1 Коринфлилер

13 Эгер мен ынсанларың ве перишделериң дилинде гепләп, йөне сөйгим болмаса, онда җыңңырдаян җаң* я-да сесленйән кимвал* ялыдырын. 2 Пыгамберлик этмек укыбым болуп, Худайың әхли сырларына ве хемме билимлере дүшүнйән болсам, хатда даглары еринден гозгаҗак иманым болуп-да, сөйгим болмаса, онда мен хич затдырын*. 3 Гарыплары нахарламак үчин хемме задымы сатсам, өвүнҗек болуп, җанымы гурбан этсем, йөне сөйгим болмаса, мунуң маңа хич хили пейдасы болмаз.

4 Сөйги сабырлыдыр*, мәхирлидир. Сөйги гөриплик эдйән дәлдир. Өвүнйән дәлдир, текепбирлик эдйән дәлдир. 5 Өзүни гелшиксиз* алып барян дәлдир, өз пейдасыны гөзлейән дәлдир, чалт гахарланян дәлдир. Ялңышлыклары хасаба алян дәлдир*. 6 Нәхак ише шатланман, хакыката бегенйәндир. 7 Әхли зада чыдаяндыр, әхли зада иман эдйәндир, әхли зада умыт баглаяндыр, әхли зада дөз гелйәндир.

8 Сөйги эбеди довам эдер*. Эмма пыгамберлик этмек укыбы бар болса, ол гечип гидер; дүрли диллерде геплемек укыбы бар болса, олар бес эдилер; билим бар болса, ол ёк болар. 9 Себәби бизиң аз-кем билимимиз бар ве аз-кем пыгамберлик эдйәрис. 10 Эмма долы билим аланымызда ве долы пыгамберлик эденимизде, аз-кем дийилйән дүшүнҗе болмаз. 11 Мен чагакам, чага ялы геплейәрдим, чага ялы пикирленйәрдим, чага ялы ойланярдым; йөне улаланымда, өзүми чага ялы алып бармагымы бес этдим. 12 Хәзир биз булашык гөркезйән айна середйән ялыдырыс, йөне гелеҗекде әхли зады айдың гөрерис. Хәзир мен Худай барада аз-кем билйәрин, йөне онуң мени долы танайшы ялы, мен-де соңра оны долы танарын. 13 Эмма хәзир шу үчүси галяндыр: иман, умыт, сөйги; оларың иң улусы болса сөйгүдир.