KAPAG naatasang magbigay ng isang pahayag, pinaghihirapan ng marami na isulat ito nang buo, mula sa pambungad hanggang sa konklusyon. Bago matapos ang pahayag, marahil ay napakarami nang burador ang nagawa. Ang proseso ay maaaring gumugol ng mga oras.

Ganito ba ang paraan mo sa paghahanda ng iyong mga pahayag? Nais mo bang matutuhan ang mas madaling paraan? Kapag natutuhan mo kung paano maghahanda ng isang balangkas, hindi mo na kailangang isulat pa ang lahat-lahat. Ito’y magbibigay sa iyo ng higit na panahon upang insayuhin ang pagpapahayag. Ang iyong mga presentasyon ay hindi lamang magiging mas madaling ibigay kundi magiging higit na kawili-wiling pakinggan at higit na gaganyak sa iyong tagapakinig.

Mangyari pa, para sa mga pahayag pangmadlang ibinibigay sa kongregasyon, isang saligang balangkas ang inilalaan. Gayunman, hindi ganito ang kaso para sa karamihan ng iba pang mga pahayag. Maaaring atasan ka lamang ng isang paksa o ng isang tema. O marahil ay hilingan kang kubrehan ang espesipikong nakalathalang materyal. Kung minsan ikaw ay bibigyan lamang ng ilang tagubilin. Para sa lahat ng gayong mga atas, kakailanganin mong maghanda ng iyong sariling balangkas.

Ang sampol sa pahina 41 ay magbibigay sa iyo ng ideya kung paano maisasaayos ang isang maikling balangkas. Pansinin na ang bawat pangunahing punto ay nagsisimula sa kaliwang mardyin at ito’y nakasulat sa malalaking titik. Sa ilalim ng bawat pangunahing punto ay nakalista ang mga ideya na sumusuporta rito. Ang mga karagdagang punto na gagamitin upang mabuo ang mga ideyang iyon ay nakalista sa ilalim ng mga ito at nakapasok ng ilang espasyo mula sa kaliwang mardyin. Suriing maingat ang balangkas na ito. Pansinin na ang dalawang pangunahing punto ay tuwirang kaugnay ng tema. Pansinin din na ang mga pangalawahing punto ay hindi lamang basta mga kawili-wiling bagay. Sa halip, ang bawat isa ay sumusuporta sa pangunahing punto na lumilitaw sa itaas nito.

Kapag naghahanda ka ng isang balangkas, maaaring hindi ito maging kagayang-kagaya ng sampol. Subalit kapag naunawaan mo ang mga simulaing nasasangkot, ang mga ito’y makatutulong sa iyo na maorganisa ang iyong materyal at maihanda ang isang mabuting pahayag sa isang makatuwirang haba ng panahon. Paano mo gagawin ito?

Magsuri, Pumili, at Mag-organisa

Kailangan mo ang isang tema. Ang iyong tema ay hindi basta isang pangkalahatang paksa na maaaring buuin sa isang salita lamang. Ito ang pangunahing ideya na nais mong itawid, at ito’y nagpapahiwatig kung sa anong anggulo binabalak mong talakayin ang iyong paksa. Kung ang isang tema ay iniatas, suriing maingat ang bawat pangunahing salita. Kung bubuuin mo ang iniatas na tema salig sa nakalathalang materyal, pag-aralan ang materyal na iyon taglay sa isip ang tema. Kung naatasan ka ng isang paksa lamang, kung gayon, bahala ka nang pumili ng tema. Gayunman, bago gawin ito, makatutulong sa iyo na gumawa ng ilang pagsasaliksik. Sa pagpapanatiling bukas ng iyong isip, madalas na makakukuha ka ng mga bagong ideya.

Habang ginagawa mo ang mga hakbanging ito, patuloy mong tanungin ang iyong sarili: ‘Bakit mahalaga ang materyal na ito sa aking tagapakinig? Ano ang aking tunguhin?’ Dapat na ito’y hindi lamang upang makubrehan ang materyal o makapagbigay ng isang makulay na pahayag kundi upang makapaglaan ng materyal na magiging kapaki-pakinabang para sa iyong tagapakinig. Kapag nabuo na ang iyong tunguhin, isulat ito. Lagi mo itong isasaisip habang naghahanda ka.

Pagkatapos mong matiyak kung ano ang iyong tunguhin at makapili ng isang temang kaayon nito (o masuri kung paano naaangkop ang atas na tema sa tunguhing iyon), magiging mas tukuy na tukoy ang iyong pagsasaliksik. Humanap ng materyal na may partikular na kapakinabangan sa iyong tagapakinig. Huwag maging kontento sa mga bagay na kapit sa pangkalahatan, kundi humanap ng mga espesipikong punto na makapagtuturo at talagang makatutulong. Maging makatuwiran sa dami ng ginagawa mong pagsasaliksik. Kalimitan nang madali kang magkaroon ng mas maraming materyal kaysa sa magagamit mo, kaya kakailanganin mong maging mapamili.

Alamin ang mga pangunahing punto na kailangan mong talakayin upang mabuo ang iyong tema at maabot ang iyong tunguhin. Ito ang magiging iyong batayan, ang iyong saligang balangkas. Gaano karaming pangunahing punto ang nararapat talakayin? Marahil ang dalawa ay sapat na para sa maikling pagtalakay, at kadalasang ang lima ay sapat na maging sa isang oras na diskurso. Mas kakaunti ang mga pangunahing punto, mas malamang na matandaan ng iyong tagapakinig ang mga ito.

