1 Яхя
4 Эзиз балаларым, хер бир айдылан ылхамлы сөзе* ынанмаң. Оларың Худайдан гелендигини я-да гелмәндигини аныклаҗак болуң. Себәби дүнйәде ялан пыгамберлер көпелди.
2 Сиз ылхамлы сөзүң Худайдан гелендигини шейдип аныклап билерсиңиз: Иса Месихиң ынсан беденинде гелендигини кабул эдйән хер бир ылхамлы сөз Худайдандыр. 3 Эмма Исаны кабул этмейән ылхамлы сөз Худайдан дәлдир. Ол Месихиң душманының ылхамлы сөзүдир. Сиз онуң ылхамлы сөз билен гелҗекдиги хакда эшидипдиңиз ве ол эййәм дүнйәдедир.
4 Балаларым, сиз Худайың тарапындасыңыз ве олары еңдиңиз. Себәби сизиң билен бирликде болан Худай дүнйә билен бирликде болан Иблисден гүйчлүдир. 5 Олар дүнйәниң тарапындадыр; шол себәпли олар дүнйә дегишли затлар хакда геплейәрлер ве дүнйә олара гулак асяр. 6 Биз болса Худайың тарапындадырыс. Худайы танан хер киши бизе гулак асяндыр; Худайың тарапында болмадык адам бизе гулак асян дәлдир. Шейдип, биз ылхамлы сөзүң хакыкатдыгыны я-да яландыгыны тапавутландырып билйәрис.
7 Эзиз балаларым, гелиң, мундан бейләк-де бирек-биреги сөелиң, себәби сөйги Худайдандыр. Сөййән хер киши Худайың чагасыдыр ве Худайы танаяндыр. 8 Сөймейән адам Худайы танан дәлдир, себәби Худай сөйгүдир. 9 Худай дүнйә еке-тәк Оглуны иберип, бизе ол аркалы яшайша говушмага ёл ачды. Шейдип, ол бизи сөййәндигини гөркезди. 10 Худай Оглуны бизиң гүнәлеримиз үчин гурбан берип, өзи билен ярашдырды. Худай муны бизиң оны дәл-де, онуң бизи сөендиги үчин этди.
11 Эзиз балаларым, эгер Худай бизи шейле сөййән болса, онда биз хем бир-биримизи сөймәге борчлудырыс. 12 Худайы хич ким хич хачан гөрен дәлдир. Эгер биз мундан бейләк-де бири-биримизи сөйсек, Худай бизиң билен болар ве онуң сөйгүси бизде кәмиллешер. 13 Шейдип, биз онуң билен, ол хем бизиң билен бирликде боляр. Себәби ол бизе рухуны берйәндир. 14 Биз Атамызың Оглуны дүнйә Халасгәр хөкмүнде иберендигини гөрдүк ве бу хакда гүррүң бердик. 15 Исаны Худайың Оглы хасаплаян хер бир адам Худай билен бирликдедир, Худайың өзи-де онуң билен бирликде галяндыр. 16 Худайың бизи сөййәндигини билдик ве муңа ынанярыс.
Худай сөйгүдир. Онуң сөйгүсинде галян адам онуң билен бирликде, Худай хем онуң билен бирликде галяндыр. 17 Шейлеликде, биз хөкүм гүнүнде ынамлы* гепләп билер ялы, сөйги бизде кәмиллешди. Себәби Иса нәхили болса, биз хем шу дүнйәде шейледирис. 18 Сөйгүде горкы ёкдур, эмма кәмиллешен сөйги горкыны айыряндыр*, себәби горкы аркайын херекет этдирйән дәлдир. Догрудан-да, горкян адамың сөйгүси кәмиллешен дәлдир. 19 Биз сөййәрис, себәби илки Худай бизи сөйди.
20 Кимдир бири: «Мен Худайы сөййәрин» дийип-де, доганыны йигренйән болса, ол яланчыдыр. Гөзи билен гөрйән доганыны сөймедик адам гөрмейән Худайыны сөйүп билмез. 21 Эмма бизе ондан шейле табшырык берилди: Худайы сөййән адам доганыны-да сөймели.