Etsha

3 Petero la Joani wakatadɛka otsha lo tɛmpɛlɔ dikambo dia wonya wa dɔmbɛlɔ, oya lo wonya wa 9.* 2 Anto wakatɛmbaka pami kɛmɔtshi kakotɔ ekuse. Wakookitshaka lushi tshɛ suke la soko dia tɛmpɛlɔ diakawelɛka ɔnɛ Soko dia Dimɛna dia nde ndjɔlɔmbaka wanɛ wakɔtɔka lo tɛmpɛlɔ weshasha wa kɛtshi. 3 Lam’akandɛnyi Petero la Joani walanga mbɔtɔ lo tɛmpɛlɔ, pami kakɔ akatatɛ mbalɔmba weshasha wa kɛtshi. 4 Ko Petero la Joani wakawende tɛɛ ndo Petero akate ate: “Ohotenda.” 5 Ko nde akawaende tɛɛ, alongamɛ dia wayowosha yangɔ. 6 Koko Petero akate ate: “Dimi bu la mfɛsa kana paonyi, koko layanga kosha kɛnɛ kele la mi. Lo lokombo la Yeso Kristo y’ose Nazarɛtɛ, kɛndakɛnda!”+ 7 Ko nde akookimɛ lo lonya l’omi ndo akawonyiya.+ Ko mbala kakɔ ɔtɔi akaka ande ndo weka ande wa lo tɔkɔlɔngɔnyɔ wakakeketala,+ 8 ko nde akemala l’ekolo ande+ ndo akatatɛ nkɛndakɛnda, akɔtɔ kaamɛ la wɔ lo tɛmpɛlɔ, atakɛndakɛnda, atafumbɔfumbɔ ndo atatombola Nzambi. 9 Anto tshɛ wakawɛnyi atakɛndakɛnda ndo atatombola Nzambi. 10 Ndo vɔ wakeye dia nde mbakadjasɛka la Soko dia Dimɛna dia tɛmpɛlɔ+ dia nɔmbana weshasha wa kɛtshi, ko vɔ wakaambe efula ndo waki l’ɔngɛnɔngɛnɔ w’efula lo kɛnɛ kakakomɛ pami kɛsɔ.

11 Lam’ele nde akatakimɛka Petero la Joani, anto tshɛ wakalawɔ oya le wɔ lo dihole diakelamɛka ɔnɛ Dɛfu dia Sɔlɔmɔna,+ waamba woho w’anyanya. 12 Lam’akɛnyi Petero dikambo sɔ, nde akatɛ anto asɔ ate: “Ase Isariyɛlɛ le, lande na kambanyu l’ɔtɛ wa dikambo nɛ? Kana lande na katendanyu, wate kana oko oma lo wolo aso hita ko tete le lo woho wamamemaso Nzambi mbambotosala dia nde nkɛndakɛnda? 13 Nzambi ka Abrahama, Nzambi ka Isaka, Nzambi ka Jakɔbɔ+ ndo Nzambi ka watshɛso ambotombola Okambi+ ande Yeso+ lakanyakimɔ+ ndo lakanyanguna la ntondo ka Pilato, kaanga mbakandɔshi yɛdikɔ ya mbotshungola. 14 Eelo, nyu nyakanguna onto l’ekila ɔsɔ ndo kanga losembwe ɔsɔ ko nyakalɔmbɛ dia vɔ nyotshungolɛ+ onto ɔmɔtshi laki ondjakanyi, 15 ko nyakadiake Owandji wa Woke wa lɔsɛnɔ.+ Koko Nzambi akawolola oma lo nyɔi. Sho tshɛ tekɔ ɛmɛnyi wa dikambo sɔ.+ 16 Ndo lo lokombo lande ndo oma lo mbetawɔ kaso lo lokombo lande kambokeketala pami kɛnɛ kɛnanyu ndo keyanyu. Mbetawɔ kele la so lo tshimbo yande kambɔkɔnɔla pami kɛnɛ tshɛ lo tshɛ la ntondo kanyu nyu tshɛ. 17 Analengo, dimi mbeyaka nte nyu nyakasale dikambo sɔ aha la mbeya,+ oko wakasale ndo ewandji anyu.+ 18 Koko lo yoho shɔ, mbakakotsha Nzambi akambo wakandewoya la ntondo oma l’enyɔ w’amvutshi tshɛ ɔnɛ Kristo kande akahombe nsowa.+

19 “Ɔnkɔnɛ, nyoyatshumoya+ ndo nyokadimole etema+ dia pɛkato yanyu dimɔ+ dia tena di’ekeketshelo ndja oma le Jehowa ndamɛ* 20 ndo dia nde nyotomɛ Kristo kakasɔnama dikambo dianyu, mbuta ate Yeso. 21 Olongo pombaka mbolama polo nshi yayɔlɔngɔsɔma akambo tshɛ wakatɛkɛta Nzambi l’enyɔ w’amvutshi ande w’ekila wa lo nshi y’edjedja. 22 Lo mɛtɛ, Mɔsɛ akate ate: ‘Jehowa* Nzambi kanyu ayonyotondjɛ omvutshi wele oko dimi+ oma l’atei w’anangɛnyu. Nyu pombaka mpokamɛ kɛnɛ tshɛ kayondonyotɛ.+ 23 Eelo, onto tshɛ* lahatohokamɛ Omvutshi ɔsɔ ayolanyema tshɛ lo tshɛ.’+ 24 Ndo amvutshi tshɛ, ntatɛ oma le Samuɛlɛ polo le wanɛ wakayonga l’ɔkɔngɔ ande, wanɛ tshɛ wakatɛkɛta, wakewoya nshi shɔ hwe hwe.+ 25 Nyu nyekɔ ana w’amvutshi ndo wa sheke yakadje Nzambi la watshɛnyu+ etena kakandatɛ Abrahama ate: ‘Ndo nkumbo tshɛ ya la nkɛtɛ wayoyakondjɛ ɔtshɔkɔ lo tshimbo ya kanula* yayɛ.’+ 26 L’ɔkɔngɔ wa Nzambi ntondja Okambi ande, nde akootome le nyu ntondo+ dia ndjonyɔtshɔkɔla lo nkimanyiya ɔmɔmɔ la l’atei anyu dia mimɔ oma l’etsha ande wa kɔlɔ.”