкүмдарың көшгүне алып бардылар ве эсгерлериң әхлисини йыгнадылар. 17 Олар Исаның эгнине гырмызы реңкли матаны атдылар ве тикенекден тәч өрүп, келлесине гейдирдилер. 18 Соңра эсгерлер оңа: «Салам, ехудыларың Патышасы!» дийип башладылар. 19 Шейле-де онуң келлесине таяк билен урярдылар, оңа түйкүрйәрдилер, өңүнде дыза чөкүп, баш эгйәрдилер. 20 Үстүнден гүлүп боланларындан соң, эгнине атылан гырмызы матаны айрып, онуң өз эшиклерини гейдирдилер ве пүрсе чүйлемәге алып гитдилер. 21 Олар шәхере гирип гелйән киреналы Симун атлы бир адамы тутуп, Исаның җебир пүрсүни* гөтермеги меҗбур этдилер. Ол Исгендериң ве Руфусың какасыды.
22 Исаны Галгота диен ере гетирдилер. Ол «Келлечанак» диймеги аңладяр. 23 Эсгерлер Иса мирра гарылан шерап* берҗек болдулар, эмма ол ичмеди. 24 Оны пүрсе чүйләп, эшиклерини өзара пайлашмак үчин биҗе атдылар. 25 Ол пүрсе чүйлененде, сагат үчди*. 26 Исаның нәмеде айыпланяндыгыны гөркезмек үчин, олар бир тагта: «Ехудыларың Патышасы» дийип яздылар. 27 Шейле-де Исаның янында ики гаракчыны: бирини саг, бейлекисини чеп тарапында пүрсе чүйледилер. 28 *—— 29 Деңинден гечип барянлар башыны яйкап, оңа сөгйәрдилер. Олар: «Эй, ыбадатхананы йыкып, оны үч гүнде салҗак адам, 30 җебир пүрсүнден* дүш-де, өзүңи халас эт» дийдилер. 31 Шейле-де улы руханылар ве канунчылар онуң үстүнден гүлүп, өз араларында шейле дийишйәрдилер: «Башгалары халас эдип, өзүни халас эдип билмейәр! 32 Гой, Ысрайылың Патышасы Месих җебир пүрсүнден* дүшсүн. Шонда биз муны гөрүп иман эдерис». Хатда онуң янында пүрсе чүйлененлер хем оңа сөгйәрдилер.
33 Бүтин ер йүзүне сагат алтыдан* докуза* ченли гараңкылык аралашды. 34 Сагат докузда Иса батлы сес билен: «Эли, Эли, лама сабахтани?» дийди. Бу сөзлер «Худайым, Худайым, мени нәме үчин ташладың?» диймеги аңладяр. 35 Голайда дуранларың кәбири бу сөзлери эшидип: «Середиң! Ол Ылясы чагыряр» дийишдилер. 36 Оларың бири ылгап барды-да, пагтаны* алып, оны туршы шераба батырды. Соңра таяга беркидип, оны Иса ичмәге узатды-да: «Дуруң бакалы! Ханы, гөрели, Ыляс оны ашак дүшүрмәге гелермикә?!» дийди. 37 Эмма Иса батлы сес билен гыгырды-да, җан берди. 38 Шонда ыбадатхананың мукаддес ериндәки туты ёкардан ашаклыгына йыртылып, икә бөлүнди. 39 Оңа середип дуран гошун ёлбашчысы Исаның нәхили ягдайда җан берендигини гөрүп: «Бу адам, догрудан-да, Худайың Оглы экен» дийди.
40 Бу болян затлара аяллар хем узакдан середип дурдулар. Оларың арасында магдалалы Меръем, кичи* Якуп билен Ёсесиң эҗеси Меръем ве Саломи барды. 41 Олар Иса Җелиледекә ызына дүшүп, оңа хызмат эдйәрдилер. Көпүси болса онуң билен Иерусалиме гелипдилер.
42 Шол гүн Сабат гүнүне тайярлык гөрүлйән гүн болансоң, агшамара 43 Меҗлисиң* хорматланян агзасы ве Худайың Патышалыгының гелмегине гарашян ариматиялы Юсуп гелди. Ол йүрегини бире баглап, Пилатусың янына барды-да, ондан Исаның җеседини бермеги хайыш этди. 44 Йөне Пилатус Исаның эййәм өлендигини эшидип, гең галды ве муны билмек үчин гошун ёлбашчысыны чагырып, ондан сорады. 45 Пилатус Исаның өлендигини аныкландан соңра, онуң җеседини Юсуба берди. 46 Юсуп ёкары хилли зыгыр мата сатын алып, Исаның җеседини пүрсден дүшүрди. Соңра оны шол мата долап, гаяда оюлып ясалан мазарда җайлады ве онуң агзына даш гойды. 47 Эмма магдалалы Меръем билен Ёсесиң эҗеси Меръем оны ниреде җайлаяндыкларына сын эдип отырдылар.