Ano ang Maaasahan Ko sa Pag-aasawa?—Bahagi 1

MALAMANG na nahulaan mong ang pananalita sa itaas ay sinabi ng isang dalaga; at ang pananalita sa kaliwa ay mula sa isang may-asawa. Pero hindi mo siguro naisip na iisang tao lang ang nagsabi ng mga iyan.

Ano kaya ang naging problema? Kung may plano kang mag-asawa sa hinaharap, paano mo maiiwasang mauwi sa kabiguan ang magagandang bagay na inaasahan mo?

Tandaan: Ang pagiging maligaya kapag may asawa ka na ay nakadepende sa kung ano ang inaasahan mo mula rito.

Ang artikulong ito​—pati na ang artikulo ng “Ang mga Kabataan ay Nagtatanong” sa susunod na isyu ng Gumising!​—ay tutulong sa iyo na maging makatuwiran sa iyong mga inaasahan.

Ano ang makatuwirang asahan sa pag-aasawa? Sa maikli:

1. Asahang may mga pakinabang

2. Asahang may mga hamon

3. Asahan ang mga di-inaasahan

Isa-isa nating talakayin ang mga ito.

ASAHANG MAY MGA PAKINABANG

Ipinakikita ng Bibliya na ang pag-aasawa ay isang mabuting bagay. (Kawikaan 18:22) Narito ang ilang pakinabang sa pag-aasawa.

Kasama. Binabanggit ng Bibliya na di-nagtagal matapos lalangin ang unang lalaki, si Adan, sinabi ng Diyos: “Hindi mabuti para sa lalaki na manatiling nag-iisa,” kaya nilalang Niya si Eva para makasama ni Adan. (Genesis 2:18) Ginawa sila ng Diyos na may magkaibang mga katangian pero nababagay sa isa’t isa. Kaya naman ang lalaki at ang babae ay magiging mahusay na magkapareha.​—Kawikaan 5:18.

Katuwang. Sinasabi ng Bibliya: “Ang dalawa ay mas mabuti kaysa sa isa . . . sapagkat kung mabuwal ang isa sa kanila, maibabangon ng isa pa ang kaniyang kasama.” (Eclesiastes 4:9, 10) Ganiyang-ganiyan ang pag-aasawa. “Kailangan ang teamwork, pagpapakumbaba, at pagpaparaya paminsan-minsan,” ang sabi ng 22-anyos na si Brenda,a na ikinasal kamakailan.

Seksuwal na ugnayan. Sinasabi ng Bibliya: “Dapat ibigay ng asawang lalaki ang seksuwal na pangangailangan ng kaniyang asawa, at ganoon din ang dapat gawin ng babae sa kaniyang asawa.” (1 Corinto 7:3, Common English Bible) Kapag may asawa ka na, puwede kang masiyahan sa pakikipagtalik nang hindi nag-aalala at nagsisisi, na karaniwang nangyayari sa mga nagsisiping nang di-kasal.​—Kawikaan 7:22, 23; 1 Corinto 7:8, 9.

Mahalagang tandaan: Ang pag-aasawa ay isang regalo mula sa Diyos. (Santiago 1:17) Kung susundin mo ang kaniyang pamantayan, maaasahan mong magiging maligaya ang iyong pag-aasawa.

Pag-isipan: Negatibo ba ang pangmalas mo sa pag-aasawa dahil sa di-magandang pagsasama ng ibang mag-asawa​—marahil ng isang kapamilya mo mismo? Kung oo, anong magagandang halimbawa ang puwede mong tularan?

ASAHANG MAY MGA HAMON

Makatotohanan ang pangmalas ng Bibliya sa pag-aasawa. (1 Corinto 7:28) Narito ang ilang hamon na dapat mong asahan.

Di-pagkakasundo. Walang dalawang tao ang magkatulad na magkatulad​—maliban sa pareho silang hindi perpekto. (Roma 3:23) Kaya may mga pagkakataong hindi magkakasundo ang mag-asawa, kahit nagkakasundo sila sa maraming bagay. Baka makapagsalita pa nga sila ng masakit na pagsisisihan nila sa bandang huli. “Ang isang taong hindi kailanman nagkamali sa pagsasalita . . . ay perpekto,” ang sabi ng Bibliya. (Santiago 3:2, Holy Bible​—Easy-to-Read Version) Sa halip na isiping hindi sila magkakaproblema, sinisikap ng maliligayang mag-asawa na pag-usapan at lutasin ang mga di-pagkakasundo.

Pagkadismaya. “Maraming istorya sa pelikula at palabas sa TV ang tungkol sa isang babae na nakahanap ng ‘perfect’ na asawa at naging maligaya sila habambuhay,” ang sabi ng tin-edyer na si Karen. Kung hindi ganoon ang mangyayari, baka madismaya ang mag-asawa. Totoo naman na kapag kasal na, lumilitaw ang iba pang mga kahinaan at nakakainis na ugali ng bawat isa. Dapat tandaan na ‘binabata ng tunay na pag-ibig ang lahat ng bagay’​—maging ang pagkadismaya.​—1 Corinto 13:4, 7.

Pagkabalisa. Ayon sa Bibliya, ang may-asawa ay “nababalisa para sa mga bagay ng sanlibutan.” (1 Corinto 7:33, 34) Normal lang ang mabalisa, at kadalasa’y tama lang na makadama nito. Halimbawa, baka nahihirapan kang pagkasyahin ang iyong kita. Baka kailangang parehong magtrabaho ang mag-asawa para may pambili sila ng pagkain, damit, at may pambayad sa bahay. Pero mahaharap ninyo ang lahat ng ito kung magtutulungan kayong mag-asawa.​—1 Timoteo 5:8.

Mahalagang tandaan: Kung ang pakikipagkasintahan ay parang pagpapalipad ng saranggola, ang pag-aasawa ay parang pagpapalipad ng eroplano. Mas malaking pagsisikap at kakayahan ang kailangan para maharap ang mahihirap na sitwasyon​—pero mapagtatagumpayan mo ito.

Pag-isipan: Ano ang ginagawa mo ngayon kapag hindi kayo nagkakasundo ng mga magulang mo o ng mga kapatid mo? Makatuwiran ka ba kahit nadidismaya ka? Ano ang ginagawa mo kapag nababalisa ka?