Яхя
15 Мен хакыкы үзүм агаҗыдырын, Атам болса багбандыр. 2 Ол мендәки миве бермейән хер бир шаханы кесип ташлаяндыр, миве берйән хер бир шаханы болса, хас көп миве берер ялы арассалаяндыр. 3 Сиз мениң айдан сөзлерим аркалы эййәм арассаланансыңыз. 4 Мениң билен бирликде галың, шонда мен хем сизиң билен бирликде галарын. Үзүм агаҗында галмадык шаханың өз-өзүнден миве гетирип билмейши ялы, сиз хем мениң билен бирликде галмасаңыз, миве гетирип билмерсиңиз. 5 Мен үзүм агаҗыдырын; сиз болса онуң шахаларысыңыз. Ким мениң билен бирликде галса, мен хем онуң билен бирликде галярын, ол көп миве гетирер; себәби сиз менден айры хич зат эдип билмерсиңиз. 6 Мениң билен бирликде галмадык адам шаха ялы кесилер ве гурар. Адамлар шейле шахалары йыгнап, якмак үчин ода ташлаяндырлар. 7 Эгер сиз мениң билен бирликде болсаңыз, айдян затларым йүрегиңизде галар. Ислән задыңызы сорасаңыз-да, сизе берлер. 8 Сиз көп миве гетирип, мениң шәгирдимдигиңизи субут этсеңиз, Атам шөхратланар. 9 Атамың мени сөйши ялы, мен хем сизи сөййәрин; сиз хем мениң сөйгимде галың. 10 Табшырыкларымы берҗай этсеңиз, мениң сөйгимде галарсыңыз, себәби мен хем Атамың табшырыкларыны берҗай эдип, онуң сөйгүсинде галярын.
11 Мен булары сизе мендәки шатлык сизде-де болар ялы ве сиз долы шатланып билер ялы айтдым. 12 Сизе берйән табшырыгым шудур: мениң сизи сөйшүм ялы, сиз хем бир-бириңизи сөйүң. 13 Өз достлары үчин җаныны гурбан эдйән адамың сөйгүсинден улы сөйги ёкдур. 14 Табшырыкларымы берҗай этсеңиз, сиз мениң достларым боларсыңыз. 15 Инди мен сизе гул диймейәрин, себәби гул хоҗайының эдйән ишлерини билйән дәлдир. Эмма мен сизе достларым диййәрин, себәби мен Атамдан эшиден бар затларымы сизе айдандырын. 16 Сиз мени дәл-де, мен сизи сайладым. Көп миве гетирип, гетирен мивәңиз хем галар ялы, сизи белледим. Мениң адым билен Атамдан нәме сорасаңыз, ол сизе берер.
17 Мен сизе булары бир-бириңизи сөймегиңиз үчин табшырярын. 18 Дүнйә сизи йигренйән болса, онда онуң илки мени йигренендигини билиң. 19 Эгер сиз шу дүнйәниң адамлары ялы болан болсадыңыз, онда дүнйә сизи өзүниңкилери кимин сөерди. Йөне мен сизи дүнйәниң ичинден сайлап алдым ве сиз инди дүнйәдәки адамлар ялы дәлсиңиз. Ине, шонуң үчин хем дүнйәниң адамлары сизи йигренйәр. 20 Мениң шу сөзлерими ядыңызда саклаң: гул өз хоҗайынындан улы дәлдир. Олар мени ызарлан болсалар, сизи-де ызарларлар; мениң сөзүми берҗай эден болсалар, сизиңкини-де берҗай эдерлер. 21 Эмма олар сизе гаршы эдйән әхли затларыны мениң адым зерарлы эдерлер, себәби олар мени Иберени танамаярлар. 22 Эгер мен гелип, олара айтмадык болсам, онда олар гүнәкәр болмаздылар. Йөне инди олар гүнәсини аклап билмезлер. 23 Мени йигренйән адам Атамы-да йигренйәндир. 24 Эгер мен оларың арасында хич кимиң эдип билмейән ишлерини этмедик болсам, онда олар гүнәкәр болмаздылар; олар мениң эдйән ишлерими гөрселер-де, мени-де, Атамы-да йигренйәрлер. 25 Эмма булар Мусаның канунындакы: «Олар мени себәпсиз ере йигрендилер» диен сөзлериң берҗай болмагы үчин болды. 26 Мен сизе Атамдан көмекчи, ягны мукаддес рухы иберенимде, ол мен хакда шаятлык эдер, сизе хакыкатың нәмедигини өвредер. 27 Сизем өз гезегиңизде, мен хакда шаятлык эдерсиңиз, себәби сиз илкибашдан мениң билен биледиңиз.