Etsha
5 Pami kɛmɔtshi kakawelɛka Ananiya nde la wadɛnde Safira wakasondja ɛtshi kawɔ kɛmɔtshi k’ekambɔ. 2 Koko nde akashɛ falanga mɔtshi ndo wadɛnde akeyaka dikambo sɔ. Nde akela yema tsho ko akasha apɔstɔlɔ.+ 3 Koko Petero akawotɛ ate: “Ananiya, lande na kambokokonya Satana dia wɛ nkesa+ nyuma k’ekila+ ndo mbishɛ falanga mɔtshi yakayasondja ekambɔ? 4 Edja tshɛ kakiyɛ la tɔ, shi kayɛ mbakitɔ, ndo l’ɔkɔngɔ wa wɛ kisondja, shi falanga y’oma lɔkɔ yaki paka yayɛ? Ko lande na kakakoye kanyi ya nsala dikambo dia nganɛ l’otema ayɛ? Aha anto mbakayakeshi, koko Nzambi.” 5 Lam’akoke Ananiya ngasɔ, nde akakɔ ko akavu. Anto tshɛ wakoke dikambo sɔ wakandama la wɔma w’efula. 6 Ko ɛlɔngɔ w’apami wakaye, wakawɔmbɛ ahɔndɔ, wakatombe la nde l’andja ko wakatookundɛ.
7 L’ɔkɔngɔ wa wenya wa ntango oko 3, wadɛnde akaye ndo nde kombeya kɛnɛ kakatombe. 8 Petero akawombola ate: “Ombutɛ, onde la falanga nyɛ mbakanyasondja ekambɔ kanyu, nyu 2?” Nde akate ate: “Eelo, la falanga ndjo.” 9 Ko Petero akawotɛ ate: “Lande na kakanyokanyi nyu 2 dia nkesa nyuma kaki Jehowa?* Eenda, wanya wa wanɛ wakatokundɛ omɛyɛ wekɔ la soko, vɔ wayotomba ndo layɛ l’andja.” 10 Mbala kakɔ ɔtɔi, nde akakɔ l’ekolo wa Petero ko akavu. Etena kakaye ɛlɔngɔ w’apami, vɔ wakayootana akavwe, ko vɔ wakawɛmbɛ ndo wakatookundɛ suke l’omɛnde. 11 Ɔnkɔnɛ, etshumanelo k’otondo ndo anto tshɛ wakoke akambo asɔ wakandama la wɔma w’efula.
12 Ndo nto, tolembetelo efula la akambo wa diambo* wakatetemala salema lo tshimbo y’anya w’apɔstɔlɔ l’atei w’anto,+ ndo vɔ tshɛ wakasanganaka kaamɛ lo Dɛfu dia Sɔlɔmɔna.+ 13 Lo mɛtɛ, ndooko onto okina laki la dihonga dia nsangana kaamɛ la wɔ, koko anto wakatɛkɛtaka dimɛna efula dikambo diawɔ. 14 Laadiko dia laasɔ, ambetawudi wa lo Nkumadiɔndjɔ wakatetemala kotshama, nyemba y’apami ndo ya wamato.+ 15 Ko wakelaka ɛkɔnyi lo ɛsɛsɛ wa weke ndo wakaakitshaka lo mbeto ya totshitshɛ la lo atoho, kele lam’akahombe Petero mbeta laawɔ, ko kaanga dɛdi diande mbifɛ amɔtshi l’atei awɔ.+ 16 Ndo nto, elui w’anto w’oma l’esomba wakasukana la Jɛrusalɛma wakatetemalaka ndja la wanɛ waki la hemɔ ndo wanɛ wakahɛnyahɛnyamaka la ɛdiɛngɛ, ko vɔ tshɛ wakakɔnɔka.
17 Koko, ɔlɔmbɛdi a laadiko ndo wanɛ tshɛ waki kaamɛ la nde, mbuta ate yaato y’ɔtɛmwɛlɔ ya Asadukɛ waki l’etena kɛsɔ wakemala ndo wakalole la kandjema. 18 Ndo vɔ wakande* apɔstɔlɔ, ko wakawadje lo lokanu.+ 19 Koko l’otsho, ondjelo wa Jehowa* akadihola nkuke ya lokanu,+ akaatondja ndo akawatɛ ate: 20 “Nyotshu lo tɛmpɛlɔ ndo nyototetemale mbutɛ anto akambo tshɛ wendana la lɔsɛnɔ lɔnɛ.” 21 Lam’akawoke ngasɔ, vɔ wakɔtɔ lo tɛmpɛlɔ la pindju ndo wakatatɛ mbetsha.
