Яхя
2 Үчүнҗи гүн дийленде, Җелиләниң Кана шәхеринде ника тойы болды. Исаның эҗеси хем шол ердеди. 2 Тоя Иса ве онуң шәгиртлери-де чагырылыпды.
3 Шерап гутаранда, Исаның эҗеси оңа: «Буларың шерабы ёк» дийди. 4 Эмма Иса эҗесине: «Эй хатын, мунуң бизе нәме дахыллы ери бар?* Хениз мениң вагтым гелип етмеди» дийди. 5 Шонда Исаның эҗеси хызматкәрлере: «Ол сизе нәме дийсе, шоны-да эдиң» дийди. 6 Ол ерде ехудыларың тәмизленме дүзгүнине гөрә алты саны дашдан ясалан сув гуюлян гаплар барды. Оларың херсине такмынан 44 я-да 66 литр* сув сыгярды. 7 Иса олара: «Гаплары сувдан долдурың» дийди. Олар хем гаплары агзына ченли долдурдылар. 8 Соңра Иса олара: «Ондан бираз алың-да, тоюң гурамачысына элтип бериң» дийди. Олар айдылышы ялы-да этдилер. 9 Тоюң гурамачысы шераба өврүлен сувдан дадып гөрди. (Хызматкәрлер сувуң ниреден алнандыгыны билйәрди, йөне ол билмейәрди). Соңра ол өйленйән йигиди янына чагырып: 10 «Хер кес өңүрти говы шерабы берйәр, хили пес шерабы болса адамлар серхош боландан соңра берйәр. Сен болса говы шерабы шу вагта ченли саклап гоюпсың» дийди. 11 Шейдип, Иса Җелиләниң Кана шәхеринде илкинҗи гудратыны гөркезди. Шонда ол өз гүйҗүни аян этди ве шәгиртлери оңа иман эдип башладылар.
12 Шондан соң Иса эҗеси, доганлары ве шәгиртлери билен Капернаума гитди, йөне ол ерде узак вагт галмадылар.
13 Ехудыларың Пасха байрамы голайлапды, Иса хем Иерусалиме гитди. 14 Ол ыбадатханада өкүздир сыгыр, гоюн ве кепдери сатянлары хем-де пул чалышянлары гөрди. 15 Шонда Иса йүпден гамчы ясап, гоюнлары, өкүздир сыгырлары сатыҗылары билен билеликде ыбадатханадан ковуп чыкарды. Пул чалышянларың теңңелерини ере зыңып, столларыны агдарды. 16 Иса кепдери сатянлара: «Бу затлары шу ерден айрың! Атамың өйүни базара өвүрмегиңизи бес эдиң!» дийди. 17 Шонда шәгиртлериң Язгылардакы: «Сениң өйүңе болан ыхласым мени иер» диен сөзлер ядына дүшди.
18 Шонда ехудылар оңа: «Сен муны этмәге хаклыдыгыңы хайсы аламат билен гөркезип билерсиң?» дийип сорадылар. 19 Иса олара: «Шу ыбадатхананы юмруң, мен оны үч гүнде дикелдерин» дийип җогап берди. 20 Ехудылар оңа: «Ыбадатхананы 46 йыллап гурдулар, сен оны үч гүнде дикелтҗек болярмың?» дийдилер. 21 Эмма ол ыбадатхана диенде, өз беденини гөз өңүнде тутупды. 22 Иса өлүмден диреленде, шу сөзлер шәгиртлериниң ядына дүшди. Шонда олар Язгылара ве Исаның сөзлерине ынандылар.
23 Исаның Иерусалимде Пасха байрамында гөркезен гудратларыны гөрен адамларың көпүси онуң адына иман эдип башладылар. 24 Эмма Иса олара долы ынанмаярды, себәби ол хеммелери говы билйәрди. 25 Ол адамларың йүреклерини билйәндиги үчин, кимдир бириниң шаятлыгына мәтәч дәлди.