1 Тимотеос

3 Шу сөзлер догрудыр: эгер бири гөзегчи болмак ислейән болса, онда ол говы зады арзув эдйәндир. 2 Гөзегчи башгалар тарапындан айыпланмаян, бир аялың әри, өзүне* эрк эдйән, сагдын дүшүнҗели, салыкатлы, мыхмансөер, өвретмәге укыплы болмалы. 3 Ол аракхор ве залым* болмалы дәл, гайтам, пайхаслы*, урушмаян, харам газанч этмейән, 4 өй-ичериси барада говы алада эдйән*, чагалары хем гулак асян ве өзүни говы алып барян болмалы. 5 Эгер өз өй-ичериси барада говы алада эдип* билмейән болса, онда ол Худайың йыгнагының аладасыны нәдип этсин? 6 Гөзегчи яңы-якында месихчи болан адам болмасын. Ёгсам, ол улумсы болуп, Иблисе чыкарылан хөкүме сезевар болар. 7 Шейле-де адамларың* арасында абрайы болмалы, шонда оңа хич ким дил етирмез* ве Иблисиң дузагына дүшмез.

8 Йыгнагың хызматчылары хем ыхласлы болмалы. Олар икийүзли*, көп шерап ичйән*, харам газанҗың ышкына дүшен ачгөз болмалы дәл. 9 Иманың* мукаддес сырыны пәк ынсап билен саклаян болмалы.

10 Йөне олар башда сыналсын*; эгер олар хич ким тарапындан язгарылмаса, хызматчы болуп билерлер.

11 Аяллар хем ыхласлы*, төхмет атмаян, өзүне* эрк эдйән ве әхли затда Худая вепалы болмалы.

12 Хызматчы бир аялың әри, чагалары ве өй-ичериси барада говы алада эдип билйән болмалы. 13 Себәби говы хызматчы ягшы эдим-гылымы билен абрай газаняр ве Месих Иса иман эдйәндигини батыргайлык* билен гүррүң берйәр.

14 Мен тизден яныңыза бармагы умыт эдйән болсам-да, шу затлары язярын. 15 Себәби эгленсем, сиз Худайың машгаласының агзасы хөкмүнде, ягны хакыкатың диреги хем даянҗы болан Худайың йыгнагында өзүңизи нәхили алып бармалыдыгыны билерсиңиз. 16 Догрудан-да, Худая вепалы болмагың мукаддес сыры өрән улудыр: «Иса ынсан беденинде аян болды, тәзеден рух болуп, догры хасапланды, перишделериң янына гитди, ол хакда башга халклара вагыз эдилди, оңа дүнйәдәки адамлар иман этди, ол шөхрат билен гөге галды».