1 Селаниклилер
2 Доганлар, сизиң яныңыза бармагымызың нетиҗесиз болмандыгыны өзүңиз хем билйәнсиңиз. 2 Билшиңиз ялы, биз башда Филипиде гөрги гөрүп, азап барыны чекен болсак-да, энчеме гаршылыклара гарамаздан*, Худайың көмеги билен сизе хош хабары батыргай вагыз этдик. 3 Себәби сизе өвүт-үндев беренимизде, оны нәдогры пикир, эрбет ниет я-да алдав билен берен дәлдирис. 4 Худай бизи хош хабары вагыз этмәге мынасып гөрди. Шол себәпли биз адамлары дәл-де, йүреклери барлаян Худайы разы этмек үчин вагыз эдйәрис.
5 Билшиңиз ялы, биз сизе хич хачан яранҗаңлык этмедик я-да ачгөзлүк билен бир зат эдип, соңра оны гизлеҗек болмадык; муңа Худай хем шаятдыр! 6 Биз Месихиң ресуллары хөкмүнде сизе аграм салып билердик. Йөне биз адамларың, сизиң я-да башгаларың өңүнде шөхрат газанҗак болмадык. 7 Гайтам, сизиң билен өзүмизи мәхирли алып барып, чагасы хакда сөйги билен алада эдйән ве оны эмдирйән эне ялы болдук. 8 Хава, биз сизи җуда сөййәрис. Сизе диңе бир Худайың хош хабарыны вагыз этмән, эйсем, көмек этмек үчин җанымызы бермәге-де тайындык.
9 Доганлар, бизиң агыр зәхмет чекип, көп тагаллалар эдендигимиз сизиң ядыңыздадыр. Сизе Худайың хош хабарыны вагыз эденимизде, хич бириңизе аграм салмаҗак болуп, гиҗе-гүндиз зәхмет чекипдик. 10 Сизе көмек этмек үчин өзүмизи вепалы, догручыл ве арасса алып барандыгымыза сиз хем, Худай хем шаятдыр. 11 Атаның өз чагаларына эдиши ялы, биз хем сизиң хер бириңизе ызыны үзмән өвүт-үндев ве теселли берендигимизи хем-де рухландырандыгымызы говы билйәнсиңиз. 12 Шонуң үчин мундан бейләк-де Патышалыгына ве шөхратына чагыран Худая мынасып яшаң.
13 Ине, шол себәпли сизиң үчин Худая элмыдама миннетдарлык айдярыс. Себәби сиз Худайың сөзүни эшиден гүнүңизден бәри, оны ынсан сөзи дәл-де, Худайың сөзи хөкмүнде кабул этдиңиз. Ол, хакыкатдан-да, Худайың сөзи болуп, сизе гүйчли тәсир эдйәндир. 14 Доганлар, сиз Худайың Яхудадакы месихчилер йыгнагының гөрелдесине эердиңиз. Себәби Яхудадакы доганларың ехудыларың элинден эҗир чекиши ялы, сиз хем илдешлериңиз тарапындан гөрги гөрйәрсиңиз. 15 Олар хатда Халыпамыз Исаны ве пыгамберлери өлдүрдилер, бизи хем ызарладылар. Үстесине-де, олар Худайың гөвнүнден турмаярлар, әхли адамлара пейдалы болҗак зада гаршы гидйәрлер. 16 Олар башга халкларың халас болмагы үчин айдян хабарымыза пәсгел берип, этмишлериниң үстүни долдурярлар. Ахырсоңы, олара Худайың газабы инер.
17 Доганлар, биз аз вагтлык сизден айра дүшен болсак-да, йүрегимиз сизиң биленди. Аслында, биз сизи* җуда гөресимиз гелйәрди ве яныңыза бармак үчин көп тагалла эдипдик. 18 Ине, шонуң үчин хем яныңыза бармак ислейәрдик. Мен Павлус, бир гезек дәл, хатда ики гезек яныңыза барҗак болдум; йөне Шейтан ёлумыза бөвет болды. 19 Эйсем, Халыпамыз Иса геленде*, онуң өңүнде умыдымыз, шатлыгымыз я-да буйсанч тәҗимиз сиз дәлми нәме? 20 Хава, бизиң буйсанҗымыз ве шатлыгымыз сизсиңиз.