Колослылар
3 Эгер Худай сизи Месих билен бирликде дирелден болса, онда гөкдәки затлары агтарың. Месих ол ерде Худайың сагында отурандыр. 2 Пикириңизи ердәки дәл-де, гөкдәки затлара гөнүкдириң. 3 Себәби сиз өлүпдиңиз, яшайшыңыз хем Худайың ислегине гөрә Месихде гизленендир. 4 Бизи яшайша гетирен Месих аян боланда, сиз хем онуң шөхратыны пайлашмак үчин аян боларсыңыз.
5 Шол себәпли беден агзаларыңыздакы* ахлаксызлыгы*, хапалыгы, эрк эдип болмаян ахлаксыз ислеглери, эрбет хөвеслери ве бутпаразлык болан ачгөзлүги өлдүриң. 6 Себәби шу затлары эдйән адамлара Худайың газабы инер. 7 Сиз хем өң шейле ишлери эдип яшаярдыңыз. 8 Йөне инди гахар-газап, эрбетлик, хапа сөзлер сизден узакда болсун; агзыңыздан гелшиксиз сөзлер чыкмасын. 9 Бири-бириңизе ялан сөзлемәң. Өңки хәсиетлериңизи* ишлери билен бирликде эгниңизден чыкарып, 10 Худайың өз кешбине гөрә ярадан тәзе хәсиетлерине гейниң. Бу хәсиетлер Худай хакдакы догры билим аркалы тәзеленйәндир. 11 Шу бабатда грек билен ехудының, сүннетленен ве сүннетленмедик адамың, гелмишегиң, скифиң*, гулуң я-да азат адамың арасында тапавут ёкдур; йөне әхли зат ве хеммелер Месихде җемленендир.
12 Шонуң ялы-да Худайың сайлан мукаддеслери ве сөенлери хөкмүнде дуйгудашлыгы*, мәхрибанлыгы, песгөвүнлилиги, юмшаклыгы ве сабырлылыгы гейиң. 13 Эгер бириниң башга биринден өйкелемәге себәби болса-да, сабырлы болуп, бир-бириңизи йүрекден багышлаң. Ехованың* сизи йүрекден багышлайшы ялы, сиз хем бири-бириңизи йүрекден багышламалысыңыз. 14 Булардан башга-да сөйги хәсиетине гейниң, себәби ол адамлары долы агзыбир эдйәндир.
15 Гой, йүреклериңизде Месихиң парахатлыгы хөкүм сүрсүн, себәби Худай сизи бир беден болмагыңыз ве парахатлыкда яшамагыңыз үчин чагырандыр. Шейле-де миннетдар болуң. 16 Гой, Месихиң сөзлери йүреклериңизе орнашып, бүтин акылдарлыгы билен сизи долдурсын. Мезмурлар, Худая айдылян алкышлар, миннетдардыгыңызы гөркезйән рухы айдымлар ве йүреклериңизде Ехова* нагма айдып, бири-бириңизе тәлим бериң хем-де рухландырың*. 17 Сөзде ве иш йүзүнде нәме этсеңиз-де, оны Халыпамыз Исаның ады билен эдиң, ол аркалы Ата Худайымыза миннетдар болуң.
18 Аяллар, әриңизе табын болуң, себәби бу Халыпамызың шәгиртлерине ярашяндыр. 19 Әрлер, аялыңызы элмыдама сөйүң ве олар билен өзүңизи гөдек алып бармаң. 20 Чагалар, сиз хем ата-энеңизе хемише гулак асың, себәби бу Халыпамыза яраяндыр. 21 Аталар, чагаларыңыз гөвнүчөкгүнлиге дүшмез ялы, оларың гахарыны гетирмәң*. 22 Гуллар, ер йүзүндәки* хоҗайынларыңыза хемише гулак асың. Адамлара яранҗак болян ялы, диңе олар гөрүп дурка дәл-де, эйсем, Еховадан* горкуп, ак йүрекден гулак асың. 23 Нәме этсеңиз-де, адамлар үчин дәл-де, Ехова* үчин йүрекден* эдиң. 24 Себәби сиз Еховадан* сылаг хөкмүнде мирас аларсыңыз. Хоҗайыныңыз болан Месихе гул ялы хызмат эдиң. 25 Догрудан-да, хер кес эден нәдогры иши үчин хакыны алар. Чүнки Худай адамлары ала тутман хөкүм эдйәндир.