1 Селаниклилер

3 Ине, шонуң үчин хем биз сизи җуда күйсәп, Афиныда галмагы макул билдик. 2 Яныңыза болса Месих хакдакы хош хабары вагыз эдйән Худайың гуллукчысы* болан доганымыз Тимотеосы иберйәрис. Ол сизе теселли берип, иманыңызы беркидер. 3 Шонда кынчылыклар себәпли хич кимиң иманы говшамаз*. Себәби шейле ызарламалардан гача дуруп билмеҗекдигимизи өзүңиз хем билйәнсиңиз. 4 Биз сизиң яныңыздакак, шейле кынчылыклара душ гелҗекдигимизи өңүнден айдыпдык. Билшиңизе гөрә, айдышымыз ялы-да болды. 5 Шол себәпли мундан артык чыдап билмән, иманыңыз хакда билмек үчин яныңыза Тимотеосы иберипдим. Себәби мен сизиң Иблисиң* сынагына дүшүп, чекен зәхметимизиң бидерек болмагындан горкдум.

6 Ине, яңы-якында Тимотеос яныңыздан гелип, сизиң иманда берк дурандыгыңызы, сөйгиңизи ве бизи элмыдама мәхир билен ятлаяндыгыңызы хабар берди. Шейле-де ол сизиң хем бизи күйсейәндигиңизи айтды. 7 Шонуң үчин хем, доганлар, җуда мәтәчлик чекип, энчеме кынчылыклара душ гелйәндигимизе гарамаздан, сизиң вепалыдыгыңыз хакда эшидип теселли тапдык. 8 Сиз Халыпамызың шәгиртлери хөкмүнде берк дурандыгыңыз үчин, биз өрән рухландык*. 9 Биз сизиң иманда берк дурандыгыңызы эшидип, җуда бегенйәрис ве Худая миннетдарлык айдярыс. 10 Сизиң дидарыңызы гөрүп, иманыңызы беркитмек үчин герекли көмеги берип билер ялы, гиҗе-гүндиз Худая йүрекден ялбарярыс.

11 Яныңыза барып билмегимиз үчин, гой, Ата Худайымыз ве Халыпамыз Иса бизе ёл ачсын. 12 Галыберсе-де, бизиң сизи сөйшүмиз ялы, сизиң хем бир-бириңизе ве хеммелере болан сөйгиңизиң артмагына, гой, Халыпамыз ярдам этсин. 13 Шонда йүреклериңиз берк болуп, Ата Худайымызың өңүнде ве Халыпамыз Иса геленде*, әхли мукаддеслер билен бирликде айыпсыз хем мукаддес боларсыңыз.