Яхя
16 Мен бу затлары сизиң ялңышмазлыгыңыз үчин айдярын. 2 Адамлар сизи синагогадан коварлар*. Догрудан-да, шейле вагт етип гелйәр, сизи өлдүрйән хер киши Худая мукаддес гуллугы берҗай эдйәндирин өйдер. 3 Эмма олар не Атаны, не-де мени танаяндырлар. Шонуң үчин хем шейле затлары эдерлер. 4 Хер нәме-де болса, булар берҗай боланда, айдан сөзлерими ядыңыза салмагыңыз үчин айдярын.
Булары сизе башда айтмандым, себәби мен сизиң яныңыздадым. 5 Эмма хәзир мен өзүми Иберениң янына барярын; хич хайсыңыз менден „Сен нирә барярсың?“ дийип сорамарсыңыз. 6 Йөне мен сизе бу затлары айдандыгым үчин, йүрегиңизде хасрат чекерсиңиз. 7 Эмма сизе хакыкаты айдярын, мениң гитмегим сизиң үчин пейдалы болар. Эгер гитмесем, сизе көмек этҗек мукаддес рух яныңыза гелмез; йөне гитсем, оны сизе иберерин. 8 Ол геленде, сизе гүнәниң, догрулыгың ве Худайың хөкүминиң нәмедигини ачык гөркезер. 9 Илки билен, гүнәниң нәмедигини аян эдер, себәби дүнйәдәки адамлар маңа иман этмедилер. 10 Соңра догрулыгың нәмедигини гөркезер, себәби мен Атамың янына барярын ве сиз мени гайдып гөрмерсиңиз. 11 Ахырында болса Худайың хөкүмини аян эдер, себәби Ол шу дүнйәниң хөкүмдарына эййәм хөкүм чыкарандыр.
12 Сизе айтҗак көп затларым бар, йөне хәзир олары кабул эдип билмерсиңиз. 13 Эмма хакыкаты ачҗак мукаддес рухы аланыңызда, ол сизе гөркезме берип, хакыката долы дүшүнмәге көмек эдер. Йөне ол сизе өз-өзүнден дәл-де, Худайың ачмак ислейән задыны өвредер ве болҗак затлары ыглан эдер. 14 Ол мени шөхратландырар, себәби сизе менден эшиден затларыны ыглан эдер. 15 Атам билйән затларының әхлисини маңа айдандыр. Ине, шонуң үчин хем мен сизе ол менден эшиден затларыны ыглан эдер дийдим. 16 Ене бираз вагтдан сиз мени гөрмерсиңиз, йөне бираз вагтдан соң ене-де гөрерсиңиз».
17 Шонда шәгиртлериң кәбири бир-бирлерине: «„Ене бираз вагтдан сиз мени гөрмерсиңиз, йөне бираз вагтдан соң ене-де гөрерсиңиз, себәби мен Атамың янына барярын“ дийип, нәмәни гөз өңүнде тутярка?» дийишдилер. 18 Олар: «„Ене аз вагт“ дийип, нәмәни гөз өңүнде тутярка? Биз онуң нәме хакда гүррүң эдйәндигини билмейәрис» диййәрдилер. 19 Иса оларың ондан бир зат сораҗак боляндыкларыны билип, шейле дийди: «Сиз муны бир-бириңизден „Ене бираз вагтдан сиз мени гөрмерсиңиз, йөне бираз вагтдан соң ене-де гөрерсиңиз“ диеним үчин сораярсыңызмы? 20 Сизе догрусыны айдярын, сиз аглап ах чекерсиңиз, дүнйә болса шатланар; сиз гам-гусса батарсыңыз, йөне гам-гуссаңыз шатлыга өврүлер. 21 Аялың чага догурмалы вагты геленде, ол хасрат чекйәндир. Йөне оны догранда, чекен мушакгатыны инди ятлаян дәлдир, себәби ол бир адамы дүнйә индиренине бегенйәндир. 22 Сиз хем хәзир хасрат чекйәрсиңиз; йөне мен сизи ене-де гөрерин, шонда йүрегиңиз шатлыкдан долар ве хич ким оны сизден алып билмез. 23 Шол гүн сиз менден хич зат сорамарсыңыз. Сизе догрусыны айдярын, мениң адым билен Атамдан нәме сорасаңыз, ол сизе берер. 24 Сиз шу вагта ченли мениң адым билен бирҗе зат хем сорамандыңыз. Сораң, сизе берлер, шонда сиз долы шатланарсыңыз.
25 Мен бу затлары сизе мысаллар билен айтдым. Йөне вагт гелйәр, шонда мен сизе мысаллар билен айтмарын, гайтам, Атам хакда ачык айдарын. 26 Шол гүн сиз Атамдан мениң адым билен хайыш эдерсиңиз; йөне бу мениң сизиң үчин хайыш этҗекдигими гөркезмейәр. 27 Атам сизи сөййәндир, себәби сиз мени сөййәрсиңиз ве мениң Атамың векили хөкмүнде гелендигиме иман этдиңиз. 28 Мен дүнйә Атамың векили хөкмүнде гелдим. Инди болса дүнйәни терк эдип, Атамың янына барярын».
29 Шәгиртлер: «Ине, инди сен ачык айдярсың ве мысаллары уланмаярсың. 30 Инди биз сениң әхли зады билйәндигиңе гөз етирдик ве хич бир адамың саңа сораг бермеги хөкман дәлдир, себәби сен онуң нәме пикир эдйәндигини өзүң хем билйәрсиң. Ине, шонуң үчин хем биз сениң Худайдан гелендигиңе ынанярыс» дийдилер. 31 Иса олара шейле дийди: «Сиз муңа инди ынанярсыңызмы? 32 Ине, вагт гелйәр, эййәм гелендир, хер бириңиз өйли-өйүңизе дагарсыңыз ве мени еке галдырарсыңыз. Йөне мен еке дәлдирин, Атам мениң билендир. 33 Мен булары мендәки парахатлык сизде-де болсун дийип айтдым. Дүнйәде мушакгат чекерсиңиз, эмма мерт болуң! Мен дүнйәни еңендирин».