Minsang ang iyong tema at ang mga pangunahing punto ay nasa isip na, organisahin mo na ang iyong sinaliksik na materyal. Pagpasiyahan kung ano ang tuwirang kaugnay ng iyong mga pangunahing punto. Piliin ang mga detalye na makapagdaragdag ng bagong mga punto sa iyong presentasyon. Sa pagpili mo ng mga kasulatan upang sumuporta sa mga pangunahing punto, bigyang pansin ang mga ideya na makatutulong sa iyo na makapangatuwiran sa mga tekstong iyon sa isang makabuluhang paraan. Ilagay ang bawat bagay sa ilalim ng pangunahing punto na kinabibilangan nito. Kung ang ilang impormasyon ay hindi angkop sa alinman sa iyong mga pangunahing punto, alisin ito​—kahit na ito ay kapana-panabik​—o ilagay ito sa isang salansan para magamit sa ibang pagkakataon. Ingatan lamang ang pinakamahusay na materyal. Kapag napakarami ang sinisikap mong kubrehan, kakailanganin mong magsalita nang masyadong mabilis at ang iyong pagkubre ay magiging mababaw lamang. Mas mabuting magtawid ng iilang punto na may tunay na kahalagahan sa tagapakinig at pagbutihin iyon. Huwag kang lalampas sa oras.

Kung hindi mo pa nagagawa ito, ayusin ngayon ang iyong materyal sa lohikal na pagkakasunud-sunod. Ginawa ito ng manunulat ng Ebanghelyo na si Lucas. Pagkatapos na makapagtipon ng maraming patotoo hinggil sa kaniyang paksa, inihanay niya ang mga ito sa “lohikal na pagkakasunud-sunod.” (Luc. 1:3) Maaari mong isaayos ang iyong materyal ayon sa kronolohiya o ayon sa tema, marahil ay alinsunod sa sanhi at epekto o problema at solusyon, depende sa kung ano ang pinakamabisa upang maabot ang iyong tunguhin. Hindi dapat magkaroon ng biglaang paglipat mula sa isang ideya tungo sa iba. Dapat na akaying mabuti ang mga tagapakinig mula sa isang kaisipan tungo sa iba, na walang patlang na mahirap pag-ugnayin. Ang iniharap na ebidensiya ay dapat na umakay sa tagapakinig tungo sa lohikal na mga konklusyon. Habang isinasaayos mo ang iyong mga punto, isipin kung ano ang magiging datíng ng presentasyon sa iyong tagapakinig. Madali ba nilang masusubaybayan ang iyong ideya? Maaantig ba silang kumilos salig sa kanilang napakinggan, kasuwato ng tunguhin na nasa iyong isipan?

Pagkatapos, maghanda ng isang pambungad na pupukaw ng interes para sa iyong paksa at magpapakita sa iyong tagapakinig na ang tatalakayin mo ay may tunay na kahalagahan sa kanila. Makatutulong kung isusulat mo ang ilan sa iyong unang mga pangungusap. Sa katapusan, planuhin ang isang gumaganyak na konklusyon na kaayon ng iyong tunguhin.

Kung maaga mong ihahanda ang iyong balangkas, magkakaroon ka ng panahon upang pinuhin ito bago mo ibigay ang pahayag. Maaari mong makita ang pangangailangang suportahan ang ilang ideya sa pamamagitan ng ilang estadistika, isang ilustrasyon, o isang karanasan. Ang paggamit ng kasalukuyang pangyayari o ilang bagay na kapana-panabik sa komunidad ay maaaring makatulong sa iyong tagapakinig na makita agad ang kahalagahan ng materyal. Habang nirerepaso mo ang iyong pahayag, maaaring makita mo ang higit pang paraan para maibagay ang impormasyon sa iyong tagapakinig. Ang proseso ng pagsusuri at pagpipino ay mahalaga sa pagsasaayos ng mabuting materyal upang maging isang mabisang pahayag.

Ang ilang tagapagsalita ay maaaring mangailangan ng mas detalyadong nota kaysa sa iba. Subalit kung oorganisahin mo ang iyong materyal sa ilalim lamang ng ilang pangunahing punto, aalisin kung ano ang hindi talaga makatutulong sa mga ito, at ilalagay ang iyong mga ideya sa lohikal na pagkakasunud-sunod, masusumpungan mo na sa kaunting pagsasanay, hindi mo na kakailanganing isulat pa ang lahat-lahat. Kaylaki ngang panahon ang matitipid nito! At ang kalidad ng iyong mga pahayag ay susulong. Makikitang maliwanag na ikaw ay tunay na nakikinabang sa edukasyong nakukuha mo mula sa Paaralang Teokratiko Ukol sa Ministeryo.

SA BAWAT atas sa paaralan ay may pagkakataong sumulong. Taimtim kang magsikap, at unti-unting mahahayag ang iyong pagsulong kapuwa sa iyo at sa iba. (1 Tim. 4:15) Ang paaralan ay tutulong sa iyo na lubusang mapasulong ang iyong mga kakayahan.

Ikaw ba’y ninenerbiyos na magsalita sa harap ng kongregasyon? Ito ay normal, kahit nakatala ka na sa paaralan sa mahaba-habang panahon. Gayunman, may ilang bagay na makatutulong sa iyo upang mabawasan ang antas ng iyong pagkabalisa. Sa tahanan, gawing kaugalian na laging magbasa nang malakas. Sa mga pulong ng kongregasyon, magkomento nang madalas, at kung ikaw ay isang mamamahayag, makibahagi nang regular sa paglilingkod sa larangan. Ito ay magbibigay sa iyo ng karanasan sa pagsasalita sa harap ng iba. Karagdagan pa, ihandang mabuti nang patiuna ang iyong mga atas bilang estudyante, at insayuhin nang malakas ang pagpapahayag ng mga ito. Tandaan na ikaw ay magsasalita sa harap ng palakaibigang tagapakinig. Bago magbigay ng anumang pahayag, manalangin kay Jehova. Malugod niyang ipinagkakaloob ang banal na espiritu sa kaniyang mga lingkod na humihiling sa kaniya.​— Luc. 11:13; Fil. 4:​6, 7.

