Колослылар
4 Хоҗайынлар, гулларыңыз билен өзүңизи догручыл ве адалатлы алып барың, себәби сизиң хем гөкде Хоҗайыныңыз бардыр.
2 Эрҗеллик билен дога эдиң, дога этмеклиге совук-сала гарамаң ве миннетдар болуң. 3 Худай өз сөзүни, ягны Месих хакдакы мукаддес сыры вагыз этмәге ёл ачар ялы, бизиң үчин хем дога эдиң. Себәби мен бу иш үчин туссаглыкда отырын. 4 Шонда мен оны этмелиси ялы вагыз эдип билерин.
5 Месихчилер йыгнагына дегишли болмадык адамлар билен мундан бейләк-де өзүңизи пайхаслы алып барың. Вагтыңызы пейдалы уланың*. 6 Дузуң нахары тагамлы эдиши ялы, сизиң хем сөзлериңиз якымлы болсун. Шонда сиз хер киме нәдип җогап бермелидигини билерсиңиз.
7 Сөйгүли доганым ве Халыпамызың вепалы гуллукчысы хем гулы болан Тихик сизе мен хакда әхли тәзеликлери гүррүң берер. 8 Бизиң ягдайымыз хакда билип, йүреклериңиз теселли тапар ялы, мен оны сизиң яныңыза иберйәрин. 9 Онуң яны билен илдешиңиз, вепалы ве сөйгүли доганым Онесими хем иберйәрин. Олар сизе бу ерде болуп гечйән затлары гүррүң берерлер.
10 Мениң билен туссаглыкда отуран Аристархус ве Барнабасың егени Маркус (эгер ол барса, оны говы гаршыламалыдыгы сизе өң айдылыпды) дагылар сизе салам айдяр. 11 Шу сүннетленен ехудыларың арасында Юстус дийилйән Иса хем сизе салам айдяр. Худайың Патышалыгыны вагыз этмекде мениң билен ишлешен доганлар диңе шулардыр; олар маңа җуда көп теселли бердилер*. 12 Сизиң илдешиңиз ве Месих Исаның гулы болан Эпафрас сизе салам айдяр. Сиз берк болуп, Худайың ислеги билен эдилйән әхли затлара долы ынамлы болмагыңыз үчин, ол элмыдама сиз хакда ыхлас билен дога эдйәр. 13 Мен онуң сизиң, Лаодикиядакыларың ве Иераполисдәкилериң угрунда көп тагалла эдйәндигине гүвә гечйәрин.
14 Сөйгүли ве лукман доганымыз Лука хем-де Димас сизе салам айдярлар. 15 Лаодикиядакы доганлара ве уямыз Нимфа хем-де онуң өйүндәки йыгнага мениң адымдан салам айдың. 16 Бу хаты окап боланыңыздан соң, онуң Лаодикиядакы йыгнакда хем окалмагының аладасыны эдиң. Сиз хем мениң Лаодикия иберен хатымы окаң. 17 Архипуса болса: «Үнсли болуп, Халыпамызың шәгирди хөкмүнде алан гуллугыңы догры берҗай эт» дийиң.
18 Ине, мен Павлус, өз элим билен сизе салам язярын. Мениң туссаглыкда отуранымы унутмаң. Худайың мерхемети сизиң билен болсун.