1 Nkumi ya dikanga

11 Koko nkumekanga Sɔlɔmɔna akalange wamato efula w’ase wedja+ ekina ɛnɛ laadiko dia ɔna Farawɔ la womoto:+ Wamato w’ase Mɔaba,+ ase Amɔna,+ ase Ɛdɔmɛ, ase Sidɔna+ ndo ase Hiti.+ 2 Vɔ waki ase wedja wakatɛ Jehowa ase Isariyɛlɛ ate: “Tanyɔtɔke l’atei awɔ* ndo vɔ hawohombe mbɔtɔ l’atei anyu, nɛ dia ndooko onyake vɔ wayokadimola etema anyu dia ndjela tozambizambi+ tawɔ.” Koko Sɔlɔmɔna akaamamema ndo akaalange. 3 Nde aki la wadi 700 waki ana wa nkumi ya dikanga ndo eseka 300, ko wadiɛnde wakatakotolaka otema ande* yema yema. 4 Lam’akatshunde Sɔlɔmɔna osombe,+ wadiɛnde wakɛngɛsɔla* otema ande dia ndjela tozambizambi tokina,+ ko otema ande komonga nto tshɛ lo tshɛ le* Jehowa Nzambi kande, oko waki otema wa Davidɛ she. 5 Ko Sɔlɔmɔna akayele Ashitɔrɛtɛ,+ jambizambi ya womoto y’ase Sidɔna ndo Milikɔmɛ,+ jambizambi ya nyɛtɛɛtɛ y’ase Amɔna. 6 Ɔnkɔnɛ, Sɔlɔmɔna akasale kɛnɛ kaki kɔlɔ lo washo wa Jehowa ndo nde kondjela Jehowa tshɛ lo tshɛ oko wakasale Davidɛ she.+

7 L’etena kɛsɔ mbakasale Sɔlɔmɔna dihole dia la diko+ dikambo dia Kɛmɔshɛ, jambizambi ya nyɛtɛɛtɛ y’ase Mɔaba lo dikona diɛlane la Jɛrusalɛma ndo dikambo dia Mɔlɛka,+ jambizambi ya nyɛtɛɛtɛ y’ase Amɔna.+ 8 Kɛsɔ mbakandasalɛ wadiɛnde tshɛ w’ase wedja ekina wakatshumbaka elambo ndo wakalambolɛka tozambizambi tawɔ elambo.

9 Jehowa akomalɛ Sɔlɔmɔna, nɛ dia otema ande wakamɔ oma le Jehowa Nzambi k’Isariyɛlɛ+ lakɛnama le nde mbala 2+ 10 ndo lakɔɔhɛmɔla lo dikambo diakɔ diaha nde ndjela tozambizambi tokina.+ Koko nde kokitanyiya kɛnɛ kakawodjangɛ Jehowa. 11 Ko Jehowa akatɛ Sɔlɔmɔna ate: “Lam’ele wɛ ambosala dikambo nɛ ndo wɛ halami sheke yami ndo wadjango ami wakamakodjangɛ, ndooko onyake dimi layokɔhɔtɔla diolelo ko layodisha okambi ayɛ+ ɔmɔtshi. 12 Koko l’ɔtɛ wa Davidɛ dia shɔ, dimi hantosala dui sɔ etena kekeyɛ la lɔsɛnɔ. Dimi layodinya oma lo anya w’ɔnayɛ,+ 13 koko dimi hantonya diolelo di’otondo.+ Dimi layosha ɔnayɛ+ dioho 1 l’ɔtɛ w’okambi ami Davidɛ ndo l’ɔtɛ wa Jɛrusalɛma yakamasɔnɛ.”+

