Tinutulungan Tayo ng Pangangaral na Magbata

¹ Pinapayuhan tayo ng Salita ng Diyos na “takbuhin natin nang may pagbabata ang takbuhan na inilagay sa harap natin.” (Heb. 12:1) Kung paanong nangangailangan ng pagbabata ang isang mananakbo upang maging matagumpay sa paligsahan, kailangan natin ang pagbabata upang matamo ang gantimpalang buhay na walang hanggan. (Heb. 10:36) Paano tayo matutulungan ng ministeryong Kristiyano na magbata nang may katapatan hanggang sa wakas?—Mat. 24:13.

² Pinalalakas sa Espirituwal: Ang ating paghahayag sa kamangha-manghang pangako ng Bibliya na isang matuwid na bagong sanlibutan ay nakatutulong upang manatiling malinaw ang atin mismong pag-asa. (1 Tes. 5:8) Kapag regular tayong nakikibahagi sa ministeryo sa larangan, may pagkakataon tayong ipaalam ang mga katotohanan na ating natutuhan mula sa Bibliya. May pagkakataon tayong ipagtanggol ang ating pananampalataya, na siya namang tumutulong sa atin na maging malakas sa espirituwal.

³ Upang maging mabisa sa pagtuturo sa iba, kailangan natin mismong maunawaan nang malinaw ang mga katotohanan sa Bibliya. Kailangan nating magsaliksik at magbulay-bulay hinggil sa bagay na iyon. Ang taimtim na pagsisikap na ginagawa natin ay nagpapalalim sa ating kaalaman, nagpapatibay sa ating pananampalataya, at nagpapasigla sa atin sa espirituwal. (Kaw. 2:3-5) Kaya naman, habang sinisikap nating tulungan ang iba, pinatitibay natin ang ating sarili.—1 Tim. 4:15, 16.

⁴ Ang masigasig na pakikibahagi sa ministeryo ay isang mahalagang bahagi ng “kumpletong kagayakang pandigma mula sa Diyos,” na kailangan natin upang makatayo tayong matatag laban sa Diyablo at sa mga demonyo. (Efe. 6:10-13, 15) Ang ating pagiging abala sa sagradong paglilingkod ay tumutulong upang mapanatili nating nakatuon ang ating isipan sa nakapagpapatibay na mga bagay at upang maiwasan nating mapasamâ dahil sa sanlibutan ni Satanas. (Col. 3:2) Habang tinuturuan natin ang iba hinggil sa mga daan ni Jehova, patuloy tayong napaaalalahanan sa pangangailangan natin mismo na panatilihin ang banal na paggawi.—1 Ped. 2:12.

⁵ Binigyang-Kapangyarihan ng Diyos: Panghuli, ang ating pakikibahagi sa pag-eebanghelyo ay nagtuturo sa atin na manalig kay Jehova. (2 Cor. 4:1, 7) Kaylaki ngang pagpapala niyan! Ang paglinang natin ng gayong pagtitiwala ay nagsasangkap sa atin hindi lamang upang maisakatuparan ang ating ministeryo kundi upang mabata rin natin ang anumang mga kalagayan na maaaring mapaharap sa ating buhay. (Fil. 4:11-13) Tunay nga, ang pagkatutong umasa nang lubusan kay Jehova ang susi sa pagbabata. (Awit 55:22) Sa maraming paraan, ang pangangaral ay tumutulong sa atin na magbata.

Bahagi 9—Pagdaraos ng Progresibong mga Pag-aaral sa Bibliya

Inihahanda ang Estudyante na Magpatotoo Nang Di-pormal

¹ Nang matanto nina Andres at Felipe na si Jesus ang ipinangakong Mesiyas, hindi nila mapigilang sabihin sa iba ang kapana-panabik na balita. (Juan 1:40-45) Katulad din sa ngayon, habang nagsisimulang manampalataya sa kanilang natututuhan ang mga estudyante sa Bibliya, nauudyukan silang sabihin sa iba ang hinggil dito. (2 Cor. 4:13) Paano natin sila pasisiglahin na magpatotoo nang di-pormal at paano natin sila ihahanda upang gawin ito nang mabisa?

² Maaaring itanong mo lamang sa estudyante kung naipakipag-usap na niya sa iba ang kaniyang natututuhan sa Bibliya. Marahil ay may mga kaibigan o kapamilya siya na maaari niyang anyayahang sumali sa pag-aaral. Tanungin siya kung may sinuman sa kaniyang mga katrabaho, kamag-aral, o iba pang kakilala na nagpapahayag ng interes sa mabuting balita. Sa ganitong paraan, makapagpapasimula siyang magpatotoo. Tulungan siyang maunawaan ang pangangailangang gumamit ng kaunawaan at maging magalang at mabait kapag nakikipag-usap sa iba tungkol sa Diyos na Jehova at sa kaniyang mga layunin.—Col. 4:6; 2 Tim. 2:24, 25.

³ Ibinabahagi ang Kanilang mga Paniniwala: Napakahalagang sanayin ang mga estudyante sa Bibliya na gamitin ang Salita ng Diyos kapag ibinabahagi ang kanilang mga paniniwala. Sa espesipikong mga pagkakataon sa panahon ng pag-aaral, tanungin ang estudyante: “Paano mo gagamitin ang Bibliya upang ipaliwanag ang katotohanang ito sa iyong pamilya?” o “Anong teksto sa Bibliya ang gagamitin mo upang patunayan ito sa isang kaibigan?” Pansinin kung paano siya tumutugon, at ipakita sa kaniya kung paano ibabatay sa Kasulatan ang kaniyang turo. (2 Tim. 2:15) Sa paggawa nito, inihahanda mo ang iyong estudyante sa di-pormal na pagpapatotoo at, kapag kuwalipikado na siya, sa organisadong gawaing pangangaral kasama ng kongregasyon.

⁴ Isang katalinuhan na ihanda ang mga estudyante sa Bibliya na harapin ang pagsalansang. (Mat. 10:36; Luc. 8:13; 2 Tim. 3:12) Kapag nagtanong o nagkomento ang iba hinggil sa mga Saksi ni Jehova, maaari itong magbukas ng daan upang makapagpatotoo ang mga estudyante. Matutulungan sila ng brosyur na Mga Saksi ni Jehova—Sino Sila? Ano ang Pinaniniwalaan Nila? na maging “handang gumawa ng pagtatanggol.” (1 Ped. 3:15) Naglalaman ito ng tumpak na impormasyon na magagamit ng mga baguhan upang tulungang maunawaan ng sumasalansang na mga kaibigan at kapamilyang may mabuti namang intensiyon ang ating mga paniniwala at gawaing salig sa Bibliya.