He a te Talitonu Ki ei na Molimau a Ieova?

“Ko ki matou e fia fakalogo atu pe he a te talitonu koutou ki ei, aua oi oti lava te mea e iloa e ki matou e uiga ki ienei Kelihiano e veia e tetekegia ki latou i atunuku uma!” (Galuega 28:​22) Ko ienei takitaki nuku i te henetuli muamua i Loma na fakatu e ki latou he fakatakitakiga lelei. Nae fofou ki latou ke fakalogo atu ki te pogai, i lo te fakalogo atu ki ni faitioga mai tua oi oti.

I he auala vena, ko Molimau a Ieova i na aho nei e faitiogia, ma e ko he mea hehe ke fakamoemoe ke akoako te mea moni e uiga kia teki latou mai ni auala faitio. Ko te mea e fiafia ai ki matou ke fakamatala atu kia te koe ni e tahi o matou talitonuga autu.

Ko te Tuhi Paia, ko Iehu Keliho, ma te Atua

E talitonu ki matou ko na “tuhituhiga paia uma e fakagaekegia e te Atua ma e aoga.” (2 Timoteo 3:16) Ma e ui lava ko i e tahi tino e lea veia ko ki matou e he ni kelihiano, e he moni tenei mea. E fakamaonia katoatoa e ki matou te fakamatalaga a te apohitolo ko Petelu e uiga kia Iehu Keliho: “E heai he tahi igoa i lalo o te lagi kua foki mai ki tagata ke fakaolagia ai ki tatou.”​—⁠Galuega 4:⁠12.

Kae ui i te ia, talu ai ona ko Iehu na lea mai ko ia ko te “Ataliki o te Atua” ma “ko au na uga mai e te Tamana,” ko Molimau a Ieova e talitonu ko te Atua e hili atu ia i lo Iehu. (Ioane 10:36; 6:57) Na fakailoa mai e Iehu lava ia: “E hili toku Tamana ia te au.” (Ioane 14:28; 8:28) E vena ona he talitonu ki matou ko Iehu e tutuha ma te Tamana, e ve ona lea mai ai te talitonuga ki te Tolutahi. I lo tena, e talitonu ki matou ko ia na fai e te Atua ma ko ia e maulalo ifo i lo Ia.​—⁠Kolohe 1:15; 1 Kolinito 11:⁠3.

I te gagana Tokelau, ko te igoa o te Atua ko Ieova. E lea mai te Tuhi Paia: “Ko koe, e o koe te igoa ko IEOVA, kua na ko koe e Hilihili kehe i te lalolagi katoa.” (Halamo 83:​18) I te tauhia o te takutinoga tenei, na fakamamafa lahi ai e Iehu te igoa o te Atua, te akoako o ona hoko ke tatalo: “To matou Tamana i te lagi, ke paia to igoa.” Ma na tatalo lava ia ki te Atua: “Kua fakailoa atu foki e au to igoa ki na tino na ke kaumaia kia te au.”​—⁠Mataio 6:9; Ioane 17:⁠6.

Ko Molimau a Ieova e talitonu veia e tatau ki latou ke ve ko Iehu i te fakailoa atu o te igoa ma na fuafuaga a te Atua ki i e tahi tino. Ko tena kua fakaaoga ai e ki matou te igoa ko Molimau a Ieova ona ko ki matou e fakatakitaki kia Iehu, “te Molimau Fakamaoni.” (Fakaaliga 1:5; 3:14) Kua fetaui ai, te Ihaia 43:10 e lea mai ki na tino hui o te Atua: “ ‘Ko koutou ko aku molimau’ kua lea mai ai ia Ieova, ‘ko taku kaukauna kua ko filifilia.’ ”

Ko te Malo o te Atua

Na akoako e Iehu ona hoko ke tatalo, “Ke oko mai to malo,” ma nae fai e ia te Malo tena ma matakupu pito taua i ana akoakoga. (Mataio 6:10; Luka 4:43) Ko Molimau a Ieova e talitonu veia ko te Malo he pulega moni lava mai te lagi, ka pule ki luga o te lalolagi, ma ko Iehu Keliho ko tona Tupu tofia he kitea. “E i tona ua te malo,” e lea mai te Tusi Paia, “E heai he mea e gata mai ai te lahi o tona malo ma te filemu o tona Malo.”​—⁠Ihaia 9:​6, 7.

Kae ui i teia, ka he na ko Iehu Keliho oi oti te Tupu o te malo o te Atua. Ka iei ana tino pule fehoahoani e fakatahi ma ia i te lagi. “kafai e tumau,” na tuhi atu ai te apohitolo ko Paulo, “ka pule foki ki tatou e ve ni tupu.” (2 Timoteo 2:12) Na fakaali mai e te Tuhi Paia veia ko tagata ola iena e toe fakatutu ke pule fakatahi ma Keliho i te lagi e fakagata mai i te “helau fahefulu ma te fa afe i e ia kua fakatau mai mai te lalolagi.”​—⁠Fakaaliga 14:​1, 3.

Ko te mea moni, ho he malo e tatau ona iei ni ona tagatanuku, ma ko Molimau a Ieova e talitonu veia e piliona ma piliona e kehe mai mai ienei tino pule fakate lagi ka maua e ki latou te ola e fakavavau. Mulimuli ake, ko te lalolagi ka liua ki he palataiho manaia, ka fakatumugia i ienei tagatanuku tatau o te Malo o te Atua, ka uhitaki atu uma ki te pulega a Keliho ma ana tino pule fehoahoani. Kua vena ona mautinoa e Molimau a Ieova veia ko te lalolagi ka he fakaumatiagia ma ka fakataunukugia te folafolaga a te Tuhi Paia: “Ko na tino amiotonu ka fai mo latou te lalolagi, ma ka nonofo ai e fakavavau.”​—⁠Halamo 37:29; 104:⁠5.

