1 Яхя
1 Биз сизе овал-башдан бәри яшаян, сесини эшиденимиз, гөзүмиз билен гөренимиз, сынланымыз ве элимиз билен элләнимиз хакда язярыс. Ол яшайыш сөзүдир. 2 Хава, бизе яшайыш аян болды ве биз оны гөрүп, ол хакда шаятлык этдик. Биз сизе Атамызың янында болан ве бизе гөрнен эбеди яшайыш хакында гүррүң бердик. 3 Сиз хем бизиң билен бирликде болар ялы, сизе гөренимиз ве эшиденимиз хакда айдярыс. Биз хем Атамыз ве онуң Оглы Иса Месих билен бирликдедирис. 4 Биз бу затлары шатлыгымыз долы болсун дийип язярыс.
5 Бизиң Исадан эшиден ве сизе ыглан эдйән хабарымыз шудур: Худай нурдур, онда хич хили гараңкылык ёкдур. 6 Эгер биз: «Онуң билен бирликдедирис» дийип-де, гараңкылыкда гезйән болсак, онда ялан сөзлейәндирис ве хакыкат боюнча яшаян дәлдирис. 7 Эмма Худайың нурда болшы ялы, биз-де нурда гезсек, онда бир-биримиз билен бирликдедирис ве онуң Оглы Исаның ганы бизи әхли гүнәлерден саплаяндыр.
8 Эгер биз: «Гүнәли дәлдирис» диййән болсак, өзүмизи алдаяндырыс ве хакыката ынанян дәлдирис. 9 Эгер биз гүнәлеримизи боюн алсак, Худай гүнәлеримизи багышлар ве әхли эрбет ишлерден арассалар, себәби ол вепалы хем догручылдыр. 10 Эгер биз: «Гүнә эден дәлдирис» дийсек, онда Худайы яланчы эдйәндирис ве онуң сөзүне ынанмаяндырыс.