1 Тимотеос

5 Улы яшлы адам билен өзүңи гөдек алып барма. Оны какаң ялы, өзүңден кичи доганлары болса иниң ялы үнде. 2 Улы яшлы аяллара эҗең ялы, яш уялара болса җигиң ялы гарап, пәк йүрекден хормат гой.

3 Көмеге мәтәч дул аяллара* хормат гоюп, оларың аладасыны эт. 4 Эмма дул аялың чагалары я-да агтыклары бар болса, олар илки өз машгаласының аладасыны эдип, Худая вепалы болсунлар, ягны какасының хем эҗесиниң ве баба-мамасының өңүндәки борчларыны берҗай этсинлер, себәби муны Худай халаяндыр. 5 Көмеге мәтәч ве еке галан дул аяллар Худая бил баглап, гиҗе-гүндиз оңа дога эдйәрлер хем-де ялбарярлар. 6 Эмма тен хөвеслерине гөрә яшаянлар дири болса-да өлүдирлер. 7 Шонуң үчин олар кәйинҗе галмаз ялы, шу табшырыклара эермеклерини үндәп дур. 8 Себәби доган-гарындашларының, эсасан-да, өз машгала агзаларының аладасыны этмейән адам имандан дәнендир, ол Худая иман этмейән адамдан хем бетердир.

9 Хасаба алынян дул аялың яшы 60-дан ашак болмасын ве ол әрине вепалы* болан, 10 чагаларыны говы тербиелемек, мыхмансөер болмак, оңат ишлери ыхлас билен ерине етирмек, мукаддеслериң аякларыны ювмак*, кынчылык чекенлере көмек этмек ялы ягшы ишлери эдип, абрай газанан аял болмалы.

11 Эмма яш дул аялларың атларыны хасаба алма, себәби олар дурмуша чыкасы гелип, өзлерине янёлдаш гөзләп башларлар ве бу олара Месихе гуллук этмәге пәсгел берер. 12 Олар башдакы берен вадасындан* дәнендиклери себәпли хөкүме сезевар боларлар. 13 Шейле-де олар өйден-өе гезип, ялталыга өвренишйәрлер. Хава, олар диңе бир ялта болман, эйсем, гыбат эдйәрлер ве өзлерине дегишли болмадык затлар барада гүррүң эдип, башгаларың ишлерине гошулярлар. 14 Шонуң үчин душманлар бизи танкытламаз ялы, мен яш дул аялларың дурмуша чыкмакларыны, чага догурмакларыны, өй-ичерисиниң аладасыны этмеклерини ислейәрин. 15 Кәбир дул аяллар догры ёлдан азашып, Шейтаның ызына дүшдүлер. 16 Эгер иманлы аялың дул галан доган-гарындашлары бар болса, олара көмек этсин, йыгнага аграм дүшмесин. Шонда йыгнак көмеге мәтәч башга дул аялларың* аладасыны эдип билер.

17 Йыгнага говы гөзегчилик эдйән, эсасан-да, Худайың сөзи хакда гүррүң этмекде ве өвретмекде көп зәхмет чекйән яшулулар ики эссе хормата мынасып гөрүлсин. 18 Себәби Язгыларда: «Харман дөвйән* өкүзиң агзыны багламаң», «Ишчи өз хакыны алмага мынасыпдыр» дийилйәр. 19 Ики я-да үч шаят болмаса, йыгнак яшулусы хакда айдылян айыплама ынанма. 20 Бейлекилере дуйдурыш болар ялы*, гүнә эдйәнлере хеммелериң өңүнде кәйинч бер. 21 Мен Худайың, Месих Исаның, мукаддес* перишделериң өңүнде саңа шу гөркезмелере адалатлы* ве ала тутман эермегиңи берк табшырярын.

22 Йыгнакда бирини җогапкәрли борҗа беллемекчи* боланыңда ховлукма; башгаларың гүнәли ишлерине-де гошулма; өзүңи пәк сакла.

23 Мундан бейләк диңе бир сув ичмән, эйсем, ашгазаның ве йыгы-йыгыдан болян яравсызлыгың үчин бираз шерап ич.

24 Кәбир адамларың эдйән гүнәсини хеммелер билйәр ве олар шол бада хөкүме сезевар боляр, эмма кәбирлериниңки гелеҗекде белли болар. 25 Шонуң ялы-да ягшы ишлери хеммелер гөрйәндир, эмма гөрүнмейән ягшы ишлер хем гизлин галып билмез.