14 Oma laasɔ, Jehowa akatondja ɔndɔshi dia ndɔshana la Sɔlɔmɔna,+ Hadada ose Ɛdɔmɛ, lo nkumbo k’owandji wa la Ɛdɔmɛ.+ 15 Lam’akalɛndja Davidɛ Ɛdɔmɛ,+ Jɔaba owandji w’asɔlayi akatshu tokundɛ edo ndo nde akayange dia ndjaka apami tshɛ waki la Ɛdɔmɛ. 16 (Nɛ dia Jɔaba nde l’ase Isariyɛlɛ tshɛ wakatshikala lɛkɔ l’edja ka ngɔndɔ 6 polo lam’akandashile* apami tshɛ wa la Ɛdɔmɛ oshiki.) 17 Koko Hadada akalawɔ nde l’ekambi wa she w’ase Ɛdɔmɛ, ko vɔ wakatshu l’Edjibito. L’etena kɛsɔ ko Hadada eke dikɛnda. 18 Ɔnkɔnɛ, vɔ wakonɛɛ oma la Midiyana ko wakakome la Parana. Vɔ wakɔshi apami w’oma la Parana+ ko wakatshu kaamɛ la wɔ l’Edjibito le Farawɔ nkumekanga k’Edjibito ɔnɛ lakawosha luudu, lakawoshaka mbo ya ndɛ ndo lakawosha ɛtshi ka nkɛtɛ. 19 Hadada akahomɔ lokolo l’ɔlɔ lo washo wa Farawɔ polo lo nde mbotshukanya la kose aki Tapɛnɛsɛ ka wadɛnde, wadi aki nkumekanga. 20 Oma laasɔ, kose aki Tapɛnɛsɛ akote la nde ɔna pami, Ngɛnubata, ko Tapɛnɛsɛ akɔɔtɔlɛ* lo luudu la Farawɔ ndo Ngɛnubata akatshikala lo luudu la Farawɔ l’atei w’ana w’apami wa Farawɔ.

21 Hadada akoke l’Edjibito dia Davidɛ ambetama dia momuya kaamɛ la watshɛnde+ ndo ɔnɛ Jɔaba owandji w’asɔlayi ambovɔ.+ Ko Hadada akatɛ Farawɔ ate: “Ɔnkɛndja kele ntshu lo wodja aso.” 22 Koko Farawɔ akawotɛ ate: “Kakɔna keyɛ bu la tɔ lalemi lanɛ koyona dia ntshɔ lo wodja anyu?” Ko nde akate ate: “Ndooko ɛngɔ, koko lam’alangayɛ, ɔnkɛndja.”

23 Ndo nto, Nzambi akatondja ɔndɔshi+ okina dia ndɔsha Sɔlɔmɔna: Rɛzɔna ɔna Eliyada lakalawɔ oma le nkumɛnde Hadadɛzɛrɛ+ laki nkumekanga ka Zoba. 24 Nde akayatshumanyɛ apami ndo akayala owandji w’olui wa dengalenga etena kakalɛndja*+ Davidɛ apami w’ase Zoba. Ko vɔ wakatshu otsha la Damasɛkɛ,+ wakatodjasɛ lɛkɔ ko wakatotatɛ mbolɛ la Damasɛkɛ. 25 Nde akayala ɔndɔshi wa Isariyɛlɛ nshi tshɛ ya Sɔlɔmɔna, laadiko dia kɔlɔ kakasale Hadada ndo nde akahetsha Isariyɛlɛ etena kakandolɛka la Suriya.

26 L’etena kɛsɔ kaki Jɛrɔbɔama+ ɔna Nebatɛ, ose Efrayimɛ l’oma la Zɛrɛda, okambi waki Sɔlɔmɔna+ wele nyango aki wadi aki odo, lokombo lande Zerua. Nde lawɔ akatatɛ tɔmbɔkwɛ* nkumekanga.+ 27 Lo ɔkɔkɔ ɔnɛ mbakandatɔmbɔkwɛ nkumekanga: Sɔlɔmɔna akake Milo*+ ndo akadihe wosho wa l’ehele ka l’Osomba wa Davidɛ she.+ 28 Jɛrɔbɔama shɔ aki pami kaki la akoka. Lam’akɛnyi Sɔlɔmɔna dia ɔlɔngɔ a pami akɔ aki okambi w’olimu wa wolo, nde akawodje omendji+ w’elimu tshɛ wa la wolo wa lo luudu la Yɔsɛfu. 29 L’etena kɛsɔ, Jɛrɔbɔama akatombe oma la Jɛrusalɛma ko omvutshi Ahidja+ ose Shilo akawɛnyi lo mboka. Ahidja akalɔtɛ dihɔndɔ di’oyoyo ndo vɔ waki paka vɔ 2 ato l’oswe. 30 Ahidja akɔshi dihɔndɔ di’oyoyo diakandalɔtɛ, ko akadiatshatsha lo bɛtshi 12. 31 Oma laasɔ, nde akatɛ Jɛrɔbɔama ate:

“Ɔsa bɛtshi 10 dikambo diayɛ, nɛ dia Jehowa Nzambi k’Isariyɛlɛ kata ate: ‘Dimi layanga minya diolelo oma l’anya wa Sɔlɔmɔna ndo layokosha waoho 10.+ 32 Koko dioho dimɔtshi diayotshikala diande+ l’ɔtɛ w’okambi ami Davidɛ+ ndo l’ɔtɛ wa Jɛrusalɛma, osomba wakamasɔnɛ l’atei wa waoho tshɛ w’Isariyɛlɛ.+ 33 Dimi layosala dui sɔ, nɛ dia vɔ wambontshika+ ko wokusamɛ Ashitɔrɛtɛ jambizambi ya womoto y’ase Sidɔna, Kɛmɔshɛ jambizambi y’ase Mɔaba ndo Milikɔmɛ jambizambi y’ase Amɔna, ndo vɔ hawɔkɛndjikɛndji lo mboka yami lo nsala kɛnɛ kele ɔlɔlɔ lo washo ami ndo lo nkitanyiya wadjango ami la dombwelo diami, oko wakasalaka Davidɛ dia she Sɔlɔmɔna. 34 Koko dimi hantɔsa diolelo di’otondo oma l’anya ande ndo dimi layowotshika owandji lo nshi tshɛ ya lɔsɛnɔ lande l’ɔtɛ w’okambi ami Davidɛ lakamasɔnɛ,+ nɛ dia nde akakitanyiya ɛlɛmbɛ ami la wadjango ami. 35 Dimi layɔsa diolelo oma l’anya w’ɔnande ko dimi koshadiɔ, mbuta ate waoho 10.+ 36 Dimi layosha ɔnande dioho 1, dia okambi ami Davidɛ mongaka nshi tshɛ la tala dimɔtshi la ntondo kami la Jɛrusalɛma,+ osomba wakamayasɔnɛ oko dihole dia nkitsha lokombo lami. 37 Dimi layokɔsa ko wɛ ayolɛ kɛnɛ tshɛ kakombolayɛ* ndo wɛ ayonga nkumekanga k’Isariyɛlɛ. 38 Ndo naka wɛ nkitanyiya kɛnɛ tshɛ kakodjangɛmi, wɛ nkɛndakɛnda lo mboka yami ndo wɛ nsala kɛnɛ kele ɔlɔlɔ lo washo ami lo nkitanyiya wadjango ami la ɛlɛmbɛ ami, oko wakasale Davidɛ di’okambi ami,+ kete dimi lawɔ layonga kaamɛ la yɛ. Dimi layokohikɛ luudu la pondjo, oko wakamahikɛ Davidɛ+ ndo dimi layokosha Isariyɛlɛ. 39 Dimi layosha tokanula ta Davidɛ nsɔnyi l’ɔtɛ wa dikambo nɛ,+ koko aha pondjo.’”+

40 Ko Sɔlɔmɔna akayange ndjaka Jɛrɔbɔama, koko Jɛrɔbɔama akalawɔ l’Edjibito le Shishakɛ+ nkumekanga k’Edjibito+ ndo nde akatshikala l’Edjibito polo lam’akavu Sɔlɔmɔna.

41 Lo kɛnɛ kendana l’etenyi kekina k’ɔkɔndɔ wa Sɔlɔmɔna, kɛnɛ tshɛ kakandasale ndo lomba lande, shi awui asɔ fundama lo dibuku di’ɔkɔndɔ wa Sɔlɔmɔna?+ 42 Sɔlɔmɔna akolɛ Isariyɛlɛ w’otondo oma la Jɛrusalɛma l’edja k’ɛnɔnyi 40. 43 Oma laasɔ, Sɔlɔmɔna aketama dia momuya kaamɛ la watshɛnde, ko wakookundɛ l’Osomba wa Davidɛ dia she. Ko ɔnande Rɛhɔbɔama+ akayala nkumekanga lo dihole diande.