Ang Katotohanan Tungkol sa Kaharian ng Diyos
Itinuro ni Jesus sa mga alagad niya na ipanalangin: “Ama namin na nasa langit, pakabanalin nawa ang pangalan mo. Dumating nawa ang Kaharian mo. Mangyari nawa ang kalooban mo, kung paano sa langit, gayon din sa lupa.” (Mateo 6:9, 10) Ano ang Kaharian ng Diyos? Ano ang gagawin nito? At bakit kailangan natin itong ipanalangin?
Si Jesus ang Hari sa Kaharian ng Diyos.
Lucas 1:31-33: “Papangalanan mo siyang Jesus. Siya ay magiging dakila at tatawaging Anak ng Kataas-taasan, at ibibigay sa kaniya ng Diyos na Jehova ang trono ni David na kaniyang ama, at maghahari siya sa sambahayan ni Jacob magpakailanman, at hindi magkakaroon ng wakas ang kaniyang Kaharian.”
Kaharian ang pinakatema ng pangangaral ni Jesus.
Mateo 9:35: “Si Jesus ay lumibot sa lahat ng lunsod at nayon; nagtuturo siya sa kanilang mga sinagoga, nangangaral ng mabuting balita ng Kaharian, at nagpapagaling ng bawat uri ng sakit at kapansanan.”
Sinabi ni Jesus sa kaniyang mga alagad ang tanda, o ang mga mangyayari bago dumating ang Kaharian ng Diyos.
Mateo 24:7: “Maglalabanan ang mga bansa at mga kaharian, at magkakaroon ng taggutom at lindol sa iba’t ibang lugar.”
Ipinapangaral ngayon ng mga tagasunod ni Jesus sa buong mundo ang tungkol sa Kaharian.
Mateo 24:14: “Ang mabuting balitang ito tungkol sa Kaharian ay ipangangaral sa buong lupa para marinig ng lahat ng bansa, at pagkatapos ay darating ang wakas.”