ƐZƐRA

1 L’ɔnɔnyi wa ntondo w’ɛlɔmbwɛlɔ ka Kurɔ+ nkumekanga ka Pɛrɛsiya, dia ɔtɛkɛta wa Jehowa wakandate lo tshimbo ya Jɛrɛmiya+ kotshama, Jehowa akasɛngiya yimba ya Kurɔ nkumekanga ka Pɛrɛsiya dia mbisha diewoyelo lo diolelo diande di’otondo, diewoyelo diakandafunde lofunda+ ate:

2 “Kurɔ nkumekanga ka Pɛrɛsiya kata ate: ‘Jehowa Nzambi ka l’olongo akambisha waolelo tshɛ wa la nkɛtɛ,+ ndo nde akambisha ɔkɛndɛ wa mbokɛ luudu la Jɛrusalɛma+ ya la Juda. 3 Onto tshɛ la l’atei anyu lele l’atei wa wodja ande ɔsɔ tshɛ, Nzambi kande ayale la nde ndo atshu la Jɛrusalɛma ya la Juda, kele atohike nto luudu la Jehowa Nzambi k’Isariyɛlɛ, nde kele Nzambi ka mɛtɛ, ɔnɛ lele luudu lande laki la Jɛrusalɛma.* 4 Onto tshɛ lele ɔngɛndangɛnda,+ oyadi dihole diakɔna diende, asukanyi* ande wookimanyiya lo mbosha mfɛsa, paonyi, diangɔ ndo dongalonga kaamɛ la woshasha wa la lolango dikambo dia luudu la Nzambi+ ka mɛtɛ laki la Jɛrusalɛma.’”

5 Oma laasɔ, ɛtɛ wa nkumbo ya washe ase Juda la Bɛnjamina ndo ɛlɔmbɛdi l’ase Lɛwi, onto tshɛ lele Nzambi ka mɛtɛ akasɛngiya yimba yande akayalɔngɔsɔla dia tohika nto luudu la Jehowa laki la Jɛrusalɛma. 6 Asukanyi awɔ tshɛ wakaasukɛ lo mbasha* diangɔ dia mfɛsa ndo dia paonyi, diangɔ, dongalonga ndo diangɔ dia nɛmɔ, aha la mbidja weshasha tshɛ wa la lolango.

7 Ndo nto, nkumekanga Kurɔ akatondja diangɔ dia lo luudu la Jehowa diakatɔsa Nɛbukadinɛza oma la Jɛrusalɛma ko nde ndjodidja lo luudu la jambizambi yande.+ 8 Kurɔ nkumekanga ka Pɛrɛsiya akaditondja lo ɛlɔmbwɛlɔ ka Mitirɛdatɛ laki omombi wa diangɔ dia nɛmɔ, ko nde akasale owadi adiɔ, akadisha Sheshibazara*+ owandji wa Juda.

9 Kɛnɛ kakawatane l’owadi akɔ tɔ kɛnɛ: Diangɔ dia paonyi 30 diele oko asaka, diangɔ dia mfɛsa kinunu (1 000) diele oko asaka, diangɔ dikina 29, 10 tɔlɔngalɔnga 30 t’afuku ta paonyi, tɔlɔngalɔnga 410 t’afuku ta mfɛsa ndo diangɔ dikina nto kinunu (1 000). 11 Diangɔ dia paonyi ndo dia mfɛsa diaki tshɛ tshɛ nunu tanu la nkama nyɛi (5 400). Sheshibazara akatɔlɛ diangɔ sɔ tshɛ lam’akakalola wanɛ waki mfumbe+ oma la Babilɔna otsha la Jɛrusalɛma.