Maging makatuwiran sa iyong mga inaasahan. Kailangan ang panahon upang magtamo ng karanasan bilang isang tagapagsalita at upang maging isang mabisang guro. (Mik. 6:8) Kung ikaw ay bagong nagpatala sa paaralan, huwag umasa na makapagbibigay ka kaagad ng isang napakahusay na presentasyon. Sa halip, pasulungin ang bawat punto ng payo sa pagsasalita nang isa-isa. Pag-aralan ang seksiyon sa aklat na ito na tumatalakay nito. Kung maaari, gawin ang pagsasanay na iminungkahi roon. Ito’y magbibigay sa iyo ng karanasan sa mga bagay na may kaugnayan sa puntong ipinapayo bago mo gampanan ang iyong atas sa kongregasyon. Darating din ang pagsulong.

Kung Paano Maghahanda ng Isang Atas sa Pagbabasa

Ang paghahanda para sa pangmadlang pagbabasa ay sumasaklaw nang higit pa kaysa sa basta pagbigkas lamang ng mga salita sa iniatas na materyal. Pagsikapang magkaroon ng isang malinaw na unawa sa kahulugan ng materyal. Kapag natanggap mo ang iyong atas, basahin ito taglay sa isip ang tunguhing iyon. Sikaping unawain ang punto ng bawat pangungusap at ang ideya na nabubuo sa bawat parapo upang iyong maitawid ang mga ideya nang tumpak at may angkop na damdamin. Kung posible, tingnan ang diksiyunaryo para sa wastong pagbigkas ng di-pamilyar na mga salita. Alaming mabuti ang materyal. Kakailanganing tulungan ng mga magulang ang kanilang maliliit na anak na gawin ito.

Naatasan ka na bang bumasa ng isang bahagi ng Bibliya o marahil ay ng mga parapo sa isang artikulo ng Ang Bantayan? Kung may mga audiocassette ng materyal na iyon sa iyong wika, malaki ang maitutulong kung pakikinggan ang pagbasa at papansinin ang mga salik gaya ng pagbigkas, paghintu-hinto, pagdiriin, at pagbabagu-bago ng tinig. Pagkatapos ay sikaping gamitin ang mga katangiang ito sa iyong sariling pagbabasa.

Kapag pinasisimulan mo nang ihanda ang iyong atas, tiyaking pag-aralang mabuti ang leksiyon na tumatalakay sa katangian ng pagsasalita na iniatas sa iyo. Kung posible, repasuhin ito pagkatapos mong insayuhin ang malakas na pagbabasa nang ilang ulit sa iniatas na materyal. Pagsikapang ikapit nang lubusan ang nakasulat na payong iyon hangga’t maaari.

Ang pagsasanay na ito ay makatutulong nang malaki sa iyo para sa iyong ministeryo. Habang naglilingkod ka sa larangan, marami kang pagkakataong bumasa sa iba. Yamang ang Salita ng Diyos ay may kapangyarihang bumago sa buhay ng mga tao, mahalaga na basahin mo ito nang mabuti. (Heb. 4:12) Huwag mong asahan na magiging dalubhasa ka sa lahat ng aspekto ng mabisang pagbabasa sa loob lamang ng isa o dalawang atas. Sa isang Kristiyanong matanda na maraming taon na ang karanasan, sumulat ang apostol na si Pablo: “Magsikap ka sa pangmadlang pagbabasa.”​—1 Tim. 4:13.

Paghahanda ng Isang Paksa at Isang Tagpo

Kapag tumanggap ka ng isang atas sa paaralan na nagsasangkot sa paggamit ng isang tagpo, paano mo ito gagawin?

Tatlong pangunahing bagay ang kailangang isaalang-alang: (1) ang paksang iniatas sa iyo, (2) ang iyong tagpo at ang tao na iyong kakausapin, at (3) ang puntong ipinapayo na iniatas sa iyo upang pasulungin.

Kailangan mong magtipon ng materyal para sa paksang iniatas sa iyo. Subalit bago mo puspusang gawin ito, pag-isipang mabuti ang iyong tagpo at pati na ang tao na iyong kakausapin, yamang ang mga salik na ito ay magkakaroon ng kaugnayan sa uri ng materyal na iyong sasaklawin at sa paraan ng iyong paghaharap nito. Anong tagpo ang gagamitin mo? Ang iyo bang itatanghal ay kung paano ihaharap ang mabuting balita sa isang kakilala mo? O ipakikita mo ba kung ano ang maaaring mangyari sa pakikipag-usap sa isang indibiduwal sa unang pagkakataon? Ang tao ba ay mas matanda o mas bata kaysa sa iyo? Anong saloobin ang maaaring taglay niya hinggil sa paksang pinaplano mong talakayin? Gaano karami kaya ang nalalaman na niya tungkol dito? Ano ang tunguhing inaasahan mong maabot bilang resulta ng inyong pag-uusap? Ang mga sagot sa mga tanong na ito ay magbibigay ng mahahalagang giya na magagamit mo sa paghahanda.

Saan mo masusumpungan ang materyal sa iniatas na paksa? Sa pahina 33 hanggang 38 ng aklat na ito, may pagtalakay sa “Kung Paano Gagawin ang Pagsasaliksik.” Basahin ito, at pagkatapos ay gamitin ang makukuha mong mga kasangkapan sa pagsasaliksik. Sa maraming kaso ay madali kang makasusumpong ng mas maraming materyal kaysa sa magagamit mo. Magbasa ng sapat upang matiyak kung gaano karaming impormasyon ang makukuha mo. Gayunman, habang ginagawa mo iyan, ingatan sa isip ang tagpo na gagamitin mo sa iyong presentasyon at pati na ang tao na iyong kakausapin. Markahan ang mga punto na angkop na gamitin.

Bago mo organisahin ang iyong presentasyon at gawin ang panghuling pagpili ng mga detalye, maglaan ng panahon upang basahin ang materyal na tumatalakay sa puntong ipinapayo na iniatas sa iyo. Ang pagkakapit sa payong iyan ang isa sa mga pangunahing dahilan ng iyong atas.

Kung sasaklawin mo ang iyong materyal sa itinakdang oras, masisiyahan ka sa pagbibigay mo ng iyong konklusyon, yamang may hudyat na ibibigay kapag naubos na ang iniatas na oras. Gayunman, sa ating ministeryo sa larangan, ang oras ay hindi laging nagiging isang salik. Kaya habang naghahanda ka, isaalang-alang ang dami ng panahong magagamit, subalit bigyan ng pantanging pansin ang mabisang pagtuturo.

