1 Яхя
2 Балаларым, мен бу хаты сизиң гүнә этмезлигиңиз үчин язярын. Эмма бириңиз гүнә этсеңиз, Атаның янында көмекчимиз* болан догручыл Иса Месих бардыр. 2 Ол бизи Худай билен ярашдырян, гүнәлеримиз үчин берлен гурбандыр. Ол диңе бизиң үчин дәл, эйсем, бүтин дүнйә үчин берлен гурбандыр. 3 Эгер биз онуң табшырыкларыны берҗай эдйән болсак, оны танаяндыгымыза дүшүнйәндирис. 4 Кимдир бири: «Мен оны танаярын» дийип-де, табшырыкларыны берҗай этмесе, ол яланчыдыр ве онда хакыкат ёкдур. 5 Эмма Худайы хакыкатдан сөййән адам онуң сөзүни берҗай эдйәндир. Шейдип, биз Худай билен бирликдедигимизи гөркезйәрис. 6 Өзүни онуң билен бирликде хасаплаян адам Иса ялы яшамага борчлудыр.
7 Эзиз балаларым, мен сизе тәзе дәл-де, озал башда* берлен көне табшырыгы язярын. Сиз бу көне табшырыгы өң эшидипдиңиз. 8 Йөне мениң сизе язян табшырыгым шонда-да тәзедир, оңа Месих хем эерйәрди, сиз хем эерйәрсиңиз. Чүнки гараңкылык гечип баряр, хакыкы ягтылык эййәм нур сачяр.
9 Кимдир бири ягтылыкда гезйәрин дийип-де, өз доганыны йигренсе, ол хенизем гараңкылыкдадыр. 10 Доганыны сөййән ягтылыкда галяндыр ве ол бүдрейән дәлдир. 11 Эмма доганыны йигренйән киши гараңкылыкдадыр ве гараңкылыкда гезйәндир. Ол нирә баряндыгыны-да билйән дәлдир, себәби гараңкылык онуң гөзлерини көр эдендир.
12 Балаларым, Худай сизиң гүнәлериңизи онуң* адының хатырасына багышлады. Шол себәпли сизе шу хаты язярын. 13 Аталар, сизе язярын, себәби сиз озал-башда бар Боланы танадыңыз. Яшлар, сизе язярын, себәби сиз Залымы еңдиңиз. Чагалар, сизе язярын, себәби сиз Атаны танадыңыз. 14 Аталар, сизе язярын, себәби сиз озал-башда бар Боланы танадыңыз. Яшлар, сизе язярын, себәби сиз гүйчлүсиңиз, Худайың сөзүни йүрегиңизде саклаярсыңыз ве Залымы еңдиңиз.
15 Дүнйәни-де, дүнйәдәки затлары-да сөймәң. Дүнйәни сөййән адам Атаны сөййән дәлдир. 16 Себәби дүнйәдәки затлар — тен хөвеслери, гөз хөвеси ве задыңа өвүнмеклик* — Атадан дәл-де, бу дүнйәдендир. 17 Үстесине-де, дүнйә ве онуң хөвеслери гечип гидер, эмма Худайың ислегини берҗай эдйән адам эбеди яшар.
18 Балаларым, хәзир соңкы пурсатдыр ве сиз Месихиң душманының гелйәндигини эшиденсиңиз. Хәзир Месихиң душманлары хас-да көпелди, бу болса бизе соңкы пурсадың гелендигини аян эдйәр. 19 Олар бизиң арамыздан чыкдылар, йөне бизе дегишли дәлдилер. Эгер олар бизе дегишли болан болса, бизиң арамызда галардылар. Эмма олар бизден гидип, бизе дегишли дәлдигини гөркездилер. 20 Сиз Мукаддес Худай тарапындан месх эдилдиңиз* ве әхлиңиз хакыкаты билйәрсиңиз. 21 Мен сизе хакыкаты билмейәндигиңиз үчин дәл, эйсем, оны билйәндигиңиз үчин язярын, себәби ялан затдан хакыкат чыкян дәлдир.
22 Исаның Месихдигини инкәр эдйән адам яланчы дәлми нәме? Ол Месихиң душманыдыр, Атаны ве Оглы инкәр эдйәндир. 23 Оглы инкәр эдйән хер бир адам Атаның гөвнүнден турян дәлдир. Эмма Оглы кабул эдйән адам Атаның гөвнүнден туряндыр. 24 Сиз болса өңден эшиден затларыңызы йүрегиңизде саклаң. Эгер олары йүрегиңизде сакламасаңыз, онда не Огул билен, не-де Ата билен бирликде галарсыңыз. 25 Галыберсе-де, Худайың* хут өзи бизе эбеди яшайшы вада берди.
26 Мен сизе алдава салҗак болянлар хакда язярын. 27 Сиз хакда айтсам, сизе тәлим берйәнчилер герек дәл. Себәби Худай сизи рухы билен месх этди, шол рух сизде галяндыр. Ол сизе рухы аркалы әхли зады өвредйәр; бу хакыкатдыр, ялан дәлдир. Шол себәпли рухуң сизе өвредиши ялы, сиз онуң билен бирликде галың. 28 Хәзир болса, балаларым, ол аян боланда, ынамлы* гепләп билер ялы ве ол геленде*, утанҗа галып, ондан дашлашмаз ялы, онуң билен бирликде галың. 29 Эгер сиз онуң догручылдыгыны билйән болсаңыз, онда догрулык эдйән хер кишиниң хем Худайдан догландыгыны билйәнсиңиз.