2 Anto anɛ wa lo prɔvɛnsɛ mbakaye oma lo lɔhɔmbɔ,+ wanɛ wele Nɛbukadinɛza nkumekanga ka Babilɔna akaatɔlɛ lo lɔhɔmbɔ la Babilɔna+ ndo wakayokalola l’ɔkɔngɔ diko la Jɛrusalɛma ndo la Juda, onto l’onto lo osomba awɔ hita,+ 2 wanɛ wakaye kaamɛ la Zerubabɛlɛ,+ Jeshua,+ Nɛhɛmiya, Seraya, Relaya, Mɔrɔdɛkai, Bilisha, Misipara, Bingivai, Rɛhumɛ ndo Baanahɛ.

Lofulo l’apami w’ase Isariyɛlɛ lakendanaka ndo la anto anɛ:+ 3 Ana w’apami wa Parɔshɛ nunu pende la lokama l’akumi esambele l’ahende (2 172); 4 ana w’apami wa Shefatiya 372; 5 ana w’apami wa Ara+ 775; 6 ana w’apami wa Pahata-Mɔaba,+ oma le ana w’apami wa Jeshua nde la Jɔaba nunu pende la nkama enanɛi la dikumi l’ahende (2812); 7 ana w’apami wa Elama+ kinunu la nkama hiende l’akumi atanu l’anɛi (1 254); 8 ana w’apami wa Zatu+ 945; 9 ana w’apami wa Zakai 760; 10 ana w’apami wa Bani 642; 11 ana w’apami wa Bebai 623; 12 ana w’apami wa Azingadɛ kinunu la nkama hiende l’akumi ahende l’ahende (1 222); 13 ana w’apami wa Adɔnikamɛ 666; 14 ana w’apami wa Bingivai nunu pende l’akumi atanu l’asamalo (2 056); 15 ana w’apami wa Adinɛ 454; 16 ana w’apami wa Atɛra, oma le Hɛzɛkiya 98; 17 ana w’apami wa Bezai 323; 18 ana w’apami wa Jɔra 112; 19 ana w’apami wa Hashuma+ 223; 20 ana w’apami wa Ngibara 95; 21 ana w’apami wa Bɛtɛlɛhɛma 123; 22 apami wa Netɔfa 56; 23 apami wa Anatɔta+ 128; 24 ana w’apami wa Azɛmavɛta 42; 25 ana w’apami wa Kiriatɛ-Jarima, Kɛfira ndo Berɔtɛ 743; 26 ana w’apami wa Rama+ nde la Ngɛba+ 621; 27 apami w’ase Mikimasi 122; 28 apami w’ase Bɛtɛlɛ ndo Ai+ 223; 29 ana w’apami wa Nɛbɔ+ 52; 30 ana w’apami wa Mangɛbishi 156; 31 ana w’apami wa Elama okina kinunu la nkama hiende l’akumi atanu l’anɛi (1 254); 32 ana w’apami wa Harimɛ 320; 33 ana w’apami wa Loda, Hadida ndo Ono 725; 34 ana w’apami wa Jeriko 345; 35 ana w’apami wa Sena nunu sato la nkama shamalo l’akumi asato (3 630).

36 Ɛlɔmbɛdi:+ Ana w’apami wa Jedaya+ wa lo nkumbo ka Jeshua+ 973; 37 ana w’apami wa Imɛrɛ+ kinunu l’akumi atanu l’ahende (1 052); 38 ana w’apami wa Pashura+ kinunu la nkama hiende l’akumi anɛi l’esambele (1 247); 39 ana w’apami wa Harimɛ+ kinunu la dikumi l’esambele (1 017).

40 Ase Lɛwi:+ Ana w’apami wa Jeshua nde la Kadimiyɛlɛ,+ oma le ana w’apami wa Hɔdavia 74. 41 Amembi:+ Ana w’apami wa Asafu+ 128. 42 Ana w’apami w’alami w’asoko:+ Ana w’apami wa Shaluma, ana w’apami wa Atɛra, ana w’apami wa Talamɔna,+ ana w’apami wa Akuba,+ ana w’apami wa Hatita, ana w’apami wa Shobai, tshɛ tshɛ 139.