Isang Paalaala Hinggil sa mga Tagpo. Suriin ang mga mungkahi sa pahina 82, at piliin ang isa na magiging praktikal sa iyong ministeryo at na magpapahintulot sa iyo na gamitin ang iniatas na materyal sa makatotohanang paraan. Kung nakatala ka na sa paaralan nang mahaba-habang panahon, malasin ito bilang isang pagkakataon upang gumawa ng pagsulong at magkaroon ng karagdagang kasanayan sa iyong ministeryo.

Kung ang tagpo ay iniaatas ng tagapangasiwa sa Paaralang Teokratiko Ukol sa Ministeryo, tanggapin ang hamon. Ang karamihan sa mga tagpo ay hinggil sa pagpapatotoo. Kung hindi ka pa nakapagpapatotoo sa ilalim ng inilarawang mga kalagayan, kumuha ng mga ideya sa pamamagitan ng pakikipag-usap sa mga mamamahayag na nakaranas na nito. Hangga’t maaari, pagsikapang talakayin ang paksang iniatas sa iyo sa isang tagpo na katulad ng gagamitin mo sa paaralan. Ito’y tutulong sa iyo na maabot ang mahalagang tunguhin ng iyong pagsasanay.

Kapag ang Presentasyon ay Gagawin sa Anyong Pahayag

Kung ikaw ay isang lalaki, maaaring atasan kang magharap ng isang maikling pahayag sa kongregasyon. Sa paghahanda ng mga pahayag na ito, ang mga pangunahing punto na kailangang isaalang-alang ay katulad ng mga nakalista na para sa mga atas ng estudyante sa anyong pagtatanghal. Ang malaking pagkakaiba ay ang tagapakinig at ang paraan ng presentasyon.

Sa pangkalahatan ay kanais-nais na ihanda ang iyong materyal upang makinabang mula rito ang bawat isa sa mga tagapakinig. Ang karamihan sa mga naroroon ay may alam na sa saligang mga katotohanan sa Bibliya. Maaaring may lubos na kabatiran na sila sa paksang iniatas sa iyo upang ipahayag. Isaalang-alang kung ano na ang kanilang nalalaman hinggil sa iyong paksa. Mag-isip ng paraan upang makinabang sila sa iyong presentasyon. Itanong mo sa sarili: ‘Paano ko magagamit ang aking paksa upang mapalalim ang pagpapahalaga ko at niyaong sa aking tagapakinig para kay Jehova bilang isang persona? Ano ang nasa materyal na makatutulong sa amin upang maunawaan ang kalooban ng Diyos? Paano makatutulong sa amin ang materyal na ito upang makagawa ng mabubuting pagpapasiya sa gitna ng isang sanlibutang napangingibabawan ng makalamang mga pagnanasa?’ (Efe. 2:3) Ang kasiya-siyang mga sagot sa mga tanong na ito ay humihiling ng pagsasaliksik. Kapag ginagamit ang Bibliya, sikaping gumawa ng higit pa kaysa sa basta pagbasa lamang ng mga teksto. Mangatuwiran sa mga kasulatang ginagamit mo, at ipakita kung paanong ang mga ito ay naglalaan ng saligan para sa paggawa ng mga konklusyon. (Gawa 17:​2, 3) Huwag tangkaing saklawin ang masyadong maraming bagay. Iharap ang iyong materyal sa paraang madali itong matandaan.

Dapat na kalakip din sa paghahanda ang pagbibigay-pansin sa iyong paraan ng pagpapahayag. Huwag mamaliitin ito. Insayuhin ang pagbibigay ng iyong pahayag sa malakas na tinig. Ang pagsisikap mo sa pag-aaral at pagkakapit ng payo sa iba’t ibang katangian ng pagsasalita ay makaaabuloy nang malaki sa iyong pagsulong. Maging ikaw man ay isang baguhang tagapagsalita o makaranasan na, maghandang mabuti upang makapagsalita ka nang may pananalig at damdamin na angkop sa iyong materyal. Habang isinasagawa mo ang bawat atas sa paaralan, ingatan sa isip ang tunguhin na gamitin ang iyong bigay-Diyos na kaloob ng pagsasalita upang parangalan si Jehova.​—Awit 150:6.

ANG programa ng Paaralang Teokratiko Ukol sa Ministeryo ay inihahanda sa kapakinabangan ng buong kongregasyon. Ang mahahalagang impormasyon ay inihaharap din sa iba pang mga pulong ng kongregasyon at gayundin sa mga asamblea at mga kombensiyon. Kung ikaw ay inatasan ng isang bahagi sa mga programang ito, ikaw ay binigyan ng isang mabigat na pananagutan. Hinimok ni apostol Pablo ang Kristiyanong tagapangasiwa na si Timoteo na laging magbigay ng pansin sa kaniyang turo. (1 Tim. 4:16) Yaong mga naroroon sa Kristiyanong mga pagtitipon ay naglaan ng mahalagang panahon​—at ang ilan ay gumawa ng malaking pagsisikap​—na dumalo upang tumanggap ng instruksiyon sa mga bagay na may kaugnayan sa kanilang relasyon sa Diyos. Ang pagbibigay ng gayong instruksiyon ay tunay na isang malaking pribilehiyo! Paano mo iyon maisasagawang mabuti?

Mga Tampok na Bahagi Mula sa Pagbabasa sa Bibliya

Ang bahaging ito ng paaralan ay batay sa pagbabasa sa Bibliya na iniatas para sa isang linggo. Dapat na idiin kung paanong ang materyal ay makaaapekto sa atin ngayon. Gaya ng iniulat sa Nehemias 8:​8, si Ezra at ang kaniyang mga kasama ay hayagang bumabasa mula sa Salita ng Diyos, na ipinaliliwanag iyon, “binibigyan iyon ng kahulugan,” at ipinauunawa. Ang pagganap mo sa mga tampok na bahagi ng Bibliya ay nagbibigay sa iyo ng pagkakataong gawin din ang gayon.

