Mga Turong Nagbibigay ng Pag-asa

Aalisin ng Diyos ang Masasamang Tao

“Kahit na ang masasama ay sumisibol na gaya ng panirang-damo at umuunlad ang lahat ng gumagawa ng mali, malilipol sila magpakailanman.”​—AWIT 92:7.

Nakita natin sa naunang artikulo na parami nang parami ang masasamang nangyayari. Hindi na iyan nakakapagtaka. Kasi inihula ng Bibliya sa 2 Timoteo 3:1-5 na sa “mga huling araw,” ang mga tao ay lalo pang sasamâ. Mga huling araw ng ano? Mga huling araw ng mga taong hindi sumusunod sa Diyos. Malapit nang puksain ng Diyos ang masasama na ayaw magbago. Pagkatapos, ang matitira na lang ay ang mabubuting tao—ang mga sumusunod sa Diyos. “Ang mga matuwid ang magmamay-ari ng lupa, at titira sila roon magpakailanman.”​—Awit 37:29.

Pupuksain ng Diyos si Satanas

“[Dudurugin] ng Diyos na nagbibigay ng kapayapaan si Satanas.”​—ROMA 16:20.

Kapag pinuksa na ang masasama, pati na si Satanas at ang mga demonyo, magkakaroon na ng kapayapaan sa buong lupa. Nangangako ang ating Maylalang: “Walang sinumang tatakot sa [iyo].”​—Mikas 4:4.

Aalisin ng Diyos ang Sakit at Kamatayan

“Ang tolda ng Diyos ay nasa sangkatauhan . . . At papahirin niya ang bawat luha sa mga mata nila, at mawawala na ang kamatayan, pati ang pagdadalamhati at ang pag-iyak at ang kirot.”​—APOCALIPSIS 21:3, 4.

Mawawala na ang pagdurusa at sakit kasi aalisin ng Diyos ang lahat ng pinsalang idinulot ni Satanas, nina Adan at Eva, at ng ating pagiging di-perpekto. Dahil diyan, “mawawala na ang kamatayan.” Ang mga taong nagmamahal at sumusunod sa Maylalang ay mabubuhay nang walang hanggan. Pero saan sila mabubuhay?

Gagawing Paraiso ng Maylalang ang Buong Lupa

“Ang ilang at ang tuyong lupain ay magsasaya, at ang tigang na kapatagan ay magagalak at mamumulaklak na gaya ng safron.”​—ISAIAS 35:1.

Kapag pinuksa na ng Diyos ang masasama, magiging paraiso na ang lupa! Magkakaroon ng maraming magagandang parke at hardin, at magbubunga ang lupa ng maraming pagkain. (Awit 72:16) Magiging malinis ang mga dagat, lawa, at ilog, at magkakaroon iyon ng maraming buháy na nilalang. Hindi na rin natin maiisip ang salitang “polusyon.” Magtatayo ang mga tao ng sarili nilang bahay at titira sa mga iyon. Wala nang mawawalan ng bahay, magugutom, o magiging mahirap.​—Isaias 65:21, 22.

Bubuhayin ng Diyos ang mga Patay

“Bubuhaying muli ng Diyos ang mga [patay].”​—GAWA 24:15.

Gusto mo bang makitang muli ang mga mahal mo sa buhay na namatay na? Bubuhayin silang muli ng Diyos na Makapangyarihan-sa-Lahat sa Paraiso sa lupa. Makikilala mo sila, at makikilala ka rin nila. Isipin mo kung gaano kasaya iyon! Bakit sigurado tayong mangyayari ito? Kasi sa Bibliya, may mga bata at matanda na binuhay-muli at nakasama ulit nila ang kanilang pamilya. Isa pa, kadalasan nang ginawa ni Jesus ang pagbuhay-muli sa harap ng maraming tao.​—Lucas 8:49-56; Juan 11:11-14, 38-44.