Madalas gumamit ang Bibliya ng isang halaman, tulad halimbawa ng isang punungkahoy, sa matalinghagang paraan. Kung minsan ito ay batay sa katotohanan na samantalang ang binhi ay sumisibol at lumalaki, unang nabubuo ang mga ugat bago ang mga sanga, iba pang mga sanga, o ang bunga na tinutustusan ng mga ugat. Halimbawa, ganito ang mababasa sa Isaias 37:31: “Yaong mga nakatakas sa sambahayan ni Juda, yaong mga nalalabi, ay tiyak na mag-uugat sa ilalim at magbubunga sa itaas.”​—Job 14:8, 9; Isaias 14:29.

Ang pananalita sa Isaias 37:31 at Malakias 4:1 ay batay sa katotohanan na ang buhay ng mga sanga (at ang bunga ng mas maliliit na sanga) ay nanggagaling sa ugat. Ito ang susi sa pag-unawa kung papaanong si Jesus ang “ugat ni Jesse” at ang “ugat ni David.”