Awit

38 O Jehova, huwag mo akong sawayin sa iyong galit,+

Ni ituwid mo man ako sa iyong pagngangalit.+

 2 Sapagkat ang iyong mga palaso ay bumaon nang malalim sa akin,+

At ang iyong kamay ay bumaba sa akin.+

 3 Walang bahaging malusog sa aking laman dahil sa iyong pagtuligsa.+

Walang kapayapaan sa aking mga buto dahilan sa aking kasalanan.+

 4 Sapagkat ang sarili kong mga kamalian ay dumaan sa ibabaw ng aking ulo;+

Tulad ng mabigat na pasan ay napakabigat ng mga iyon para sa akin.+

 5 Ang aking mga sugat ay bumaho, ang mga iyon ay nagnanaknak,

Dahil sa aking kamangmangan.+

 6 Ako ay nagulumihanan, ako ay napayukod nang lubusan;+

Buong araw akong naglalakad na malungkot.+

 7 Sapagkat ang akin mismong mga balakang ay nalipos ng pagkapaso,

At walang bahaging malusog sa aking laman.+

 8 Ako ay naging manhid at nasiil nang lubusan;

Ako ay umungal dahil sa pagdaing ng aking puso.+

 9 O Jehova, nasa harap mo ang aking buong pagnanasa,

At mula sa iyo ay hindi nakubli ang aking pagbubuntunghininga.+

10 Ang aking puso ay tumibok nang mabilis, nilisan ako ng aking kalakasan,

At ang liwanag din ng aking mga mata ay wala sa akin.+

11 Kung tungkol sa mga umiibig sa akin at sa aking mga kasamahan, nakatayo silang malayo sa aking salot,+

At ang aking malalapit na kakilala ay nakatayo sa malayo.+

12 Ngunit yaong mga naghahanap sa aking kaluluwa ay naglalatag ng mga bitag,+

At yaong mga gumagawa ng ikapapahamak ko ay nagsasalita ng mga kapighatian,+

At mga panlilinlang ang lagi nilang ibinubulung-bulong buong araw.+

13 Kung tungkol sa akin, tulad ng isang bingi, hindi ako nakikinig;+

At tulad ng isang pipi, hindi ko ibinubuka ang aking bibig.+

14 At ako ay naging tulad ng isang taong hindi makarinig,

At sa aking bibig ay walang mga pangangatuwiran.

15 Sapagkat sa iyo, O Jehova, ako ay naghintay;+

Ikaw ay sumagot, O Jehova na aking Diyos.+

16 Sapagkat sinabi ko: “Baka magsaya sila sa akin;+

Kapag sumuray-suray ang aking paa,+ tiyak na lubha silang magpapalalo laban sa akin.”+

17 Sapagkat malapit na akong umika-ika,+

At ang aking kirot ay laging nasa harap ko.+

18 Sapagkat inihayag ko ang tungkol sa aking kamalian;+

Nagsimula akong mabalisa dahil sa aking kasalanan.+

19 At ang mga kaaway kong buháy ay naging malakas,+

At ang mga napopoot sa akin nang walang dahilan ay dumami.+

20 At ginagantihan nila ako ng masama kapalit ng mabuti;+

Lagi nila akong sinasalansang bilang ganti sa pagtataguyod ko ng mabuti.+

21 Huwag mo akong iwan, O Jehova.

O Diyos ko, huwag kang lumayo sa akin.+

22 Magmadali ka sa pagtulong sa akin,+

O Jehova na aking kaligtasan.+