Яхя
9 Иса ёлда барярка, бир догабитди көр адама душды. 2 Шәгиртлери: «Мугаллым, бу адам өзи гүнә эдендиги үчин көр болуп догулдымы я-да ата-энеси гүнә эдендиги үчин?» дийип сорадылар. 3 Иса шейле җогап берди: «Онуң өзи-де, ата-энеси-де гүнә эден дәлдир. Йөне ол аркалы адамлар Худайың этҗек ишлерини гөрүп билерлер. 4 Биз мени Иберениң ишлерини хениз гүндизкә этмелидирис; гиҗе етип гелйәр, шонда хич ким ишләп билмез. 5 Энтек дүнйәдекәм, мен дүнйә үчин ягтылыкдырын». 6 Ол бу сөзлери айдансоң, ере түйкүрди-де, палчык ясады ве оны көр адамың гөзүне чалды. 7 Соңра оңа: «Гит-де, Силоам ховданында (бу сөз «Гүйчли акым» диймеги аңладяр) гөзүңи юв» дийди. Ол хем гитди-де, гөзүни ювды, доланып геленде, гөзи гөрйәрди.
8 Гоңшулары ве өң дилегчилик эдйәндигини билйән адамлар оны гөренде: «Бу шол отурып, дилегчилик эдйән адам дәлми?» дийдилер. 9 Кәбири: «Хава, шол» дийсе, башгалары: «Ёк, ол оңа меңзейәр» диййәрди. Йөне ол адам: «Мен шол» диййәрди. 10 Олар: «Гөзүң нәдип ачылды?» дийип сорадылар. 11 Ол: «Иса диен адам палчык ясап, гөзүме чалды ве „Силоама гит-де, гөзүңи юв“ дийди. Менем гидип, ювдум, шейдип, гөзүм ачылды» дийип җогап берди. 12 Олар: «Ханы ол адам?» дийип сорадылар. Ол хем: «Билмейәрин» дийип җогап берди.
13 Олар гөзи ачылан адамы фарисейлериң янына әкитдилер. 14 Исаның палчык ясап, көр адамың гөзүни ачан гүни Сабат гүнүди*. 15 Шонда фарисейлер ондан гөзүниң нәдип ачыландыгыны сорап башладылар. Гөзи ачылан адам: «Ол гөзүме палчык чалды. Мен хем юванымда, гөрүп башладым» дийди. 16 Фарисейлериң кәбири: «Ол адам Худайдан гелен дәлдир, себәби ол Сабат гүни барадакы табшырыгы берҗай этмейәр» дийдилер. Башгалары болса: «Гүнәкәр адам шейле гудратлары эдип билерми нәме?» дийдилер. Шейлеликде, оларың арасында агзалалык дөреди. 17 Олар ене-де көр адамдан: «Гөзүңи ачан адам хакда сениң өзүң нәме айдарсың?» дийип сорадылар. Ол хем: «Ол пыгамбер» дийип җогап берди.
18 Эмма ехуды дини ёлбашчылары онуң өң көр боландыгына ынанмадылар. Шонуң үчин ата-энесини чагырып: 19 «Бу догабитди көр адам сизиң оглуңызмы? Ол нәдип инди гөрүп билйәр?» дийип сорадылар. 20 Ата-энеси шейле җогап берди: «Биз онуң өз оглумыздыгыны ве көр болуп догландыгыны билйәрис. 21 Йөне гөзлериниң нәдип ачыландыгыны ве оны кимиң ачандыгыны билмейәрис. Оны өзүнден сораң. Ол улы адам ахырын. Гой, өзи җогап берсин». 22 Олар ехуды дини ёлбашчыларындан горкяндыклары үчин шейле җогап бердилер. Себәби ехудылар Исаны Месих хөкмүнде кабул эден адамлары синагогадан ковмалы* дийип, өз араларында ылалашыпдылар. 23 Ине, шонуң үчин хем онуң ата-энеси: «Ол улы адам ахырын, өзүнден сораң» дийипди.
24 Олар көр адамы икинҗи гезек чагырып: «Худайың өңүнде догрыңы айт; биз ол адамың гүнәкәрдигини билйәрис» дийдилер. 25 Ол: «Мен онуң гүнәкәрми я гүнәкәр дәлдигини билмейәрин. Йөне бир зады анык билйәрин: мен өң көрдүм, инди болса гөрйәрин» дийип җогап берди. 26 Шонда олар: «Ол нәме этди? Гөзүңи нәдип ачды?» дийип сорадылар. 27 Ол: «Мен сизе өң айдыпдым ахырын, сиз болса мени диңлемедиңиз. Сиз муны ене-де эшитмек ислейәрмисиңиз? Эйсем, сизем онуң шәгирди боласыңыз гелйәрми?» дийди. 28 Шонда олар оңа сөгүп, шейле дийдилер: «Сениң өзүң онуң шәгирди, биз велин Мусаның шәгиртлери. 29 Биз Худайың Муса билен геплешендигини билйәрис, йөне ол адамың кимден ыгтыяр аландыгыны билмейәрис». 30 Ол хем шейле җогап берди: «Онуң кимден ыгтыяр аландыгыны билмейәндигиңизе менем гең галярын, ол болса мениң гөзүми ачды. 31 Биз Худайың гүнәкәрлериң догасыны эшитмейәндигини билйәрис, йөне ким Худайдан горкуп, онуң ислегини берҗай этсе, ол шейле адамы диңлейәр. 32 Биз шу чака ченли кимдир бириниң догабитди көр адамың гөзүни ачандыгыны эшитмәндик. 33 Эгер ол адам Худайдан гелмедик болса, хич зат эдип билмезди». 34 Шонда олар: «Сен бүтинлей гүнәде доглуп-да, бизе зат өвретҗек болярмың?» дийдилер-де, оны ковуп гойбердилер!
35 Иса онуң ковландыгыны эшидип, оны тапды-да: «Сен Ынсан оглуна иман эдйәрмиң?» дийди. 36 Ол: «Агам, менем оңа иман эдер ялы, онуң кимдигини айтсана?» дийди. 37 Иса: «Сен оны гөрүпдиң, аслында, ол хәзир сениң билен геплешип дур» дийди. 38 Ол хем: «Халыпам, мен оңа иман эдйәрин» дийди-де, оңа тагзым этди. 39 Шонда Иса: «Мен гөрмейәнлер гөрер ялы, гөрйәнлер болса көр болар ялы, дүнйәни хөкүм этмәге гелдим» дийди. 40 Исаның янындакы фарисейлер муны эшидип: «Сен бизи-де көрдүр өйдйәрмиң?» дийдилер. 41 Иса олара: «Сиз көр болан болсадыңыз, гүнәли болмаздыңыз. Йөне сиз „Биз гөрйәрис“ диййәрсиңиз. Шонуң үчин хем гүнәңиз өтүлмез» дийди.