Paano mo ihahanda ang gayong atas? Kung posible, basahin ang iniatas na bahagi ng Bibliya nang isang linggo o higit pa ang kaagahan. Pagkatapos ay isipin ang tungkol sa iyong kongregasyon at ang mga pangangailangan nito. Ipanalangin ito. Anong payo, anong mga halimbawa, anong mga simulain sa bahaging ito ng Salita ng Diyos ang makatutugon sa gayong mga pangangailangan?

Mahalaga ang pagsasaliksik. Mayroon bang indise sa katapusan ng taon sa Ang Bantayan sa inyong wika? Kung mayroon, gamiting mabuti ito. Sa pamamagitan ng pagsasaliksik sa nakalathalang impormasyon tungkol sa mga talata na pinili mong pagtuunan ng pansin, maaaring makasumpong ka ng nagbibigay-liwanag na karagdagang materyal, mga paliwanag hinggil sa katuparan ng mga hula, mga pagsusuri sa kung ano ang isinisiwalat ng ilang teksto tungkol kay Jehova, o mga pagtalakay sa mga simulain. Huwag sikaping saklawin ang napakaraming punto. Magtuon ng pansin sa ilan lamang piniling mga talata. Mas mabuting saklawin ang ilan lamang talata at isagawa iyon nang mabuti.

Ang iyong atas ay maaaring humiling din ng pag-aanyaya sa tagapakinig na magkomento kung paano sila nakinabang mula sa pagbabasa sa Bibliya sa linggong iyon. Ano ang kanilang nasumpungan na pakikinabangan nila sa kanilang personal at pampamilyang pag-aaral o sa kanilang ministeryo o paraan ng pamumuhay? Anong mga katangian ni Jehova ang nahayag sa kaniyang pakikitungo sa mga tao at sa mga bansa? Ano ang natutuhan ng tagapakinig na nagpalakas sa kanilang pananampalataya at nagpatibay sa kanilang pagpapahalaga kay Jehova? Huwag masyadong gugulan ng panahon ang mga detalyado at komplikadong punto. Idiin ang kahulugan at praktikal na kahalagahan ng mga napiling punto.

Pahayag na Nagtuturo

Ito ay salig sa inilathalang materyal, tulad ng isang artikulo sa Ang Bantayan o Gumising! o kaya’y sa isang bahagi ng isang aklat. Sa maraming kaso, napakarami ng materyal para sa itinakdang oras. Paano mo isasagawa ang atas? Bilang isang guro, hindi bilang isa na sumasaklaw lamang ng materyal. Ang isang tagapangasiwa ay dapat na “kuwalipikadong magturo.”​—1 Tim. 3:2.

Pasimulan ang iyong paghahanda sa pamamagitan ng pag-aaral sa iniatas na materyal. Hanapin ang mga kasulatan. Magbulay-bulay. Pagsikapang gawin iyon nang maaga bago ang petsa ng iyong pahayag. Tandaan na pinasisigla ang mga kapatid na patiunang basahin ang inilathalang materyal na siyang saligan ng pahayag. Ang iyong atas ay hindi lamang upang repasuhin o paikliin ito kundi upang ipakita kung paano ikakapit ito. Gamitin ang angkop na mga bahagi ng materyal sa paraang tunay na pakikinabangan ng kongregasyon.

Kung paanong ang bawat bata ay may sariling personalidad, ang bawat kongregasyon ay may namumukod na mga katangian. Ang magulang na mabisang nagtuturo ay hindi lamang basta nagkukuwento ng mga alituntunin sa moral sa kaniyang anak. Gumagamit siya ng pangangatuwiran sa bata. Isinasaalang-alang niya ang personalidad ng bata at ang mga suliraning kinakaharap ng bata. Sa katulad na paraan, pinagsisikapan ng mga guro sa kongregasyon na maunawaan at matugunan ang mga pangangailangan ng grupong kaniyang pinagsasalitaan. Gayunman, ang isang gurong may unawa ay iiwas sa paggamit ng mga halimbawa na magdudulot ng kahihiyan sa sinumang nakikinig. Ipakikita niya ang mga kapakinabangang tinatamasa bilang resulta ng paglakad sa daan ni Jehova at itatampok ang payo mula sa Kasulatan na makatutulong sa kongregasyon na mapagtagumpayan ang mga suliraning napapaharap sa kanila.

Ang mabuting pagtuturo ay nakasasaling sa puso ng tagapakinig. Kailangan nito hindi ang basta pagsasabi lamang ng mga katotohanan kundi ang pagpapatibay rin ng pagpapahalaga sa kung ano ang tinutukoy ng mga ito. Kailangan nito ang tunay na pagkabahala sa mga tinuturuan. Dapat na makilala ng espirituwal na mga pastol ang kawan. Kapag maibigin nilang isinasaisip ang mga suliranin na kinakaharap ng iba’t ibang miyembro, sila’y makapagsasalita nang nakapagpapatibay-loob, na nagpapakita ng kaunawaan, habag, at empatiya.

Gaya ng alam ng mabibisang guro, ang isang pahayag ay dapat na may maliwanag na tunguhin. Ang materyal ay dapat na iharap sa paraan na ang mga susing punto ay mapalilitaw at matatandaan. Dapat na matandaan ng tagapakinig ang praktikal na mga ideya na makaaapekto sa kanilang buhay.

Pulong sa Paglilingkod

Kapag nagbibigay ka ng isang pahayag salig sa isang artikulo sa Ating Ministeryo sa Kaharian, ang hamon ay medyo naiiba. Dito ay masusumpungan mo na kalimitang inaatasan ka upang lubusang itawid sa tagapakinig kung ano ang nasa inilaang reperensiya, hindi upang piliin kung ano ang pinakanaaangkop. Tulungan ang tagapakinig na mangatuwiran sa mga kasulatan na siyang saligan ng anumang ibinigay na payo. (Tito 1:9) Limitado lamang ang panahon, na sa karamihang kaso ay hindi nagpapahintulot para sa karagdagang materyal.

