KUNG PAANO DADAIGIN ANG POOT

2 | Huwag Maghiganti

Turo ng Bibliya:

“Huwag gumanti kaninuman ng masama para sa masama. . . . Kung posible, hangga’t nakadepende sa inyo, makipagpayapaan kayo sa lahat ng tao. Huwag ninyong ipaghiganti ang inyong sarili, . . . dahil nasusulat: ‘“Akin ang paghihiganti; ako ang gaganti,” sabi ni Jehova.’”—ROMA 12:17-19.

Ang Ibig Sabihin:

Normal lang na magalit tayo kapag nagawan tayo ng mali. Pero ayaw ng Diyos na maghiganti tayo. Gusto niyang hintayin natin siya kasi malapit na niyang ituwid ang lahat ng mali.—Awit 37:7, 10.

Ang Puwede Mong Gawin:

Kapag naghihiganti ang di-perpektong mga tao, lalong tumitindi ang poot. Kaya kung may nakasakit sa iyo, huwag kang gumanti. Subukang kontrolin ang emosyon mo, at maging mapagpayapa. Sa ilang sitwasyon, baka mas makakabuting kalimutan na lang ang nangyari. (Kawikaan 19:11) Siyempre, may mga panahong kailangan mong ireport kung ano ang nangyari. Halimbawa, kung biktima ka ng krimen, puwede kang lumapit sa mga pulis o iba pang nasa awtoridad.

Kung maghihiganti ka, ikaw rin ang talo!

Paano kung ginawa mo na ang lahat at wala ka nang nakikitang solusyon para lutasin ang problema sa mapayapang paraan? Huwag maghiganti kasi lalo lang lalala ang sitwasyon. Daigin ang poot. Magtiwala sa paraan ng Diyos sa paglutas sa mga problema. “Manalig ka sa kaniya, at siya ang kikilos para sa iyo.”—Awit 37:3-5.

Karanasan—ADRIÁN

Hindi Naghiganti

Noong tin-edyer si Adrián, punô siya ng galit, basagulero siya, at palagi siyang naghihiganti. Sinabi niya: “Madalas akong masangkot sa barilan, at ilang beses akong naiiwang duguan at nakahandusay sa kalye.”

Nakipag-aral ng Bibliya si Adrián noong 16 siya. Sinabi niya: “Sa patuloy kong pag-aaral ng Bibliya, nakita kong dapat kong baguhin ang aking personalidad.” Kinailangan niyang daigin ang poot at huwag maging marahas. Nakatulong sa kaniya ang binanggit sa Roma 12:17-19 na huwag maghiganti. Sinabi niya: “Naunawaan kong si Jehova ang mag-aalis ng kawalang-katarungan sa kaniyang takdang panahon at paraan. Unti-unti kong napagtagumpayan ang aking pagiging marahas.”

Isang gabi, sinugod si Adrián ng isang grupo ng mga kabataang dati nilang kalaban. Sumigaw ang lider ng gang na iyon: “Lumaban ka!” Sinabi ni Adrián: “Gustong-gusto ko nang lumaban.” Imbes na gumanti, nanalangin siya kay Jehova at umalis na lang.

Sinabi pa ni Adrián: “Kinabukasan, nakasalubong ko ulit ang lider ng grupo at nag-iisa siya. Kumulo ang dugo ko at gusto ko sanang gumanti. Pero nanalangin ulit ako kay Jehova na sana’y makapagpigil ako. Nagulat ako nang lumapit siya at nagsabi: ‘Pasensiya ka na sa nangyari kagabi. Ang totoo, gusto ko sanang maging gaya mo. Gusto ko ring mag-aral ng Bibliya.’ Buti na lang at nakontrol ko ang galit ko! Dahil doon, magkasama na kaming nag-aral ng Bibliya.”