Колослылар
1 Худайың ислеги билен Месих Исаның ресулы болан мен Павлус, доганымыз Тимотеос билен 2 Колосдакы мукаддеслере ве Месихиң шәгирди болан вепалы доганлара хат язярын:
Ата Худайымыздан сизе мерхемет хем парахатлык болсун.
3 Биз сиз хакда дога эденимизде, Халыпамыз Иса Месихиң Атасы болан Худая элмыдама миннетдарлык айдярыс. 4 Себәби биз сизиң Месих Иса болан иманыңыз ве әхли мукаддеслере болан сөйгиңиз хакда эшитдик. 5 Хава, сиз гөкде өзүңиз үчин тайярланан зада умыт эдйәрсиңиз. Сиз бу умыды хош хабарың хакыкат сөзлери аркалы эшидипдиңиз. 6 Сизе барып етен бу хош хабар миве берип, бүтин дүнйә яйраяр. Сиз хош хабары эшиден гүнүңизден бәри, ол сизиң хем араңызда шейле нетиҗе берйәр, себәби сиз шонда Худайың хакыкы мерхеметине долы гөз етирипдиңиз. 7 Сиз хош хабары сөйгүли доганымыз Эпафрас аркалы эшидипдиңиз. Ол бизиң үчин Месихиң вепалы гуллукчысыдыр. 8 Ол сизиң Худайың гүйҗи аркалы* сөйги билдирйәндигиңизи бизе хабар берди.
9 Ине, шонуң үчин хем биз бу хабары эшиден гүнүмизден бәри сизиң үчин ызыны үзмән дога эдйәрис ве Худайың ниети хакдакы догры билимден хем-де бүтин акылдарлыкдан долы болуп, рухы затлара чуңңур дүшүнмегиңизи дилейәрис. 10 Шейле-де Ехованың* адына мынасып яшамагыңыз ве хер бир оңат ишлери эдип, миве бермегиңиз хем-де Худай хакда догры билимде өсмегиңиз үчин дога эдйәрис. 11 Шонда сиз онуң бейик гүйҗи аркалы беркәрсиңиз ве сабырлы болуп, шатлык билен әхли зада дөз гелип билерсиңиз, себәби ол шөхратлы куввата эедир. 12 Шонуң үчин ягтылыкда гезйән мукаддеслер билен билеликде мирасы пайлашмага мүмкинчилик берен Атамыза миннетдар болуң.
13 Ол бизи гараңкылыгың голы астындан халас эдип, сөйгүли Оглуның патышалыгына гечирди. 14 Биз онуң төлеги аркалы гулчулыкдан азат болдук, гүнәлеримиз хем багышланды. 15 Ол гөрүнмез Худайың кешби ве әхли ярадылан затларың илкинҗисидир. 16 Себәби әхли затлар, ягны гөкде я ерде болсун, гөрүнйән ве гөрүнмейән затлар, тагтлардыр баштутанлыклар, хөкүметлердир ыгтыярлыклар ол аркалы ярадылды. Хава, әхли зат ол аркалы ве онуң үчин ярадыландыр. 17 Ол әхли затдан өң ярадылды, галан затлар болса ол аркалы дөрәндир. 18 Ол бедениң, ягны йыгнагың башыдыр. Әхли задың башы болар ялы, ол әхли задың башлангыҗы болды ве илкинҗи болуп өлүмден дирелди. 19 Себәби Худай онуң әхли зада эе болмагыны иследи. 20 Худай ерде я гөкде болсун, Оглы аркалы әхли затлары өзи билен ярашдырды. Хава, Худай муны Оглуның җебир пүрсүнде* дөкүлен ганы аркалы амала ашырды.
21 Догрудан-да, сиз өң Худайдан дашлашан адамлардыңыз ве эрбет затлар хакында пикир эдйәндигиңиз үчин онуң душманыдыңыз. 22 Хәзир болса ол сизи Оглуның ынсан беденинде өлмеги аркалы өзи билен ярашдырды. Худай муны сизиң мукаддес, чирксиз ве айыпсыз болмагыңыз үчин этди. 23 Йөне сиз иман этмегиңизи довам эдиң ве оңа гайым япышың, берк дуруң. Эшиден хош хабарыңыз аркалы өзүңизе берлен умытдан дашлашмаң. Бу хош хабар гөк астындакы әхли адамлара вагыз эдилди. Мен Павлус, хош хабары вагыз этмек үчин онуң гуллукчысы болдум.
24 Мен сизиң хатыраңыза гөрги гөрйәндигиме бегенйәрин. Мен Месихиң бедениниң агзасы хөкмүнде ене-де эҗир чекмелидигиме дүшүнйәрин. Шейле гөрги Месихиң бедени болан йыгнага пейда гетирер. 25 Мен Худайдан алан җогапкәрчилигиме гөрә йыгнагың гуллукчысы болдум, Худайың сөзүни сизиң пейдаңыз үчин долы вагыз этдим. 26 Бу мукаддес сыр гечен дөвүрлерден ве шол дөвүрде яшан адамлардан гизлин сакланыпды. Эмма хәзир ол Худайың мукаддес гуллукчыларына аян болды. 27 Галыберсе-де, Худай мукаддеслере аян эден мукаддес сырының шөхратлы байлыгыны башга халкларың арасында-да аян этмек иследи. Бу сыр Месихиң сизиң билен бирликде болуп, онуң шөхратыны пайлашмага болан умыдыңызы аңладяндыр. 28 Биз хеммелериң Месих билен бирликде болмагы үчин ол хакда вагыз эдйәрис, хеммелери үндейәрис ве бүтин акылдарлык билен хер кесе тәлим берйәрис. 29 Шонуң үчин хем мен ичимде херекет эдйән Худайың гүйҗи аркалы җан эдип зәхмет чекйәрин.