43 Ekambi wa lo tɛmpɛlɔ:*+ Ana w’apami wa Ziha, ana w’apami wa Hasufa, ana w’apami wa Tabaota, 44 ana w’apami wa Kerosɛ, ana w’apami wa Siaha, ana w’apami wa Padɔna, 45 ana w’apami wa Lebana, ana w’apami wa Hangaba, ana w’apami wa Akuba, 46 ana w’apami wa Hangabɛ, ana w’apami wa Salamai, ana w’apami wa Hanana, 47 ana w’apami wa Ngidɛlɛ, ana w’apami wa Ngahara, ana w’apami wa Reaya, 48 ana w’apami wa Rɛzina, ana w’apami wa Nɛkoda, ana w’apami wa Ngazama, 49 ana w’apami wa Uza, ana w’apami wa Pasea, ana w’apami wa Besai, 50 ana w’apami wa Asina, ana w’apami wa Meunima, ana w’apami wa Nɛfusimɛ, 51 ana w’apami wa Bakɛbukɛ, ana w’apami wa Hakufa, ana w’apami wa Harura, 52 ana w’apami wa Bazilutɛ, ana w’apami wa Mehida, ana w’apami wa Harasha, 53 ana w’apami wa Barakɔsɛ, ana w’apami wa Sisɛra, ana w’apami wa Tɛma, 54 ana w’apami wa Neziya, ana w’apami wa Hatifa.

55 Ana w’apami w’ekambi wa Sɔlɔmɔna: Ana w’apami wa Sotai, ana w’apami wa Sɔfɛrɛtɛ, ana w’apami wa Peruda,+ 56 ana w’apami wa Jaala, ana w’apami wa Darakɔna, ana w’apami wa Ngidɛlɛ, 57 ana w’apami wa Shefatiya, ana w’apami wa Hatilɛ, ana w’apami wa Pɔkɛrɛtɛ-Hazɛbaima, ana w’apami wa Ami.

58 Ekambi wa lo tɛmpɛlɔ* ndo ana w’apami w’ekambi wa Sɔlɔmɔna waki tshɛ tshɛ 392.

59 Anto anɛ mbakonɛɛ oma la Tɛlɛ-Mela, Tɛlɛ-Harasha, Kerubɛ, Adɔna ndo Imɛrɛ, koko vɔ komonga la akoka wa ntshimola ɔkɔndɔ wa luudu la washɛwɔ ndo ɔlɔndji awɔ dia mbeya kana waki ase Isariyɛlɛ:+ 60 Ana w’apami wa Delaya, ana w’apami wa Tobiya, ana w’apami wa Nɛkoda, 652. 61 Oma l’atei w’ana w’apami w’ɛlɔmbɛdi: Ana w’apami wa Habaya, ana w’apami wa Hakɔzɛ,+ ana w’apami wa Barazilai ɔnɛ lakatshuke wadi oma l’atei w’ana wa wamato wa Barazilai+ ose Ngiliyadɛ, ko nde ndjɔsa lokombo lawɔ. 62 Vɔ wakayange lo ɛkɔndɔ awɔ dia nshikikɛ ɔlɔndji awɔ, koko vɔ kɔmɛna; ɔnkɔnɛ vɔ kokotsha nto kɛnɛ kalɔmbama dia nkamba olimu w’ɔlɔmbɛdi.*+ 63 Nguvɛrnɛrɛ* akawatɛ dia takawakoke ndɛ diangɔ+ dioleki ekila polo lam’akahombe tanema ɔlɔmbɛdi wakakoke nsala diendja la Urimɛ ndo Tumimɛ.+

64 Lofulo l’ase etshumanelo k’otondo laki tshɛ tshɛ nunu akumi anɛi la pende la nkama shato l’akumi asamalo (42 360),+ 65 aha la mbidja mfumbe yawɔ y’apami ndo ya wamato yaki nunu esambele la nkama shato l’akumi asato l’esambele (7 337); vɔ waki ndo la amembi w’apami ndo wa wamato 200. 66 Mfalasa yawɔ yaki 736, mfalo yawɔ yaki 245, 67 kamɛlɔ yawɔ yaki 435, mponda yawɔ yaki nunu samalo la nkama esambele l’akumi ahende (6 720).

