Pasulungin ang Kakayahan sa Ministeryo—Sanayin ang mga Estudyante sa Bibliya na Magkaroon ng Magandang Kaugalian sa Pag-aaral

Kung Bakit Mahalaga: Para sumulong sa espirituwal na pagkamaygulang ang mga estudyante sa Bibliya, higit pa sa basta pangunahing mga turo lang sa Salita ng Diyos ang dapat nilang isaisip at isapuso. (Heb. 5:12–6:1) Ang pagsisikap ay kailangan sa pag-aaral. Kasama rito ang kakayahang maiugnay ang bagong impormasyon sa dati na nating alam at maunawaan ang praktikal na kahalagahan nito. (Kaw. 2:1-6) Kung matututong magsaliksik ang mga estudyante, masasagot nila ang mga tanong sa Bibliya gamit ang salig-Bibliyang mga publikasyon. Ang pagsisikap nilang maikapit ang kanilang natututuhan ay tutulong sa kanila na makayanan ang mga pagsubok na mapapaharap sa kanila bilang mga Kristiyano.—Luc. 6:47, 48.

Kung Paano Ito Gagawin:

Idiin ang kahalagahan ng paghingi ng tulong kay Jehova sa pamamagitan ng pananalangin bago mag-aral.—Juan 14:26; 1 Cor. 2:10.
Sa simula pa lang, himukin na ang iyong estudyante na patiunang paghandaan ang inyong Bible study. Ipakita sa kaniya ang sarili mong kopya ng pinag-aaralan ninyo, at ituro sa kaniya na mga susing salita lang o parirala ang sasalungguhitan o iha-highlight niya.
Himukin ang iyong estudyante na sumagot sa sarili niyang salita. Iwasang maging nakababagot na tanong-sagot ang inyong pag-aaral kung saan binabasa lang ng estudyante ang sagot mula sa aklat.
Himukin ang iyong estudyante na magbasa ng isang bahagi ng Salita ng Diyos araw-araw. Ipakita sa kaniya ang iskedyul ng pagbabasa ng Bibliya sa jw.org/tl, na nagmumungkahi ng praktikal na paraan kung paano niya ito gagawin. Kailangan ang determinasyon para makaugalian ang pagbabasa ng Bibliya araw-araw, pero sulit naman ito.—Awit 1:2, 3.
Ipakita sa estudyante kung paano niya hahanapin ang sagot sa mga tanong sa Bibliya gamit ang Watchtower Library o Watchtower ONLINE LIBRARY. Tulungan siyang matukoy ang mga mnemonic symbol ng mga publikasyong madalas gamitin sa pulong.

Subukan Ito Ngayong Buwan:

Sa pagtatapos ng isang subtitulo o kabanata, hilingin sa iyong estudyante na sabihin sa maikli kung ano ang natutuhan niya. Kung wala kang estudyante, magpraktis kung paano sasabihin sa maikli ang isang bahagi sa Bibliya o isang parapo sa Bantayan para mahasa ang iyong pag-unawa sa pagbabasa.