Sulat ng Sangay

Mahal na mga Mamamahayag ng Kaharian:

Noong Pebrero 4, 2008, nagsimula ang kauna-unahang klase ng School for Congregation Elders sa Patterson Educational Center sa Estados Unidos.

Sa panahon ng pag-aaral ng mga punong tagapangasiwa, nasiyahan sila sa nakapagpapatibay na pakikipagsamahan sa pamilyang Bethel. Dumalo rin sila araw-araw sa pang-umagang pagsamba, gayundin sa Pag-aaral sa Bantayan ng pamilyang Bethel tuwing Lunes ng gabi. Ang tampok na bahagi ng paaralan ay ang huling araw ng klase kung saan nagbigay ng espesyal na mga lektyur ang isang miyembro ng Komite ng Sangay sa Estados Unidos at isang miyembro ng Lupong Tagapamahala.

Nagpaabot ng pasasalamat ang mga elder na dumalo sa klase. Ganito ang sinabi ng isang brother: “Nakapagpapatibay ang isang linggo kong paninirahan sa Bethel!” Sumulat naman ang isang elder: “Napasigla akong gampanan ang aking mga pananagutan taglay ang panibagong sigasig.” Ang kasalukuyang kurikulum ay sumasaklaw sa iba’t ibang bahagi ng pananagutan ng mga punong tagapangasiwa at tutulong ito sa kanila na mas mabisang mapaglingkuran ang kongregasyon at matugunan ang mga pangangailangan nito. (Gawa 20:28) Bagaman wala pang ganitong paaralan sa Pilipinas, nagagalak tayong malaman na may maibiging paglalaan si Jehova upang sanayin ang mga tagapangasiwa, at dalangin natin na pagpalain nawa ni Jehova ang susunod pang mga klase sa hinaharap.

Ang inyong mga kapatid,

Tanggapang Pansangay sa Pilipinas