Isaya
19 Ɛtɛkɛta wendana la Edjibito+ ɛnɛ:
Nyende, Jehowa mbahema lo dinge dieta esadi ndo ekɔ lo ndjaye oya l’Edjibito.
Tozambizambi t’anyanya ta l’Edjibito tayosaka lokomba la ntondo kande,+
Ndo otema w’Edjibito wayɔlɛlɔ l’etei kawɔ.
2 “Dimi layotshutshuya ase Edjibito dia ndɔsha ase Edjibito,
Ko vɔ wayɔlɔshana,
Onto l’onto ayɔlɔsha ɔnango ndo osukanyi ande,
Osomba wayɔlɔsha osomba ndo diolelo diayɔlɔsha diolelo.
3 Yimba y’Edjibito yayotshimba l’etei kawɔ,
Ndo dimi layofukutanya dikongelo diawɔ.+
Vɔ wayɔtɛkɛta la tozambizambi t’anyanya,
Asaki w’ekanga, wanɛ watɛkɛtsha dimu ndo wetshi.+
4 Dimi layokimɔ Edjibito le owandji w’awui wolo,
Ndo nkumekanga ka hiadi ayowaolɛ,”+ mbata Nkumadiɔndjɔ ka mɛtɛ, Jehowa kanga lolembelembe.
5 Ashi wa lo ndjale wayoma,
Ndo ashi wa l’ɔkɛdi wayokitakita ndo wayoma to.+
6 Ɛkɛdi wayopɔ nsolo;
Ashi wɛtɔyawɔ oma lo Nilɛ k’Edjibito wayokitakita ndo wayoma.
Asɔpɔ la tokolɔ tayɔhɔnda.+
7 Esongo wa l’omamu w’Ɔkɛdi wa Nilɛ, l’onyɔ wa Nilɛ,
Tɔ kayɛmbama la lɔpɛpɛ ndo tɔ hatonga nto.
8 Amundji wa nse wayolela,
Wanɛ watokaka tɔdi lo Nilɛ wayokiyana,
Ndo wanɛ watokaka ɛtɛyi lo ashi wayokitakita.
9 Wanɛ watokambaka olimu la eshinga wa linɛnɛ+
Ndo wanɛ watosalaka ahɔndɔ wa wɛma la adiba wayoshama nsɔnyi.
10 Ambɛdi awɔ wayɔtɛtshatɛtshama;
Ndo ase olimu tshɛ wayonga la ɔkɛyi.*
11 Ewandji wa Zɔana+ wekɔ dinginya.
Andaki woleki lomba waki Farawɔ wambosha dako diaha la yimba.+
Ngande wakokanyu mbutɛ Farawɔ nyate:
“Dimi lekɔ kanula ya akanga wa lomba,
Kanula ya nkumi ya dikanga y’edjedja”?
12 Ko lende ele anto ayɛ wa lomba?+
Vɔ wakote naka vɔ mbeyaka yɛdikɔ yambɔsa Jehowa kanga lolembelembe lo dikambo dia Edjibito.
13 Ewandji wa Zɔana wambosala akambo lo yoho y’enginya;
Ewandji wa Nofu*+ wambokesama;
Ewandji wa waoho awɔ wambonganyiya Edjibito.
14 Jehowa ambowotsholɛ nyuma k’ofukutanu;+
Ndo vɔ wambonganyiya Edjibito lo kɛnɛ tshɛ kasalawɔ,
Oko ombidjɔki wa wanu katshingatshinga lo towɔki yande.
15 Edjibito hatonga ndooko l’olimu wa nkamba,
Oyadi le ɔtɛ kana wela, nsɔngusɔngu kana lokonɔ.*
16 Lushi lɔsɔ Edjibito ayonga oko wamato wadidima ndo woka wɔma l’ɔtɛ wa lonya lokiya wɔma lambemɛ Jehowa kanga lolembelembe dia mbɔkɔmɔla.+ 17 Ndo wodja wa Juda wayonga kiɔkɔ ya wɔma le Edjibito. Vɔ wayondama la sase lam’ayowoodimolaka l’ɔtɛ wa yɛdikɔ yambowaɔsɛ Jehowa kanga lolembelembe.+
18 Lushi lɔsɔ esomba 5 wa lo wodja w’Edjibito wayɔtɛkɛta ɔtɛkɛta w’ase Kanana+ ndo wayotshiba dia ntshikala la kɔlamelo le Jehowa kanga lolembelembe. Osomba ɔmɔtshi wayelamɛ ɔnɛ Osomba w’Onyukwelo.
19 Lushi lɔsɔ elambwelo kayonga dikambo dia Jehowa l’atei wa wodja w’Edjibito ndo ekundji dikambo dia Jehowa lo olelo awɔ. 20 Dui sɔ diayonga dikambo dia djembetelo ndo ɔmɛnyi le Jehowa kanga lolembelembe lo wodja w’Edjibito; nɛ dia vɔ wayolelɛ Jehowa l’ɔtɛ wa asoyanyi, ko nde ayowatomɛ oshimbedi, ɛɛ, oshimbedi wa woke wayowashimbɛ. 21 Ko Jehowa ayeyama le ase Edjibito ndo ase Edjibito wayeya Jehowa lushi lɔsɔ ndo wayolambola elambo la weshasha ndo wayotshika dɔkɔlɔkɔ le Jehowa ko wayodikotsha. 22 Jehowa ayɔkɔmɔla Edjibito,+ nkɔmɔla ko nkɔnɔya; ko vɔ wayokalola le Jehowa ndo nde ayoka ɛsɛngɔsɛngɔ awɔ ko ayowakɔnɔya.
23 Lushi lɔsɔ ɔsɛsɛ wa woke+ wayonga oma l’Edjibito otsha l’Asuriya. Oma laasɔ, Asuriya ayoya lo Edjibito ko Edjibito lo Asuriya, ko Edjibito ayokambɛ Nzambi kaamɛ la Asuriya. 24 Lushi lɔsɔ Isariyɛlɛ ayonga wodja wa 3 kaamɛ la Edjibito ndo Asuriya,+ ɔtshɔkɔ l’atei wa nkɛtɛ, 25 nɛ dia Jehowa kanga lolembelembe ayowɔtshɔkɔla, ata ate: “Anto ami, Edjibito ndo olimu wa anya ami, Asuriya ndo etenyi kami k’okitɔ, Isariyɛlɛ+ watshɔkwame.”