Sekiz adam halas boldy

Nuhuň maşgalasy we haýwanlar gämä girdi. Soňra Ýehowa gäminiň gapysyny ýapdy. Ýagyş ýagyp başlady. Ýagyş şeýle bir köp ýagdy welin, ýeriň ýüzi suwdan doldy we gämi ýüzüp başlady. Gäminiň daşynda galan adamlar gark bolup öldüler. Ýöne Nuh bilen maşgalasy halas boldy. Olar Ýehowany diňläp, gämä girendigine begenendir.

Ýagyş 40 gije-gündiz ýagdy. Soňra ýagmagyny goýdy. Suw kem-kemden azalyp başlady. Ahyry gämi bir dagyň üstünde durdy. Ýöne gäminiň içindäkiler daşyna çykyp bilmedi, sebäbi daş-töwerek suwdy.

Suw azalyp, ýer gurap başlady. Nuh maşgalasy bilen gäminiň içinde bir ýyldanam köp ýaşady. Soňra Ýehowa olara gämiden çykyp bilýändigini aýtdy. Olar gämiden çykanda täze dünýä düşen ýaly boldular. Nuhuň maşgalasy halas bolandygyna begenip, Ýehowa gurbanlyk berdi.

Ýehowa olaryň gurbanlygyny gowy gördi. Şonuň üçin: «Indi güýçli ýagyş ýagdyryp, ýer ýüzündäki zatlary ýok etmerin» diýip söz berdi. Soňra Ýehowa älemgoşar çykardy. Ol: «Älemgoşary göreniňizde beren sözüm ýadyňyza düşer» diýdi. Sen älemgoşary gördüňmi?

Soňra Ýehowa Nuha we maşgalasyna köp çaga edinip, ýer ýüzüni doldurmagy tabşyrdy.