ARALIN 48
Piliing Mabuti ang mga Kaibigan Mo
Masaya tayo kapag may malalapít tayong kaibigan. At kapag may problema, matutulungan nila tayo. Pero may babala ang Bibliya: Hindi lahat ay mabubuting kaibigan. Kaya paano ka makakapili ng mabubuting kaibigan? Pag-isipan ang mga tanong na ito.
1. Paano makakaimpluwensiya sa iyo ang mga kaibigan mo?
Puwede nating magaya ang mga tao na lagi nating kasama—mabuting impluwensiya man sila o masama. At totoo ito kapag personal natin silang kasama o kahit sa social media. Sinasabi ng Bibliya: “Ang lumalakad na kasama ng marurunong ay magiging marunong, pero ang sumasama sa mga mangmang [ang mga hindi umiibig kay Jehova] ay mapapahamak.” (Kawikaan 13:20) Kung mahal at sinasamba ng mga kaibigan natin si Jehova, matutulungan nila tayo na maging malapít sa kaniya at makapagdesisyon nang tama. Pero kung hindi sumasamba kay Jehova ang mga kaibigan natin, puwede nila tayong mailayo sa kaniya. Kaya pinapayuhan tayo ng Bibliya na piliing mabuti ang mga kaibigan natin. Kapag mahal ng mga kaibigan natin si Jehova, makikinabang tayo pati na rin sila. Magagawa nating “patuloy [na] pasiglahin ang isa’t isa at patibayin ang isa’t isa.”—1 Tesalonica 5:11.
2. Ano ang nararamdaman ni Jehova sa mga pinipili nating kaibigan?
Pinipiling mabuti ni Jehova ang mga kaibigan niya. “Ang matuwid ay matalik niyang kaibigan.” (Kawikaan 3:32) Ano kaya ang mararamdaman ni Jehova kung pipili tayo ng mga kaibigan na hindi nagmamahal sa kaniya? Siguradong malulungkot siya! (Basahin ang Santiago 4:4.) Pero kung iiwasan natin ang masasamang kasama at lalapit tayo kay Jehova pati na sa mga nagmamahal sa kaniya, matutuwa siya sa atin at kakaibiganin niya tayo.—Awit 15:1-4.
PAG-ARALAN
Tingnan kung bakit mahalaga na pumili ng mga kaibigan at kung paano ka matutulungan ng mga kaibigan mo.
3. Iwasan ang masasamang kasama
Ang mga taong hindi nagmamahal sa Diyos at hindi sumusunod sa mga pamantayan niya ay masasamang kasama. Panoorin ang VIDEO. Pagkatapos, talakayin ang tanong na ito:
Baka hindi natin namamalayan na nakikisama na tayo sa mga taong hindi nagmamahal kay Jehova. Paano ito puwedeng mangyari?
Basahin ang 1 Corinto 15:33. Pagkatapos, talakayin ang mga tanong na ito:
Sino sa tingin mo ang masasamang kasama? Bakit?
Basahin ang Awit 119:63. Pagkatapos, talakayin ang tanong na ito:
Ano ang dapat mong hanapin sa isang kaibigan?
Puwedeng masira ng isang bulok na mansanas ang iba pang mansanas. Paano ka naman maiimpluwensiyahan ng masasamang kasama?
4. Puwede nating maging kaibigan kahit ang mga hindi natin kapareho
Mababasa sa Bibliya ang pagkakaibigan ng dalawang lalaki sa sinaunang Israel na sina David at Jonatan. Hindi sila magkaedad at magkaiba sila ng kalagayan sa buhay. Pero matibay ang pagkakaibigan nila. Basahin ang 1 Samuel 18:1. Pagkatapos, talakayin ang tanong na ito:
Bakit hindi lang mga kaedaran natin o kapareho ng kalagayan natin sa buhay ang puwede nating maging kaibigan?
Basahin ang Roma 1:11, 12. Pagkatapos, talakayin ang tanong na ito:
Ano ang puwedeng gawin ng magkakaibigang mahal si Jehova para mapatibay nila ang isa’t isa?
Tingnan kung paano nakahanap ng mabuting kaibigan ang isang kabataan. Panoorin ang VIDEO. Pagkatapos, talakayin ang mga tanong na ito:
Bakit nag-aalala ang mga magulang ni Akil sa mga pinili niyang kaibigan sa school?
Bakit gusto niya silang kaibiganin noong una?
Paano nawala ang kalungkutan niya?
5. Kung paano ka magkakaroon ng mabubuting kaibigan
Tingnan kung paano ka makakahanap ng tunay na kaibigan at kung paano ka magiging isang tunay na kaibigan. Panoorin ang VIDEO.
Basahin ang Kawikaan 18:24 at 27:17. Pagkatapos, talakayin ang mga tanong na ito:
Paano nagtutulungan ang mga tunay na magkakaibigan?
Mayroon ka bang ganiyang mga kaibigan? Kung wala, paano ka makakahanap nito?
Basahin ang Filipos 2:4. Pagkatapos, talakayin ang tanong na ito:
Para makahanap ng mga tunay na kaibigan, kailangan mong maging isang tunay na kaibigan. Paano?
Para makahanap ng mga tunay na kaibigan, kailangan mong maging isang tunay na kaibigan
MAY NAGSASABI: “Kung masyado kang mapili sa kaibigan, hindi ka magkakaroon ng kaibigan.”
Ano ang sasabihin mo?
SUMARYO
Kapag pinili nating mabuti ang mga kaibigan natin, mapapasaya natin si Jehova at makikinabang tayo.
Ano ang Natutuhan Mo?
Bakit mahalaga kay Jehova ang mga pinipili nating kaibigan?
Anong mga kaibigan ang dapat nating iwasan?
Paano ka magkakaroon ng mabubuting kaibigan?
TINGNAN DIN
Tingnan kung paano tayo matutulungan ng mga tunay na kaibigan sa mahihirap na sitwasyon.
“Patibayin ang Pagkakaibigan Bago Dumating ang Wakas” (Ang Bantayan, Nobyembre 2019)
Alamin ang mga puwede mong gawin para makahanap ng mga tunay na kaibigan.
Ano ang dapat mong malaman tungkol sa pakikipagkaibigan online?
Sa kuwentong “Naghahanap Ako ng Kalinga ng Isang Ama,” alamin kung bakit iniwan ng isang lalaki ang dati niyang mga kaibigan.
“Binago ng Bibliya ang Kanilang Buhay” (Ang Bantayan, Abril 1, 2012)