Sa kabilang panig, maaaring atasan kang magharap ng materyal na ang artikulo ay hindi lumilitaw sa Ating Ministeryo sa Kaharian. Ang reperensiya ay maaaring makuha sa isang artikulo ng Bantayan, o ang atas ay maaaring binubuo lamang ng ilang maiikling nota. Bahala ka bilang isang guro na magsaalang-alang sa mga pangangailangan ng kongregasyon may kinalaman sa iniatas na materyal. Baka kakailanganin mong gumamit ng isang maikli, tuwirang ilustrasyon o maglahad ng isang angkop na karanasan. Tandaan na ang iyong atas ay hindi lamang upang magsalita hinggil sa paksa kundi upang gampanan ito sa paraang makatutulong sa kongregasyon sa pagsasagawa ng gawaing itinakda ng Salita ng Diyos at upang makasumpong ng kagalakan sa pagsasagawa nito.​—Gawa 20:​20, 21.

Habang inihahanda mo ang iyong atas, isipin ang mga kalagayan ng mga bumubuo sa kongregasyon. Papurihan sila sa kung ano na ang kanilang ginagawa. Paanong ang pagkakapit ng mga mungkahing ibinigay sa atas na materyal ay makapagdaragdag sa kanilang kasanayan at kagalakan sa ministeryo?

Ang iyo bang atas ay humihiling ng isang pagtatanghal o ng isang panayam? Kung gayon, dapat na ito’y isaplanong mabuti nang patiuna. Baka matukso kang ipaubaya na lamang sa iba ang pag-aayos nito, subalit hindi ito laging nagdudulot ng pinakamabubuting resulta. Hangga’t maaari, insayuhin ang pagtatanghal o ang panayam bago ang araw ng pulong. Tiyaking ang parteng ito sa iyong bahagi ay magagampanan sa paraang tunay na magbibigay-buhay sa instruksiyong ibinibigay.

Mga Asamblea at mga Kombensiyon

Ang mga kapatid na nagkakaroon ng maiinam na katangiang espirituwal at nagiging mabibisang pangmadlang tagapagsalita at guro ay maaaring hilingang makibahagi sa programa sa isang asamblea o sa isang kombensiyon pagsapit ng panahon. Ang mga ito ay tunay na pantanging mga okasyon para sa teokratikong edukasyon. Ang gayong atas ay maaaring isang manuskrito, isang balangkas, mga instruksiyon para sa isang drama sa Bibliya na may makabagong-panahong aplikasyon, o isa lamang parapo ng mga instruksiyon. Kung ikaw ay nagkapribilehiyong maglingkod sa gayong programa, maingat na pag-aralan ang materyal na ibinigay sa iyo. Ulit-ulitin ito hanggang sa maunawaan mo ang kahalagahan nito.

Dapat basahin niyaong mga inatasan ng manuskritong pahayag ang materyal nang salita por salita. Hindi nila binabago ang mga salita o muling isinasaayos ang materyal. Pinag-aaralan nila ito upang maunawaang mabuti kung ano ang mga pangunahing punto at kung paano binuo ang mga ito. Nag-iinsayo sila sa pagbasa nang malakas hanggang sa maiharap nila ang pahayag taglay ang wastong pagdiriin ng diwa, kasiglahan, init, damdamin, alab, at kombiksiyon, pati na ang lakas ng tinig at tindi na angkop sa maraming tagapakinig.

Ang mga kapatid na inatasan ng isang balangkas na pahayag ay may pananagutang buuin ang kanilang materyal sa paraang lubusang kasuwato ng balangkas. Sa halip na basahin ang balangkas sa panahon ng pahayag o ihanda ito tulad ng manuskrito, dapat na iharap ng tagapagsalita ang materyal nang ekstemporanyo, mula sa puso. Mahalagang sundin ang itinakdang oras na nasa balangkas upang maiharap nang maliwanag ang bawat pangunahing punto. Dapat na gamiting mabuti ng tagapagsalita ang mga ideya at mga kasulatang nakalista sa ilalim ng mga pangunahing punto. Hindi siya dapat magpasok ng karagdagang mga puntong gusto niya anupat inaalis ang mga puntong nasa balangkas. Sabihin pa, ang saligan ng instruksiyon ay ang Salita ng Diyos. Ang pananagutan ng Kristiyanong matatanda ay ang ‘ipangaral ang salita.’ (2 Tim. 4:​1, 2) Kaya ang isang tagapagsalita ay dapat magbigay ng pantanging pansin sa mga kasulatan sa balangkas​—na nangangatuwiran sa mga ito at gumagawa ng pagkakapit ng mga ito.

Huwag Magpaliban

Ikaw ba ay naglilingkod sa isang kongregasyon kung saan marami ang pagkakataong makapagsalita? Paano mo mabibigyan ng sapat na atensiyon ang lahat ng ito? Iwasan na maghanda ng iyong mga bahagi sa huling sandali.

Ang mga pahayag na tunay na kapaki-pakinabang sa kongregasyon ay nangangailangan ng sapat na patiunang pag-iisip. Kaya, ugaliing basahin kaagad ang materyal pagkatanggap mo ng bawat atas. Ito’y magpapangyari na mabulay-bulay mo ito habang ginagawa mo ang iba pang mga gawain. Sa mga araw o mga linggo bago ang iyong pahayag, maaaring makarinig ka ng mga komento na tutulong sa iyo upang makita kung paano maikakapit na mabuti ang impormasyon. Maaaring lumitaw ang mga kalagayan na magpapakita ng pagiging napapanahon nito. Ang pagbabasa at pag-iisip ng iyong atas pagkatanggap mo nito ay nangangailangan ng panahon, subalit sulit naman ang panahong ginugol dito. Kapag sa dakong huli ay umupo ka upang buuin ang balangkas, aanihin mo ang mga kapakinabangan ng patiunang pag-iisip hinggil dito. Malaki ang mababawas na kaigtingan sa paghahanda ng mga atas sa ganitong paraan at makatutulong sa iyo na maiharap ang materyal sa paraang praktikal at umaabot sa puso ng mga nasa kongregasyon.