Kae vehea ona oko mai te Malo o te Atua? I te ofo atu o tagata uma ke uhitaki atu ki te malo o te Atua? E he ko tena, kua fakaali tonu mai e te Tuhi Paia ko te oko mai o te Malo ka manakomia ai te taofiga tuhako e te Atua o na faiga a te lalolagi: “Ka fakatu e te Atua o te lagi he malo e he fakaumatia. Ma ko te malo tena ka . . . tukimomo e ia ma fakaumatia na malo ienei, ka ko ia ka tumau e fakavavau.”​—⁠Tanielu 2:⁠44.

E oko mai afea te Malo o te Atua? E tuha ai ma na valoaga a te Tuhi Paia kua fakataunukugia, ko Molimau a Ieova e talitonu ka toe itiiti lele oi oko mai. E valakaulia koe e ki matou ke mafaufau ki ni valoaga e taku mai ai te lumanaki o “na aho e gata ai” te faiga kino tenei o mea. E fakamaugia i te Mataio 24:​3-14; Luka 21:​7-13, 25-31; ma te 2 Timoteo 3:​1-5.

Talu ai ona ko ki matou e ‘alolofa kia Ieova to matou Atua ma o matou loto katoa, agaga katoa, manatu katoa, malohi katoa, ma o matou tuakoi e ve ko ki matou kia teki matou lava,’ ko ki matou e he fevaevaeaki fakaatunuku, fakaitukaigā tagata, ma fakava-o-tagata. (Maleko 12:​30, 31) Kua lauiloa ki matou ona ko te alofa e fakaalia i loto o o matou uho Kelihiano i e ia e maua i atunuku uma. (Ioane 13:35; 1 Ioane 3:​10-12) E vena ona tauhia e ki matou he tulaga he fakakaukau ki he itu agai ki na mea faka faigāmālo i na atunuku iena. Ko ki matou e taumafai ke ve ko na hoko muamua o Iehu, i e ia na lea ve ai ia: “Ko ki latou e he ni tino e o te lalolagi, e ve foki ko au e he o te lalolagi au.” (Ioane 17:16) E talitonu ki matou ko te vavae kehe mai mai te lalolagi ko tona uiga ko te kalo kehe mai na amioga he mamā, teia kua taka lahi i na aho nei, e aofia ai te tala pepelo, kaihohoa, faitaaga, mulilua, tauatane ma te tauafafine, te fakaaoga hehe o te toto, ko te ifo ki tupua, ma i e tahi mea vena e taku kino i te Tuhi Paia.​—⁠1 Kolinito 6:​9-11; Efeho 5:​3-5; Galuega 15:​28, 29.

Fakamoemoe mo te Lumanaki

Ko Molimau a Ieova e talitonu veia ko to tatou olaga e iei nei i te lalolagi e he oi oti ai. E talitonu ki matou ko Ieova na uga mai e ia ia Keliho ki te lalolagi ke fakamaligi tona toto ola ke fai ma togiola ke mafai ai e tagata ke maua he tulaga amiotonu i mua o te Atua ma maua ai te ola e fakavavau i he faiga fou o mea. E ve o na lea mai te tahi apohitolo: “Kua taku amiotonugia nei ki tatou i tona toto.” (Loma 5:9; Mataio 20:28) Ko Molimau a Ieova e fakafetai lahi ki te Atua ma tona Ataliki mo tenei taulaga togiola teia ka mafai ai ona iei he ola i te lumanaki.

Ko Molimau a Ieova e ia teki latou he talitonuga katoatoa ki he ola i te lumanaki, e fakavae i te toetu mai te oti i lalo o te Malo o te Atua. E talitonu ki matou e ve ona akoako mai te Tuhi Paia veia, kafai e oti he tino kua he toe iei moni ia, veia “i te aho lava tena e fakaumatia ai ona ­mafaufauga.” (Halamo 146:​3, 4; Ehekielu 18:⁠4; Failauga 9:5) Io, ko te ola i te lumanaki mo na tino kua feoti e fakavae i te manatua e te Atua o ki latou i he toetu.​—⁠Ioane 5:​28, 29.

Kae ui i teia, e talitonu ia Molimau a Ieova veia e tokalahi ki latou e ola i te taimi nei ka fakahao kafai e fakaumatia e te Malo o te Atua ia malo uma e iei nei ma, e ve ona fakahaogia ia Noa ma tona kaiga mai te Lolo, ka ola pea ki latou ke fiafia i he ola e fakavavau i luga o he lalolagi kua uma te fakamamagia. (Mataio 24:​36-39; 2 Peteru 3:​5-7, 13) Kae talitonu ki matou veia ko te fakahaoga e fakalagolago ki te fakamaliega o na manakoga o Ieova, e ve ona lea mai te Tuhi Paia: “E mavae atu te lalolagi . . . ka ko te tino e fai e ia te finagalo o te Atua e tumau e fakavavau.”​—⁠1 Ioane 2:17; Halamo 37:11; Fakaaliga 7:​9, 13-15; 21:​1-5.

E manino lava, e he mafai ke fakakatoa uma i kinei na talitonuga o Molimau a Ieova, kae valakaulia koe e ki matou ke maua pea ni e tahi fakamatalaga.

Vagana e kehe he tahi auala e fakahino mai, ko na mau uma fakate Tuhi Paia e mai te Tuhi Paia Hamoa, lomiga 1884.

[Blurb on page 4]

Kua fakaaoga e ki matou te igoa Molimau a Ieova aua ko ki matou e fakatakitaki kia Iehu