31 Dahil ang kanilang bato ay hindi gaya ng ating Bato,+

Alam iyan kahit ng mga kaaway natin.+

32 Ang tunay na Diyos ang nagbibigay* sa akin ng lakas,+

At gagawin niyang perpekto ang aking daan.+

33 Ang mga paa ko ay ginagawa niyang gaya ng sa usa;

Pinatatayo niya ako sa matataas na lugar.+

34 Sinasanay niya ang mga kamay ko sa pakikipagdigma;

Nababaluktot ng mga bisig ko ang tansong pana.

35 Ibinibigay mo sa akin ang iyong kalasag ng kaligtasan,+

Inaalalayan ako ng iyong kanang kamay,

At nagiging dakila ako dahil sa iyong kapakumbabaan.+

36 Pinalalapad mo ang nilalakaran ko;

Hindi madudulas ang aking mga paa.+

37 Hahabulin ko at aabutan ang mga kaaway ko;

Hindi ako babalik hangga’t hindi sila nauubos.

38 Dudurugin ko sila para hindi na sila makabangon;+

Babagsak sila sa paanan ko.

39 Bibigyan mo ako ng lakas para sa pakikipagdigma;

Pababagsakin mo sa harap ko ang aking mga kalaban.+

40 Pauurungin mo ang mga kaaway ko,*

At pupuksain* ko ang mga napopoot sa akin.+

41 Humihingi sila ng tulong, pero walang nagliligtas sa kanila;

Tumatawag pa nga sila kay Jehova, pero hindi niya sila sinasagot.

42 Dudurugin ko sila nang pino na gaya ng alabok sa hangin;

Itatapon ko sila na gaya ng putik sa lansangan.