Depende sa laki ng iyong pagpapahalaga sa kaloob na ipinagkatiwala sa iyo may kaugnayan sa programa ng edukasyon ni Jehova para sa kaniyang bayan, mapararangalan mo siya at ikaw ay magiging isang pagpapala para sa mga umiibig sa kaniya.​—Isa. 54:13; Roma 12:6-8.

BAWAT linggo, ang karamihan sa mga kongregasyon ng mga Saksi ni Jehova ay nagsasaayos ng isang pangmadlang pahayag sa isang maka-Kasulatang paksa. Kung ikaw ay isang matanda o isang ministeryal na lingkod, nagpapakita ka ba ng katunayan ng pagiging isang mabisang tagapagpahayag sa madla, isang guro? Kung gayon, ikaw ay maaaring maanyayahang magbigay ng isang pahayag pangmadla. Ang Paaralang Teokratiko Ukol sa Ministeryo ay nakatulong sa sampu-sampung libong mga kapatid na lalaki na maging kuwalipikado sa pribilehiyong ito ng paglilingkod. Kapag naatasang magbigay ng isang pahayag pangmadla, saan ka dapat magsimula?

Pag-aralan ang Balangkas

Bago ka gumawa ng anumang pagsasaliksik, basahin muna ang balangkas at bulay-bulayin ito hanggang sa makuha mo ang diwa nito. Ipako ang iyong isip sa tema, na siyang pamagat ng pahayag. Ano ba ang ituturo mo sa iyong tagapakinig? Ano ang iyong tunguhin?

Maging pamilyar sa mga pangunahing uluhan. Suriin ang mga pangunahing puntong iyon. Paano umuugnay ang bawat isa sa tema? Sa ilalim ng bawat pangunahing punto, may nakalistang ilang pangalawahing punto. Ang mga puntong umaalalay sa mga pangalawahing punto ay nakalista sa ilalim ng mga ito. Isaalang-alang kung paanong ang bawat seksiyon ng balangkas ay sumasalig sa nauna rito, umaakay sa susunod, at tumutulong upang maisakatuparan ang tunguhin ng pahayag. Minsang maunawaan mo ang tema, ang tunguhin ng pahayag, at kung paano maisasakatuparan ng mga pangunahing punto ang layuning iyan, kung gayon ay handa ka nang magsimula sa pagbuo ng materyal.

Sa pasimula makatutulong na isipin mo na ang iyong pahayag ay apat o limang maiikling pahayag, na bawat isa ay may isang pangunahing punto. Ihanda ang mga ito nang isa-isa.

Ang balangkas na inilaan ay isang kasangkapan sa paghahanda. Hindi ito nilayong magsilbi bilang mga nota ng iyong pahayag. Ito ay parang isang kalansay. Kailangang lagyan mo ito ng laman, wika nga, bigyan ito ng puso, at hingahan ito ng buhay.

Paggamit ng Kasulatan

Ibinatay ni Jesu-Kristo at ng kaniyang mga alagad ang kanilang turo sa Kasulatan. (Luc. 4:16-21; 24:27; Gawa 17:​2, 3) Magagawa mo rin ang gayon. Ang Kasulatan ang dapat na maging pinakasaligan ng iyong pahayag. Sa halip na basta ipaliwanag at ikapit ang mga pananalitang ginamit sa inilaang balangkas, unawain kung paano sinusuhayan ng Kasulatan ang mga pananalitang iyon, at pagkatapos ay magturo mula sa Kasulatan.

Habang inihahanda mo ang iyong pahayag, suriin ang bawat talatang binanggit sa balangkas. Pansinin ang konteksto. Ang ilang teksto ay maaaring magbigay lamang ng nakatutulong na karagdagang impormasyon. Hindi kailangang basahin o komentuhan ang lahat ng mga iyon sa panahon ng iyong pahayag. Piliin kung ano ang pinakamabuti para sa iyong tagapakinig. Kung pagtutuunan mo ng pansin ang mga kasulatang binanggit sa nakalimbag na balangkas, marahil ay hindi mo na kakailanganin pang gumamit ng karagdagang mga reperensiya sa Kasulatan.

Ang tagumpay ng iyong pahayag ay depende, hindi sa dami ng ginagamit na kasulatan, kundi sa kalidad ng pagtuturo. Kapag naghaharap ng mga kasulatan, ipakita kung bakit ginagamit ang mga ito. Maglaan ng panahon sa pagkakapit ng mga ito. Pagkatapos mong basahin ang isang kasulatan, panatilihing nakabukas ang iyong Bibliya habang tinatalakay mo ang teksto. Malamang na gayundin ang gagawin ng iyong tagapakinig. Paano mo maaantig ang interes ng iyong tagapakinig at matutulungan sila na makinabang nang lubusan mula sa Salita ng Diyos? (Neh. 8:​8, 12) Magagawa mo ito sa pamamagitan ng pagpapaliwanag, ilustrasyon, at aplikasyon.

Pagpapaliwanag. Kapag naghahanda upang magpaliwanag ng isang susing teksto, tanungin mo ang sarili: ‘Ano ang kahulugan nito? Bakit ko ginagamit ito sa aking pahayag? Ano kaya ang maaaring itanong ng mga tagapakinig sa kanilang sarili hinggil sa talatang ito?’ Marahil ay kakailanganin mong suriin ang konteksto, ang kalagayan noon, ang nakapaligid na pangyayari, ang puwersa ng mga salita, ang layunin ng kinasihang manunulat. Ito ay nangangailangan ng pagsasaliksik. Makasusumpong ka ng saganang mahahalagang impormasyon sa mga publikasyong inilaan ng “tapat at maingat na alipin.” (Mat. 24:45-47) Huwag mong sikaping ipaliwanag ang lahat ng bagay hinggil sa talata, kundi ipaliwanag kung bakit kailangan mong ipabasa iyon sa iyong tagapakinig may kaugnayan sa tinatalakay na punto.

