SAGOT SA MGA TANONG SA BIBLIYA

Ano ang Araw ng Paghuhukom?

Noong panahon ng Bibliya, ginamit ng Diyos ang mga hukom para iligtas ang kaniyang bayan mula sa kawalang-katarungan. (Hukom 2:18) Inilalarawan ng Bibliya ang darating na Araw ng Paghuhukom bilang isang masayang panahon kung kailan ililigtas ni Jehova, ang Hukom ng buong lupa, ang mga tao mula sa kawalang-katarungan.—Basahin ang Awit 96:12, 13; Isaias 26:9.

Inatasan ng Diyos si Jesus para maggawad ng katarungan sa mga buháy at mga patay. (Gawa 10:42; 17:31) Maraming tao ang namatay nang hindi nakikilala ang Diyos. Sa Araw ng Paghuhukom, bubuhayin silang muli ni Jesus para makilala nila at ibigin ang tunay na Diyos.—Basahin ang Gawa 24:15.

Bakit tatagal nang sanlibong taon ang Araw ng Paghuhukom?

Ang mga patay ay bubuhaying muli sa panahon ng sanlibong taon. (Apocalipsis 20:4, 12) Kailangan nila ng panahon para matutuhan ang mga daan ng Diyos at sumunod sa kaniya. Salungat sa palagay ng marami, ipinakikita ng Bibliya na ang mga tao ay hahatulan ayon sa ginawa nila pagkatapos ng kanilang pagkabuhay-muli.—Basahin ang Roma 6:7.

Inilalarawan din ng Bibliya ang isang araw ng paghuhukom na biglang mangyayari bago magsimula ang sanlibong taon. Ang araw na iyon ay tinatawag ding wakas, gaya ng tinatalakay sa tampok na mga artikulo ng isyung ito. Sa araw na iyon, pupuksain ng Diyos ang lahat ng taong di-makadiyos at masama. (2 Pedro 3:7) Kaya dapat nating patunayan ang ating pag-ibig sa Diyos.—Basahin ang 2 Pedro 3:9, 13.