METEG-AMMA

[Renda ng Amma (posible, Siko)].

Isang lugar na kinuha ni Haring David mula sa mga Filisteo. (2Sa 8:1) Yamang walang nalalamang anumang lokasyon na may ganitong pangalan, malamang na ang Meteg-amma ay isang makasagisag na termino na tumutukoy sa isa sa mga pangunahing lunsod ng mga Filisteo. Ang katulad na ulat sa 1 Cronica 18:1 ay nagsasabi ng ganito, “ang Gat at ang mga sakop na bayan nito.” Sa 2 Samuel 8:1, maliwanag na itinuring ng American Standard Version na ang elementong “amma” sa Meteg-amma ay mula sa salitang Hebreo para sa “ina.” Kaya naman, isinalin nito ang Meteg-amma bilang “ang renda ng inang lunsod.” Ganitong diwa ang itinatawid ng An American Translation, na kababasahan ng “ang kontrol ng metropolis” sa halip na “Meteg-amma.”