Lam’akaye ɔlɔmbɛdi a laadiko l’anto tshɛ waki la nde, vɔ wakasanganya ase tominadi ta laadiko t’ase Juda ndo dikumanyi tshɛ di’ana w’ase Isariyɛlɛ, ko wakatome dui dia vɔ tɔsa apɔstɔlɔ oma lo lokanu oya le wɔ. 22 Koko lam’akatshu apulushi lɛkɔ, vɔ kombatana lo lokanu. Ko vɔ wakakalola ndo wakatota 23 vate: “Takatanyi nkuke ya lokanu tshɛ ndjihama la nsapi dimɛna ndo alami wemadi la soko. Koko lam’akatadihodi, hatotanyi ndooko onto l’etei.” 24 Lam’akoke ɔnɔmbɔdi w’alami wa lo tɛmpɛlɔ ndo ewandji w’ɛlɔmbɛdi ɛtɛkɛta ɛsɔ, vɔ waki l’okandokando, wayambola kɛnɛ kayanga ntomba. 25 Ko onto ɔmɔtshi akaye ndo akayowatɛ ate: “Nyolonge, apami wakanyadje lo lokanu, vɔ anɛ wemadi lo tɛmpɛlɔ wetsha anto.” 26 Ko ɔnɔmbɔdi w’alami wa lo tɛmpɛlɔ akatshu la apulushi ndo akatoya la apɔstɔlɔ, aha la ngala, nɛ dia wakokaka wɔma dia anto+ watokoyowaoka ave.
27 Ko vɔ wakaye la wɔ ndo wakayowaemadia la ntondo ka luudu la tominadi ta laadiko t’ase Juda. Oma laasɔ, ɔlɔmbɛdi a laadiko akaasandja, 28 ata ate: “Takanyodjangɛ la wolo tshɛ diaha nyu ntetemala mbetsha lo lokombo lɔsɔ.+ Koko nyende, nyu nyambolodia Jɛrusalɛma la wetshelo anyu ndo nyamboyashikikɛ dia tɛɛndja dikila di’onto ɔsɔ.”+ 29 Ko Petero la apɔstɔlɔ akina wakakadimola vate: “Sho pombaka nkitanyiya Nzambi oko wende owandji lo dihole dia nkitanyiya anto.+ 30 Nzambi ka watshɛso akolola Yeso lakanyadiake lo mbohanɛ l’otamba.*+ 31 Nzambi akawodiya dia nde mbidjasɛ lo lonya lande l’omi+ dia monga Owandji wa Woke+ ndo Oshimbedi,+ dia Isariyɛlɛ ndjatshumoya ndo dimanyiyama pɛkato.+ 32 Sho tekɔ ɛmɛnyi w’akambo asɔ+ kaamɛ ndo nyuma k’ekila+ kakasha Nzambi wanɛ wookitanyiya oko wende owandji.”
33 Lam’akawoke akambo asɔ, vɔ wakomala efula* ndo wakayange ndjaka apɔstɔlɔ. 34 Koko, Ofarisɛ ɔmɔtshi waki ombetsha w’Ɛlɛmbɛ wakalɛmiyamaka efula oma le anto tshɛ, lokombo lande Ngamaliyɛlɛ,+ akemala lo tominadi ta laadiko t’ase Juda, ko nde akawatɛ dia vɔ tokotondja apɔstɔlɔ yema l’andja. 35 Oma laasɔ, nde akawatɛ ate: “Ase Isariyɛlɛ le, nyende ɔlɔlɔ lo kɛnɛ kalanganyu salɛ apami anɛ. 36 Nɛ dia ɛnyɛlɔ, la ntondo ka nshi nyɛ, Teodasɛ akatombe, akayataka dia nde ekɔ onto la woke ndo apami oko 400 wakete lo wedi ande. Koko nde akadiakema ndo wanɛ wakatawoyelaka wakahandjɔ vwa ko wakashishɔ. 37 L’ɔkɔngɔ ande, Judasɛ y’ose Ngalileya akatombe lo nshi yakawafundjaka nkombo ndo nde akakotola anto lo wedi ande. Pami kɛsɔ nde la wɔ akavu ndo wanɛ tshɛ wakatawoyelaka wakahandjɔ vwa. 38 Ndo lo dikambo nɛ, dimi lambonyotɛ nte: Nyotshike anto anɛ ki ndo nyaakimɔ. Nɛ dia naka olimu awɔ kana kɛnɛ kasalawɔ ndja oma le anto, kete kayokita tatala. 39 Ko naka oma le Nzambi, kete hanyotokoka mbashimba.+ Naka aha ngasɔ, kete ondo nyu mbeyaka ndjonga oko anto walɔshana la Nzambi.”+ 40 Ko vɔ wakawokɛ. Vɔ wakelɛ apɔstɔlɔ, wakaakɔmɔla*+ ndo wakawadjangɛ dia vɔ ntshika ntɛkɛta lo lokombo la Yeso, ko wakaakimɔ.
41 Ɔnkɔnɛ, vɔ wakatombe oma lo tominadi ta laadiko t’ase Juda, watangɛnangɛna,+ nɛ dia vɔ wakɔsama oko anto wasungana mbishama nsɔnyi l’ɔtɛ wa lokombo lande. 42 Ndo lushi la lushi, lo tɛmpɛlɔ ndo lo luudu la luudu,+ vɔ wakatetemalaka mbetsha ndo mbewoya lokumu l’ɔlɔlɔ lendana la Kristo Yeso+ aha la mpekɔ.