Ilustrasyon. Ang layunin ng mga ilustrasyon ay upang akayin ang iyong tagapakinig sa mas malalim na antas ng pagkaunawa o upang tulungan silang matandaan ang isang punto o simulain na iyong tinalakay. Ang mga ilustrasyon ay tumutulong sa mga tao na maunawaan kung ano ang sinabi mo sa kanila at maiugnay iyon sa bagay na alam na nila. Ito ang ginawa ni Jesus nang ibigay niya ang kaniyang bantog na Sermon sa Bundok. Ang “mga ibon sa langit,” “mga liryo sa parang,” isang “makipot na pintuang-daan,” isang “bahay sa ibabaw ng batong-limpak,” at maraming nakakatulad na pangungusap ang nagpangyari sa kaniyang turo na maging empatiko, maliwanag, at hindi malilimutan.​—Mat., kab. 5-7.

Aplikasyon. Ang pagpapaliwanag at paglalarawan sa isang kasulatan ay nagtatawid ng kaalaman, subalit ang pagkakapit ng kaalamang iyan ang siyang nagdudulot ng mga resulta. Totoo, pananagutan ng iyong tagapakinig na kumilos salig sa mensahe ng Bibliya, subalit matutulungan mo silang maunawaan kung ano ang kailangang gawin. Kapag natiyak mo na nauunawaan ng iyong tagapakinig ang talatang tinatalakay at nakikita ang kaugnayan nito sa puntong ibinangon, maglaan ng sapat na panahon upang ipakita sa kanila ang tindi ng epekto nito sa paniniwala at paggawi. Itampok ang mga kapakinabangan ng pagtalikod sa mga maling ideya o paggawi na hindi kaayon ng katotohanang tinatalakay.

Habang pinag-iisipan mo kung paano ikakapit ang mga kasulatan, tandaan na ang mga tao na nakikinig sa iyo ay may iba’t ibang pinagmulan at napapaharap sa napakaraming iba’t ibang mga kalagayan. Maaaring may mga bagong interesado, mga kabataan, mga may-edad na, at yaong mga nagpupunyagi sa iba’t ibang personal na suliranin. Gawing praktikal at makatotohanan ang iyong pahayag. Iwasan ang pagbibigay ng payo na tila ang nasa isip mo ay iilang indibiduwal lamang.

Ang mga Kapasiyahan ng Tagapagsalita

Ang ilang kapasiyahan hinggil sa iyong pahayag ay ginawa na para sa iyo. Ang mga pangunahing punto ay maliwanag na ipinakikita, at ang haba ng panahong dapat mong ilaan sa pagtalakay sa bawat pangunahing uluhan ay maliwanag na ipinamamalas. Ang iba pang mga kapasiyahan ay nakasalalay na sa iyo. Maaari mong piliing gumugol ng mas maraming panahon sa ilang pangalawahing punto at kaunti naman para sa iba. Huwag ipalagay na kailangan mong saklawin ang lahat ng pangalawahing punto sa gayunding antas. Maaaring maging dahilan ito upang madaliin mo ang materyal anupat hindi makayanan ng iyong mga tagapakinig. Paano mo matitiyak kung alin ang lubos na tatalakayin at kung alin ang babanggitin lamang sa maikli, o nang pahapyaw? Itanong mo sa sarili: ‘Alin sa mga punto ang makatutulong sa akin upang maitawid ang pangunahing ideya ng pahayag? Alin sa mga ito ang magbibigay ng pinakamalaking kapakinabangan sa aking tagapakinig? Hihina ba ang hanay ng inihaharap na ebidensiya kung lalaktawan ko ang ilang binanggit na kasulatan at kaugnay na punto?’

Buong ingat na iwasan ang pagpapasok ng espekulasyon o personal na opinyon. Maging ang Anak ng Diyos, si Jesu-Kristo, ay umiwas na magsalita ‘mula sa kaniyang sarili.’ (Juan 14:10) Kilalanin na ang dahilan kung bakit ang mga tao ay nagtutungo sa mga pulong ng mga Saksi ni Jehova ay upang pakinggan ang pagtalakay sa Bibliya. Kung ikaw ay kinikilala bilang isang mahusay na tagapagsalita, malamang na iyon ay dahil sa kaugalian mong umakay ng pansin, hindi sa iyong sarili, kundi sa Salita ng Diyos. Dahil dito, ang iyong mga pahayag ay pinahahalagahan.​—Fil. 1:​10, 11.

Matapos na gawing isang malaman na paliwanag ng Kasulatan ang isang simpleng balangkas, kailangan mo na ngayong insayuhin ang iyong pahayag. Kapaki-pakinabang na gawin iyon nang malakas. Mahalagang tiyakin na ang lahat ng punto ay maliwanag sa iyong isipan. Kailangan na gawing taos sa puso ang iyong pahayag, buháy na buháy ang paghaharap sa materyal, at masigla ang iyong presentasyon ng katotohanan. Bago ibigay ang iyong pahayag, tanungin mo ang sarili: ‘Ano ang nais kong maisakatuparan? Lumilitaw ba ang mga pangunahing punto? Talaga bang nagawa kong ang Kasulatan ang siyang pinakasaligan ng aking pahayag? Ang bawat pangunahing punto ba ay natural na umaakay tungo sa susunod? Ang pahayag ba ay nagpapalaki ng pagpapahalaga kay Jehova at sa kaniyang mga paglalaan? Ang konklusyon ba ay may tuwirang kaugnayan sa tema, nagpapakita sa tagapakinig kung ano ang dapat gawin, at gumaganyak sa kanilang gawin iyon?’ Kung masasagot mo ng oo ang mga tanong na ito, kung gayon ay nasa kalagayan kang ‘gumawa ng mabuti dahil sa kaalaman,’ sa kapakinabangan ng kongregasyon at sa kapurihan ni Jehova!​—Kaw. 15:2.