Колослылар

2 Сизиң шуңа дүшүнмегиңизи ислейәрин: мен сизиң, Лаодикиядакыларың ве мени гөрмедиклериң* әхлиси үчин айгытлы гөреш алып барярын. 2 Муны оларың йүреклерине теселли бермек ве агзыбир болуп, бир-бирини сөймеклери үчин эдйәрин. Шонда олар долы дүшүнҗели болуп, әхли берекетлериң ве Худайың мукаддес сырының, ягны Месих хакдакы догры билимиң эеси боларлар. 3 Себәби акылдарлыгың ве билимиң әхли хазынасы Месихде пугта гизленендир. 4 Мен муны хич ким сизи ынандырыҗы делиллери билен алдаймасын дийип айдярын. 5 Мен яныңызда болмасам-да, йүрегим сизиң билендир. Сизиң әхли зады тертипли ерине етирйәндигиңизи ве Месихе болан иманыңызың беркдигини гөрүп бегенйәрин.

6 Сиз Месих Исаны кабул этдиңиз, шонуң үчин хем оңа табын болуп яшамагыңызы довам эдиң. 7 Өзүңизе өвредилиши ялы, Месихде берк дуруң ве иманда тутанъерли болуң. Худая миннетдарлык айданыңызда, иманыңыз долуп дашсын.

8 Сересап болуң, хич ким сизи Месихиң таглыматларына эсасланмадык бош затлар, ягны дүнйәниң дүшүнҗелеридир акылдарлыгы* ве ынсан адатлары билен алдап, есир* эдәймесин. 9 Себәби Худайың хәсиетлери Месихде җемленендир. 10 Галыберсе-де, сиз әхли хөкүметлериң ве ыгтыярлыкларың башы болан Месих аркалы хемме зада эесиңиз. 11 Месихиң шәгиртлери хөкмүнде сиз гүнәли беден аркалы ынсан эллери билен дәл-де, ол аркалы сүннетлендиңиз. Себәби Месихиң гуллукчылары шейдип сүннетленмелидир. 12 Худай сизи Месих билен өлүме чүмдүрип, онуң билен җайлады. Сиз оны дирелден Худайың гудратлы ишлерине иман эдип, Месихиң шәгиртлери хөкмүнде өлүмден дирелдиңиз.

13 Сиз этмишлериңиз зерарлы өли ве сүннетленмедик болсаңыз-да, Худай Месих билен бирликде сизе-де яшайыш берди. Худай рехимдарлыгы билен сизиң бар этмишлериңизи багышлады. 14 Ол бизиң гүнәлидигимизи гөркезйән эл билен язылан Кануны айрып, оны җебир пүрсүне* чүйлемек билен ёк этди. 15 Худай хөкүметлериң ве ыгтыярлыкларың үстүнден еңиш газанды хем-де оларың еңлендиклерини хеммелере гөркезмек үчин җебир пүрси* аркалы олары өз еңиш ёлундан йөредип алып гитди.

16 Гой, иййән ве ичйән затларыңыз я-да байрамчылык, тәзе айы*, я-да Сабат гүнүни* беллемейәндигиңиз үчин хич ким сизи язгармасын. 17 Оларың бары гелҗекки затларың көлегеси, эмма көлегәни эмеле гетирйән беден Месихдир. 18 Гой, хич ким сизи алҗак сылагыңыздан махрум этмесин. Себәби олар ясама песгөвүнли болмакдан ве гөрйән затларына «берк эерип»*, перишделере сежде этмекден леззет алярлар. Аслында, олар бикәмил адамың пикирине эерип, ерликсиз буйсанярлар. 19 Шейле адамлар бүтин бедени үпҗүн эдйән, онуң агзаларыны өзара сазлашыклы багланышдырып, богунларыны бирикдирйән ве Худайың ислеги билен өсйән Баша боюн болмаярлар.

20 Эгер сиз дүнйәниң дүшүнҗелерини инкәр эдип, Месих билен биле өлен болсаңыз, онда нәме үчин хенизем дүнйәде яшаян ялы, 21 «Муны алма, оны датма, муңа элиңи дегирме» диен кадалара эерйәрсиңиз? 22 Буларың бары ынсан табшырыкларына ве таглыматларына гөрә ийип-ичиленден соң ёк болян затлар ахырын. 23 Олар акылдар ялы болуп гөрүнйәрлер, өз ислеги боюнча сежде эдип, ясама песгөвүнлилик гөркезйәрлер. Беденини хорласалар-да, оларың тен ислеглерине гаршы алып барян гөреши бидерекдир.