68 Lam’akawakome suke la luudu la Jehowa la Jɛrusalɛma, ɛtɛ ɛmɔtshi wa nkumbo ya washɛwɔ wakakimɔ weshasha wa la lolango+ dikambo dia luudu la Nzambi ka mɛtɛ dia lika nto* lo dihole dialɔ.+ 69 Lo dikambo dia olimu ɔsɔ, vɔ wakakimɔ drakimɛ* nunu akumi asamalo l’ɔtɔi (61 000) dia paonyi, mina*+ nunu tanu (5 000) ya mfɛsa ndo ekutu 100 dikambo dia ɛlɔmbɛdi lo ndjela ekondjelo kawɔ. 70 Ɛlɔmbɛdi, ase Lɛwi, anto amɔtshi, amembi, alami w’asoko ndo ekambi wa lo tɛmpɛlɔ* wakadjasɛ lo esomba awɔ, ndo ase Isariyɛlɛ akina tshɛ* wakadjasɛ lo esomba awɔ.+

3 Lam’akakoke ngɔndɔ+ ka 7 ndo lam’aki ase Isariyɛlɛ* lo esomba awɔ, vɔ wakasangana kaamɛ la Jɛrusalɛma. 2 Jeshua+ ɔna Jɛhɔzadaka nde l’ɛlɔmbɛdi w’asekande ndo Zerubabɛlɛ+ ɔna Shɛalatiyɛlɛ+ la anango wakemala ko wakasale elambwelo ka Nzambi k’Isariyɛlɛ dia vɔ nambolaka elambo wa lotshumba lɔkɔ, oko wofundamidiɔ lo Ɛlɛmbɛ wa Mɔsɛ+ okambi wa Nzambi ka mɛtɛ.

3 Ɔnkɔnɛ vɔ wakemɛ elambwelo lam’akitɔ ntondo, kaanga mbakiwɔ la wɔma w’ase wedja wakaadinge,+ ko wakatatɛ nambola Jehowa elambo wa lotshumba lɔkɔ, elambo wa lotshumba wa pindju la dikɔlɔ.+ 4 Oma laasɔ, vɔ wakasale Fɛtɛ ka Totombotombo* lo ndjela kɛnɛ kofundami,+ ndo vɔ wakalambolaka lushi la lushi lofulo shikaa l’elambo wa lotshumba lakalɔmbamaka lushi tshɛ.+ 5 L’ɔkɔngɔ wa laasɔ, vɔ wakalambola olambo wa lotshumba wa mbala la mbala+ ndo elambo wendana la towalelo ta ngɔndɔ+ ndo wendana la fɛtɛ tshɛ ya deko+ yakakidiama ya Jehowa, mbidja ndo wɛnɛ w’oma le onto tshɛ laketawɔka mbisha Jehowa woshasha wa la lolango.+ 6 Lo ngɔndɔ ka 7+ lushi 1, vɔ wakatatɛ nambola Jehowa elambo wa lotshumba, kaanga mbele etshina ka tɛmpɛlɔ ka Jehowa kaki katahikama.

