Лука
3 Тиберий Сезарың* хөкүмдарлыгының 15-нҗи йылында Понтиус Пилатус Яхуданың хөкүмдарыды, Хиродес* Җелиләниң хәкимиди*, онуң доганы Филипус Итурея билен Трахонитис юрдуның хәкимиди, Лисан Абиленәниң хәкимиди, 2 Ханна улы руханыды, Каяфа болса баш руханыды. Шол гүнлерде Зекерияның оглы Яхя чөлдекә, оңа Худайың сөзи гелди.
3 Ол Иорданың төверегиндәки әхли ерлере айланып, адамлара гүнәлериниң гечилмеги үчин тоба эдип, сува чүмдүрилмелидигини вагыз эдйәрди. 4 Чүнки Ишая пыгамбериң китабында шейле язылгы: «Чөлде бириниң сеси эшидилйәр: „Ехова* үчин ёл тайярлаң! Онуң ёдаларыны догрулаң. 5 Хер бир җүлге долмалыдыр, хер бир даг ве байырлык дүзленмелидир; эгри ёллар гөнелмелидир, бүдүр-сүдүр ёллар текизленмелидир. 6 Әхли адамлар Худайың берйән гутулышыны гөрерлер“».
7 Яхя сува чүмдүрилмек үчин янына гелйән адамлара шейле диййәрди: «Эй алахөвренлер несли! Сизе етип гелйән хөкүм гүнүнден гачып гутуларсыңыз дийип ким айтды? 8 Тоба эдйәндигиңизи гөркезйән ишлери эдиң. Сиз өзүңизе: „Биз Ыбрайымың несли“ диймегиңизи бес эдиң. Себәби Худай шу дашлардан хем Ыбрайыма несил өндүрип билер. 9 Палта агачларың дүйбүнде эййәм тайын дурандыр. Говы миве бермейән хер бир агач чапылып, ода ташланар».
10 Мәреке Яхядан: «Онда биз нәме этмели?» дийип сорады. 11 Ол хем җогап берип: «Кимиң доны ики болса, доны ёк адама берсин, иймәге зады бар болан адам хем шейле этсин» дийди. 12 Хатда сува чүмдүрилмек үчин гелен салгытчылар хем: «Мугаллым, биз нәме этмели?» дийдилер. 13 Яхя олара: «Салгыды йыгнамалысындан артык талап этмәң» дийди. 14 Эсгерлер хем гелип: «Эйсем, биз нәме этмели?» дийип сорадылар. Ол хем: «Хич киме азар бермәң я-да хич киме төхмет атмаң, гайтам, алян хакыңыза кайыл болуң» дийди.
15 Адамлар Месихиң гелмегине гарашярдылар ве өз ичлеринден Яхя хакда «Ол Месих болаймасын?» дийип пикир эдйәрдилер. 16 Яхя олара шейле җогап берйәрди: «Мен сизи сува чүмдүрйәрин, эмма менден хас ыгтыярлы бири гелйәр. Мен онуң аякгабының багыны-да чөзмәге мынасып дәлдирин. Ол сизи мукаддес рух ве от билен чүмдүрер*. 17 Онуң элинде галла совурян күреги* бар. Ол галланы долы арассалап, бугдайы аммара үйшүрер, саманы болса сөнмез отда якар».
18 Яхя адамлара башга-да шуңа меңзеш көп өвүт-үндевлери берйәрди ве хош хабары ыглан эдйәрди. 19 Шейле-де ол велаят хәкими Хиродеси доганының аялы Хиродияны аландыгы ве башга-да эден эрбет ишлери үчин язгарыпды. 20 Хиродес эден эрбет ишлериниң үстесине Яхяны зындана салды.
21 Адамларың әхлиси сува чүмдүрилйәркә, Иса-да сува чүмдүрилди. Ол дога эдип дурка, гөк ачылып, 22 мукаддес рух кепдери кимин үстүне инди. Шонда гөкден: «Сен мениң сөйгүли Оглумсың, мен сенден разыдырын» диен сес эшидилди.
23 Иса гуллугына башланда, 30 яшларындады. Айтмакларына гөрә, ол
Юсубың оглуды,
Юсуп Элиниң оглуды,
24 Эли Маттатың оглуды,
Маттат Левиниң оглуды,
Леви Мелкиниң оглуды,
Мелки Яннайың оглуды,
Яннай Юсубың оглуды,
25 Юсуп Маттатияның оглуды,
Маттатия Амосың оглуды,
Амос Нахумың оглуды,
Нахум Эслиниң оглуды,
Эсли Наггайың оглуды,
26 Наггай Махатың оглуды,
Махат Маттатияның оглуды,
Маттатия Семегиниң оглуды,
Семегин Ёсехиң оглуды,
Ёсех Ёданың оглуды,
27 Ёда Ёхананың оглуды,
Ёханан Ресавың оглуды,
Ресав Зерубабелиң оглуды,
Зерубабел Шехалтелиң оглуды,
Шехалтел Нериниң оглуды,
28 Нери Мелкиниң оглуды,
Мелки Аддының оглуды,
Адды Косамың оглуды,
Косам Элмадамың оглуды,
Элмадам Эриң оглуды,
29 Эри Исаның оглуды,
Иса Элигезериң оглуды,
Элигезер Ёримиң оглуды,
Ёрим Маттатың оглуды,
Маттат Левиниң оглуды,
30 Леви Симоның оглуды,
Симон Яхуданың оглуды,
Яхуда Юсубың оглуды,
Юсуп Ёнамың оглуды,
Ёнам Элякимиң оглуды,
31 Эляким Мелеваның оглуды,
Мелева Меннаның оглуды,
Меннан Маттатаның оглуды,
Маттата Натаның оглуды,
Натан Давудың оглуды,
32 Давут Ессәниң оглуды,
Ессе Обедиң оглуды,
Обед Бовазың оглуды,
Боваз Салмоның оглуды,
Салмон Нахшоның оглуды,
33 Нахшон Аминадабың оглуды,
Аминадап Рамың оглуды,
Рам Хесроның оглуды,
Хесрон Перезиң оглуды,
Перез Яхуданың оглуды,
34 Яхуда Якубың оглуды,
Якуп Ысхагың оглуды,
Ысхак Ыбрайымың оглуды,
Ыбрайым Терахың оглуды,
Терах Нахорың оглуды,
35 Нахор Серухың оглуды,
Серух Рехувың оглуды,
Рехув Пелегиң оглуды,
Пелег Эбериң оглуды,
Эбер Шелахың оглуды,
36 Шелах Кайнаның оглуды,
Кайнан Арпакшатың оглуды,
Арпакшат Самың оглуды,
Сам Нухуң оглуды,
Нух Лемехиң оглуды,
37 Лемех Метушалахың оглуды,
Метушалах Ханогың оглуды,
Ханок Яретиң оглуды,
Ярет Махалалелиң оглуды,
Махалалел Кайнаның оглуды,
38 Кайнан Эношың оглуды,
Энош Шисиң оглуды,
Шис Адам атаның оглуды,
Адам ата хем Худайың оглуды.