1 Samuɛlɛ
1 Aki pami kɛmɔtshi la Ramatayima-Zɔfima*+ wa lo lɛkɛ l’akona la Efrayimɛ,+ lokombo lande Elekana.+ Nde aki ɔna aki Jɛrɔhama ɔna Elihu ɔna Tohu ɔna Zufu oseka Efrayimɛ. 2 Nde aki la wadi 2, ɔmɔtshi lokombo lande Hana ndo okina lokombo lande Penina. Penina aki la ana, koko Hana kombota ndooko ɔna. 3 Pami kakɔ akonɛɛka oma l’osomba awɔ ɔnɔnyi l’ɔnɔnyi dia tɔtɛmɔla* ndo tolambola Jehowa kanga lolembelembe elambo la Shilo.+ Ana waki Eli 2 w’apami, Hɔfɛni nde la Finehasi+ wakakambɛka Jehowa+ lɛkɔ oko ɛlɔmbɛdi.
4 Lushi lɔmɔtshi, lam’akalambolaka Elekana olambo, nde akasha wadɛnde Penina kaamɛ la anande tshɛ w’apami ndo wa wamato+ yema yawɔ, 5 koko nde akasha Hana yema ya laande, nɛ dia nde akalekaka nanga Hana, koko Jehowa kombosha ana.* 6 Ndo nto, waladɛnde akɔɔtɛngaka mbala ko mbala dia mboomadia, nɛ dia Jehowa kombosha ana. 7 Kɛsɔ mbakandasalaka ɔnɔnyi l’ɔnɔnyi. Mbala tshɛ kakatshɔka Hana otsha lo luudu la Jehowa,+ waladɛnde akɔɔtɛngaka woho w’anyanya, ko nde akalelaka ndo nde kɔndɛka ndooko ɛngɔ. 8 Ko omɛnde Elekana akawombola ate: “Hana, lande na kalelayɛ? Lande na kahayale ndooko ɛngɔ ndo lande na keyɛ ɔkɛtshi oto?* Onde dimi handeki ana w’apami 10 le yɛ?”
9 Oma laasɔ, Hana akonɛɛ l’ɔkɔngɔ wa vɔ nshidiya ndɛ la nnɔ la Shilo. L’etena kɛsɔ, ɔlɔmbɛdi Eli akadjasɛka lo nkɔsa suke la ekundji ka la soko dia tɛmpɛlɔ*+ ka Jehowa. 10 Hana aki la lɔkɔnyɔ l’efula,* ko nde akatatɛ nɔmba Jehowa+ ndo akalele efula. 11 Nde akatshike dɔkɔlɔkɔ nɛ ate: “Jehowa kanga lolembelembe le, naka wɛ menda sui di’okambi ayɛ ko mbohɔmi, ndo naka wɛ hohe okambi ayɛ ko wɛ ambosha okambi ayɛ ɔna pami,+ kete dimi layowokimɔ le yɛ wɛ Jehowa nshi tshɛ ya lɔsɛnɔ lande ndo ɛrɛswara hawetaki l’ɔtɛ ande.”+
12 Lam’akandalɔmbaka l’etena k’otale la ntondo ka Jehowa, Eli akendaka onyɔ ande. 13 Hana akatɛkɛtaka l’etei k’otema, paka ɛlɔmɔ ande eto mbakasukasukaka, dui diande kombokɛmaka. Ɔnkɔnɛ, Eli akafɔnya ate nde akadjwe wanu. 14 Eli akawotɛ ate: “Edja ndo etena kakɔna kayoyotetemala mbidjɔ wanu? Tshika ɔnwɛlɔ wa wanu.” 15 Ko Hana akakadimola ate: “Keema, nkumɛmi! Dimi lekɔ womoto lele la lɔkɔnyɔ l’efula.* Dimi hanwɛ vinyɔ kana wanu akina tshɛ wadjoya, koko lekɔ lo ndiholɛ Jehowa+ otema ami. 16 Tɔsake okambi ayɛ oko womoto l’anyanya, nɛ dia dimi lambɔtɛkɛtaka polo ndo kakianɛ lo dikambo dia shɔkɔ yami y’efula ndo lɔkɔnyɔ lele la mi.” 17 Ko Eli akakadimola ate: “Tshɔka la ki ndo Nzambi k’Isariyɛlɛ akosha kɛnɛ kɔɔlɔmbayɛ.”+ 18 Ko nde akate ate: “Okambi ayɛ ahomɔ lokolo l’ɔlɔ lo washo ayɛ.” Ko womoto akɔ akatshu, akatɔlɛ ndo nde komonga la elungi k’ɔkɛtshi nto.
19 Oma laasɔ, vɔ waketɔ la pindju ka pɛɛ ko wakakusama la ntondo ka Jehowa ndo l’ɔkɔngɔ wa laasɔ, vɔ wakakalola otsha lakawɔ la Rama.+ Elekana akeyana la wadɛnde Hana ko Jehowa akawohɔ.+ 20 Ko ɔnɔnyi akɔ,* Hana akatshu diemi ndo akote ɔna pami ko nde akawɔlɛ+ Samuɛlɛ,* nɛ dia nde akate ate: “Oma le Jehowa kakamɔɔlɔmbɛ.”
21 Oma laasɔ, Elekana akatshu nde l’ase luudu lande tshɛ dia tolambola Jehowa+ olambo w’ɔnɔnyi l’ɔnɔnyi ndo dia tokimɔ olambo ande wa nkotsha dɔkɔlɔkɔ. 22 Koko Hana kotshɔ,+ nɛ dia nde akatɛ omɛnde ate: “Kam’ayokila ɔna awɛlɛ, dimi layowɔtɔla ko nde ayotɛnama la ntondo ka Jehowa ndo ayototshikala lɛkɔ pondjo.”+ 23 Omɛnde Elekana akawotɛ ate: “Sala kɛnɛ kɛnayɛ dia kekɔ dimɛna.* Tshikala la ngelo polo lam’ayoyookidia awɛlɛ. Jehowa akotsha kɛnɛ kakayate.” Ko womoto akɔ akatshikala la ngelo ndo akalɔnyaka ɔnakɔ polo lam’akandookidia awɛlɛ.
24 Kam’akandookidia awɛlɛ, nde akatshu la nde otsha la Shilo kaamɛ la ɔsɔngɔ wa ngɔmbɛ w’ɛnɔnyi 3, efa* 1 w’ofushi ndo mbaka ka woke ka wanu,+ ko nde akakome lo luudu la Jehowa la Shilo+ ndo akatshu la ɔnakɔ. 25 Oma laasɔ, wakadiake ngɔmbɛ kakɔ ndo wakatɔlɛ ɔnakɔ le Eli. 26 Ko Hana akate ate: “Onkimwe yema, nkumɛmi! Nkumɛmi le, lo mɛtɛ oko weyɛ la lɔsɛnɔ,* dimi kele womoto lakemala kaamɛ la yɛ lo dihole nɛ dia nɔmba Jehowa.+ 27 L’ɔtɛ w’ɔna ɔnɛ kakamalɔmbaka ko Jehowa ambombisha kɛnɛ kakamɔɔlɔmbɛ.+ 28 Wonya ɔnɛ, dimi lawɔ lambookimɔ* le Jehowa. Nde ambokimɔma le Jehowa lo nshi tshɛ ya lɔsɛnɔ lande.”
Ko nde* akakusama laawɔ la ntondo ka Jehowa.