1 Яхя
3 Атамызың бизе болан сөйгүси хакда ойланып гөрүң! Ол бизи өз чагалары хасаплаяр, догрудан-да, биз онуң чагаларыдырыс. Эмма дүнйә бизи танамаяр, себәби ол Худайы танамады. 2 Эзиз балаларым, биз хәзир Худайың чагаларыдырыс, эмма гелеҗекде бизиң нәхили болҗакдыгымыз хениз аян болмады. Йөне ол өзүни аян эденде, биз онуң өзи ялы болҗакдыгымызы билйәрис, себәби онуң нәхилидигини гөрерис. 3 Оңа умыт эдйән хер киши онуң тәмиз болшы ялы, өзүни тәмизлейәндир.
4 Гүнә эдйән адам кануны-да бозяндыр, чүнки гүнә канунсызлыкдыр. 5 Шейле-де биз онуң гүнәлеримизи айырмак үчин гелендигини ве онуң гүнәсиздигини билйәрис. 6 Иса билен бирликде болан хич бир адам гүнә эдйән дәлдир; гүнә эден адам оны не гөрендир, не-де танандыр. 7 Балаларым, гой, хич ким сизи алдава салмасын; догрулык эдйән адам Исаның догручыл болшы ялы догручылдыр. 8 Гүнә эдйән адам Иблисдендир, себәби Иблис башлангычдан бәри гүнә эдип гелйәр. Шол себәпли Худайың Оглы Иблисиң ишлерини ёк этмәге гелди.
9 Худайың чагалары гүнә эдйән дәлдир. Оларда Худайың мукаддес рухы* бардыр ве олар Худайдан боландыклары үчин гүнәли ёлдан йөремейәрлер. 10 Худайың чагаларыны ве Иблисиң чагаларыны шундан танаса боляр: догрулык этмейән адам Худайың чагасы дәлдир, ол доганыны-да сөййән дәлдир. 11 Сиз өңден бәри эшидип гелйән хабарыңызы, ягны бир-биримизи сөймелидигимизи унутмаң. 12 Биз Кабыл ялы болмалы дәл. Ол Залымданды ве доганыны өлдүрди. Ол доганыны нәме үчин өлдүрди? Себәби онуң эдйән ишлери залымды, доганыныңкы болса догруды.
13 Доганлар, дүнйәниң сизи йигренйәндигине гең галмаң. 14 Биз өлүмден яшайша гечендигимизи билйәрис, себәби доганларымызы сөййәрис. Доганыны сөймейән өлүмде галяндыр. 15 Доганыны йигренйән киши ганхордыр*, сиз болса хич бир ганхорың эбеди яшайша говшуп билмеҗекдигини билйәрсиңиз. 16 Шейлеликде, биз сөйгиниң нәмедигини билдик, себәби ол бизиң үчин өз җаныны гурбан этди. Диймек, биз хем доганларымыз үчин җанымызы гурбан этмәге борчлудырыс. 17 Кимдир бириниң мүмкинчилиги болуп-да, доганының мәтәчлик чекйәндигини гөрүп, оңа рехими инмесе, ол Худайы нәдип сөйүп билер? 18 Балаларым, биз диңе бир сөзде я-да дилде дәл, эйсем, иш йүзүнде ве йүрекден сөймелидирис.
19 Шейдип, биз хакыкатың тарапындадыгымызы билерис ве йүрегимизи Худайың бизи сөййәндигине ынандырарыс. 20 Эгер йүрегимиз бизи язгарян болса, онда Худайың бизи өзүмизден хем говы танаяндыгыны* ве әхли зады билйәндигини унутмалың. 21 Эзиз балаларым, эгер йүрегимиз бизи гүнәкәрлемейән болса, онда Худайың өңүнде чекинмән* гепләп билерис. 22 Биз ондан нәме дилесек-де, алярыс, себәби онуң табшырыкларыны берҗай эдип, гөвнүне яраян затлары эдйәрис. 23 Худайың табшырыгы шудур: онуң Оглы Иса Месихе иман эдип, онуң бизе табшырышы ялы, бир-биримизи сөймелидирис. 24 Шейле-де табшырыкларыны берҗай эдйән адам онуң билен бирликде галяндыр, ол хем шейле адам билен бирликде боляндыр. Биз онуң билен бирликде галяндыгымызы онуң берйән рухундан билйәрис.