7 Vɔ wakasha ambatshi w’ave+ la etshudi+ falanga, ndo wakasha ase Sidɔna l’ase Tura mbo ya ndɛ la ya nnɔ ndo esɔ dia vɔ mbaelaka abaya w’elondo lo ndjale oma la Lɛbanɔna polo la Jɔpa,+ lo ndjela lotshungɔ lakawasha Kurɔ nkumekanga ka Pɛrɛsiya.+

8 Lo ngɔndɔ ka 2 ka l’ɔnɔnyi wa 2 l’ɔkɔngɔ wa vɔ ndja lo luudu la Nzambi ka mɛtɛ la Jɛrusalɛma, Zerubabɛlɛ ɔna Shɛalatiyɛlɛ, Jeshua ɔna Jɛhɔzadaka ndo anangɛwɔ akina tshɛ, ɛlɔmbɛdi l’ase Lɛwi, ndo wanɛ tshɛ wakaye la Jɛrusalɛma oma lo lɔhɔmbɔ+ wakatatɛ olimu. Vɔ wakasɔnɛ ase Lɛwi waki l’ɛnɔnyi oma lo 20 otsha la diko dia vɔ monga ɛnɔmbɔdi w’olimu wa luudu la Jehowa. 9 Ɔnkɔnɛ Jeshua, anande w’apami la anango, ndo Kadimiyɛlɛ la anande w’apami, ana w’apami wa Juda, wakasangana kaamɛ dia nɔmbɔlaka wanɛ wakamba olimu lo luudu la Nzambi ka mɛtɛ, kaamɛ l’ana w’apami wa Henadada,+ anawɔ w’apami la anangɛwɔ, ase Lɛwi.

10 Lam’akasale ambiki etshina ka tɛmpɛlɔ ka Jehowa,+ ɛlɔmbɛdi waki la ahɔndɔ awɔ w’ɛlɔmbɛdi, wokime amama,+ ndo ase Lɛwi, ana w’apami wa Asafu wele la nsɛmbalɛ wakemala dia ntombola Jehowa lo ndjela ɛlɔmbwɛlɔ ka Davidɛ nkumekanga k’Isariyɛlɛ.+ 11 Ko vɔ wakatatɛ memba la lokaloya,+ watombola Jehowa ndo wawosha losaka, “nɛ dia nde ekɔ ɔlɔlɔ; ngandji kande ka kɔlamelo otsha le Isariyɛlɛ tshikalaka pondjo.”+ Oma laasɔ, anto tshɛ wakade ekoko la dui dia wolo dia ntombola Jehowa dikambo etshina ka luudu la Jehowa kambosalema. 12 Efula k’ɛlɔmbɛdi, ase Lɛwi ndo ɛtɛ wa nkumbo ya washɛwɔ, epalanga w’anto wakɛnyi luudu la ntondo,+ wakalele la dui dia wolo lam’akawɛnyi etshina ka luudu lakɔ kambosalema, etena kakadaka anto akina efula ekoko w’ɔngɛnɔngɛnɔ la wolo awɔ tshɛ.+ 13 Ɔnkɔnɛ, anto kokoka ntshikitanya londjo la ekoko w’ɔngɛnɔngɛnɔ la londjo la alelo, nɛ dia anto wakadaka ekoko la wolo efula lo yɛdikɔ yele ekoko akɔ wakokɛka l’etale efula.

4 Lam’akoke atunyi wa Juda la Bɛnjamina+ dia wanɛ wakakalola oma lo lɔhɔmbɔ+ wohikɛ Jehowa Nzambi k’Isariyɛlɛ tɛmpɛlɔ, 2 mbala kakɔ ɔtɔi vɔ wakatshu le Zerubabɛlɛ nde la ɛtɛ wa nkumbo ya washɛwɔ, ko wakatowatɛ vate: “Nyetawɔ dia sho mbika kaamɛ la nyu; nɛ dia sho lawɔ tekɔ lo ntɛmɔla* Nzambi+ kanyu oko nyu ndo sho tambotatɛka mbolambola elambo oma ko nshi ya Esarɛ-Hadɔna+ nkumekanga k’Asuriya lakatela lanɛ.”+ 3 Koko Zerubabɛlɛ nde la Jeshua ndo ɛtɛ ekina tshɛ wa nkumbo ya washɛwɔ ya lo Isariyɛlɛ wakawatɛ vate: “Ndooko kasaso la nyu lo wokelo wa luudu la Nzambi kaso,+ nɛ dia shoamɛ tayolika dikambo dia Jehowa Nzambi k’Isariyɛlɛ, oko wakatodjangɛ nkumekanga Kurɔ nkumekanga ka Pɛrɛsiya.”+

