Isaya
2 Ndo onto l’onto ayonga oko dihole di’eshamelo* oma lo lɔpɛpɛ,
Ndo oko dihole di’ekokelo* oma lo mvula ngembe,
Oko ɛkɛdi w’ashi lo nkɛtɛ y’ofumbo,+
Oko dɛdi dia dive dia woke lo nkɛtɛ ya shɛnga,
3 Ko washo wa wanɛ wɛna hawotodihama nto,
Ndo atoyi wa wanɛ woka wayodja yimba.
4 Otema wa wanɛ wahadje yimba wayokana yimba lo ewo,
Ndo lolemi la kanga dikokoma layɔtɛkɛta dimɛna ndo lo yoho yokɛma hwe.+
5 Kanga enginya hatelamɛ nto ɔnɛ kanga lokaho,
Ndo onto lɔnyɔla atɔndɔ hatelamɛ nto ɔnɛ ɔlɔhɛ;
6 Nɛ dia kanga enginya ayɔtɛkɛta ɔtɛkɛtatɛkɛta,
Ndo otema ande wayokongɛ akambo wa kɔlɔ,+
Dia ntondja wetshelo w’ɛtɔlɔki* ndo ɛtɛkɛta wa kɔlɔ walɔshana la Jehowa,
Dia ntshika onto lele la ndjala* dia nde ntshɔ aha la ndɛ
Ndo dia dima onto lele la mposa k’ashi ɛngɔ ka nnɔ.
7 Alako w’onto lahayele atɔndɔ wekɔ kɔlɔ;+
Nde sukɛka lɔkɛwɔ la nsɔnyi
Dia ndanya ɔmɛnyi mfɔnu la kashi,+
Kaanga etena katɛkɛta ose wola dikambo di’ɔlɔlɔ.
8 Koko, kanga lokaho ekɔ la tokanyi ta lokaho,
Ndo nde tetemalaka mbidja wolo lo lokaho.*
9 “Nyu wamato wadjasɛ wodjasɛdjasɛ, nyemale ndo nyohokame dui diami!
Nyu ana wa wamato wahadje dui yimba,+ nyodje yimba lo kɛnɛ katami!
10 L’ɔkɔngɔ w’ɔnɔnyi ɔtɔi la yema, nyu wanɛ wahadje dikambo yimba, nyayodidima,
Nɛ dia ndooko olowa wayotshumanyema etena kayokomɛ dinela di’elowa.+
11 Nyu wamato wadjasɛ wodjasɛdjasɛ, nyosake lokomba!
Nyu wanɛ wahadje dikambo yimba, nyodidime!
Nyokolole ahɔndɔ anyu,
Ndo nyɔlɔtɛ akoto lo nkende yanyu.+
12 Nyoyakɔmɔlɛ lo ntolo la delo
L’ɔtɛ wa dikambɔ di’amɛna ndo w’ɛkɔdi wa vinyɔ watɔ elowa efula.
13 Nɛ dia nkɛtɛ y’anto ami yayolola la atɛndɛ ndo la adungu;
Vɔ wayolola lo mvudu tshɛ y’ɔngɛnɔngɛnɔ,
Ɛɛ, osomba w’ɔngɛnɔngɛnɔ.+
14 Nɛ dia tshoto yodingami la mpele yambɔsɛkama;
Osomba wa londjo wambotshikala vɔamɛ.+
Ɔfɛlɛ+ la tshoto y’etangelo aya tɔngɔ dia pondjo,
Ɔngɛnɔngɛnɔ dikambo dia mponda ya l’okonda,
Dihole dialɛ nyama adiyo,+
15 Polo ndo nyuma kambotshulɔ le so oma la diko,+
Ndo oswe wa shɛnga waya ekambɔ k’elowa,
Ndo ekambɔ k’elowa kɔsama oko okonda.+
16 Oma laasɔ, sambo k’ɔlɔlɔ kayodjasɛka l’oswe wa shɛnga,
Ndo losembwe layodjasɛka lo ekambɔ k’elowa.+
17 Wɔladi+ mbayonga etombelo w’oma lo losembwe la mɛtɛ,
Ndo ki la lotui tshitshi+ la pondjo mbayonga elowa w’oma lo losembwe la mɛtɛ.
18 Anto ami wayodjasɛ lo dihole dia wɔladi w’efula,
Lo didjaselo dia lotui tshitshi ndo lo ahole wa diomuyelo wa ki.+
19 Koko mbɔkɔ ya mvula yayolanya okonda,
Ndo osomba wayokitshakitshama tshɛ lo tshɛ.