TANONG NG MGA KABATAAN

Dapat Ba Akong Magpabautismo?—Bahagi 1: Ang Kahulugan ng Bautismo

Taon-taon, maraming kabataang pinalaki sa pamilyang Saksi ang nababautismuhan. Pinag-iisipan mo na bang magpabautismo? Kung oo, kailangan mo munang maintindihan ang kahulugan ng pag-aalay at bautismo.

Ano ang bautismo?

Sa Bibliya, ang bautismo ay ang lubusang paglulubog sa tubig—hindi lang basta pagwiwisik nito—at napakahalaga ng kahulugan nito.

Sa paglubog sa iyo sa tubig sa panahon ng bautismo, ipinapakita mo sa iba na hindi ka na mabubuhay para lang gawin ang gusto mo.
Sa pag-ahon sa iyo sa tubig, ipinapakita mo na mamumuhay ka na sa paraang gusto ng Diyos.

Kapag nagpabautismo ka, ipinapakita mo sa lahat na kinikilala mong si Jehova ang may awtoridad na magtakda ng pamantayan ng tama at mali at na nangako kang lagi mong gagawin ang gusto niya.

Pag-isipan: Bakit mo gugustuhing sumunod kay Jehova sa buong buhay mo? Tingnan ang 1 Juan 4:19 at Apocalipsis 4:11.

Ano ang pag-aalay?

Bago ka magpabautismo, kailangan mo munang ialay ang sarili mo kay Jehova. Paano?

Sa personal mong panalangin, ipapangako mo kay Jehova na paglilingkuran mo siya magpakailanman at na gagawin mo ang gusto niya anuman ang mangyari o gawin ng iba.

Kapag nagpabautismo ka, ipinapakita mo sa iba na nakapag-alay ka na. Ipinapakita rin nito na si Jehova na ang nagmamay-ari sa iyo, hindi na ang sarili mo.—Mateo 16:24.

Pag-isipan: Bakit mapapabuti ka kung si Jehova na ang nagmamay-ari sa iyo? Tingnan ang Isaias 48:17, 18 at Hebreo 11:6.

Bakit mahalaga ang bautismo?

Sinabi ni Jesus na dapat magpabautismo ang mga gustong maging alagad niya. (Mateo 28:19, 20) Kaya kahilingan pa rin ang bautismo para sa mga Kristiyano. Ang totoo, sinasabi ng Bibliya na kailangan ito para maligtas.—1 Pedro 3:21.

Pero dapat na ang motibo mo sa pagpapabautismo ay dahil mahal mo si Jehova at mahalaga sa iyo ang kaugnayan mo sa kaniya. Dapat na ang saloobin mo ay katulad ng sa salmista, na nagsabi: “Ano ang igaganti ko kay Jehova sa lahat ng kabutihang ginawa niya sa akin? . . Tatawag ako sa pangalan ni Jehova. Tutuparin ko ang mga panata ko kay Jehova.”—Awit 116:12-14.

Pag-isipan: Anong kabutihan ang ginawa sa iyo ni Jehova, at paano mo iyon gagantihan? Tingnan ang Deuteronomio 10:12, 13 at Roma 12:1.

Mga maling akala at ang totoo

MALING AKALA — Mga adulto lang ang puwedeng magpabautismo.

ANG TOTOO— Hindi sukatan ang edad sa pagpapabautismo, kundi nasusukat ito sa pag-ibig ng isa kay Jehova at sa kagustuhan niyang sundin Siya. Halimbawa, nakapaglingkod sa Diyos sina Jose, Samuel, at Josias kahit noong bata pa sila. Ganiyan din ang ginagawa ng maraming kabataan sa ngayon.

Sinasabi ng Bibliya: “Kahit bata ay makikilala sa kilos niya, kung ang ugali niya ay malinis at matuwid.”—Kawikaan 20:11.

MALING AKALA — Kung nagpapabautismo na ang mga kaibigan mo, dapat magpabautismo ka na rin.

ANG TOTOO — Personal na desisyon ang pag-aalay at pagpapabautismo, at gagawin mo iyon dahil iyon talaga ang gusto mo. Hindi mo ito gagawin dahil lang sa nagpapabautismo na ang mga kaedaran mo o dahil iniisip mo na ito ang inaasahan sa iyo ng iba.

Sinasabi ng Bibliya: “Kusang-loob na ihahandog ng bayan [ng Diyos] ang kanilang sarili.”—Awit 110:3.

MALING AKALA — Kung hindi ka pa bautisado, hindi ka mananagot sa mga ginagawa mo.

ANG TOTOO — Mananagot ka kay Jehova, hindi kapag nabautismuhan ka na, kundi kapag alam mo na ang tama at mali.

Sinasabi ng Bibliya: “Kung alam ng isang tao kung paano gawin ang tama pero hindi niya ito ginagawa, nagkakasala siya.”—Santiago 4:17.

TIP: Kung sa tingin mo, mabigat na pananagutan ang mag-alay at magpabautismo, bakit hindi suriin ang sarili mo at tingnan kung paano mo madadaig ang takot? Makakatulong sa iyo ang Kabanata 3 ng aklat na Ang mga Tanong ng mga Kabataan—Mga Sagot na Lumulutas, Tomo 2.