Pagtutok sa Ugnayan

INDIA

Animnapu’t isang porsiyento sa mga kabataang edad 18 hanggang 25 ang naniniwalang “hindi na isang malaking isyu sa India” ang pakikipag-sex nang di-kasal, ayon sa isang surbey noong 2014. Isang doktor sa Mumbai ang nagsabi sa Hindustan Times na sa palagay niya, “ang pakikipagrelasyon ay hindi nangangahulugang nasa isip ng mga kabataan ang pag-aasawa. Ito man ay minsanang pakikipag-sex, karaniwang pakikipagrelasyon o pakikipag-live-in, hindi ito kailangang humantong sa pagpapakasal.”

PAG-ISIPAN: Ang mga sakit ba na naililipat sa pagtatalik at ang kirot ng damdamin ay mas iniuugnay sa pakikipag-sex bago ang kasal o pagkatapos ng kasal?—1 Corinto 6:18.

DENMARK

Kapag ang isa ay madalas makipagtalo sa mga kapamilya niya, nadodoble ang panganib na mamatay siya pagdating sa edad na 35 hanggang 50. Sa loob ng mahigit 11 taon, sinubaybayan ng mga mananaliksik sa University of Copenhagen ang halos 10,000 indibiduwal na nasa gayong mga edad. Natuklasan nilang mas malamang na maagang mamatay ang mga madalas makipagtalo sa malalapít sa kanila kaysa sa mga bihirang makipagtalo. Ayon sa isang awtor sa pag-aaral na ito, ang positibong pagharap sa mga álalahanín at problema at paglutas sa mga di-pagkakaunawaan ay “maaaring ituring na mahahalagang paraan para mabawasan ang maagang pagkamatay.”

SABI NG BIBLIYA: “Ang sinumang nagpipigil ng kaniyang mga pananalita ay nagtataglay ng kaalaman, at ang taong may kaunawaan ay malamig ang espiritu.”—Kawikaan 17:27.

ESTADOS UNIDOS

Ang mga “cyclical couple”—mga naghihiwalay at muling nagkakabalikan noong magkasintahan pa lang—ay mas malamang na magpasiyang subukan ang paghihiwalay sa unang limang taon ng kanilang pagsasama bilang mag-asawa, ayon sa isang kamakailang pag-aaral sa 564 na bagong kasal sa Louisiana. Mas malamang din na mag-away sila palagi at di-gaanong masiyahan sa kanilang pagsasama.

SABI NG BIBLIYA: “Ang pinagtuwang ng Diyos [sa pag-aasawa] ay huwag paghiwalayin ng sinumang tao.”—Mateo 19:6.