4 Oma laasɔ, ase ngelo wakatetemalaka ntɛwɔla* ase Juda ndo mbawata asolo dia vɔ ntshika mbika.+ 5 Vɔ wakatofuta andaki amɔtshi falanga dia mbasha alako wa kɔlɔ l’oyango wa mfukutanya ekongelo+ kawɔ lo nshi tshɛ yakolɛka Kurɔ nkumekanga ka Pɛrɛsiya polo lam’akolɛ Dariyo+ nkumekanga ka Pɛrɛsiya. 6 L’etatelo k’ɛlɔmbwɛlɔ ka Ahasuɛrɔ, vɔ wakafunde ase Juda ndo ase Jɛrusalɛma. 7 Lo nshi yakolɛka Aratashasha nkumekanga ka Pɛrɛsiya, Bishilamɛ, Mitirɛdatɛ, Tabɛlɛ ndo asekande akina tshɛ wakafundɛ nkumekanga Aratashasha mukanda. Vɔ wakakadimola mukanda akɔ lo Arameyɛ+ lo mbofunda la alɛta wa lo Arameyɛ.*

8 * Rɛhumɛ owandji w’ɛlɔhɛ w’aseka lɛɛta nde la ofundji Shimishai wakafundɛ nkumekanga Aratashasha mukanda lo dikambo dia Jɛrusalɛma ɔnɛ: 9 (Mukanda akɔ waki oma le Rɛhumɛ owandji w’ɛlɔhɛ w’aseka lɛɛta nde la ofundji Shimishai la asekawɔ akina, toshushi ndo nguvɛrnɛrɛ ya l’ɛse, afundji, ase Erɛkɛ,+ ase Babilɔna, wanɛ wakadjasɛka la Susa,+ mbuta ate ase Elama,+ 10 ndo wedja ekina tshɛ wele shakasaka Asinapara akawande lo lɔhɔmbɔ ndo akawadjashiya lo esomba wa la Samariya,+ ndo anto akina tshɛ wa lo ɛtshi ka nkɛtɛ ka la Wedi w’Ɔkɛdi,* ndo 11 kɛnɛ kaki lo mukanda akɔ wakawootomɛ tɔ kɛnɛ.)

“Le nkumekanga Aratashasha, oma le ekambi ayɛ w’apami w’oma la wedi w’Ɔkɛdi: Wonya ɔnɛ, 12 nkumekanga le, eya dia ase Juda wakaye lanɛ le so oma le yɛ wakakome la Jɛrusalɛma. Vɔ wekɔ lo mbika nto osomba w’atɔmbɔki ndo w’akanga wa kɔlɔ, vɔ wayanga nshidiya mpele+ ndo ɔlɔngɔswɛlɔ wa atshina. 13 Nkumekanga le, eya dia naka osomba ɔnɛ mbikama nto ndo mpele diawɔ shidiyama, vɔ hawotofuta mikanda, elambo+ kana ɛkɔngɔ ndo etombelo wayonga la dui sɔ ele, oshishelo wayonga efula lo waombelo wa nkumi ya dikanga. 14 Lam’ele tekɔ lo ndɛ lɛɛhɔ l’oma lo luudu l’owandji* ndo keema dimɛna dia sho mɛnaka wahɔ wa nkumekanga walanyema, diakɔ diambototoma dikɛndji nɛ dia kewoya dui sɔ, wɛ nkumekanga, 15 kele eyangelo wasaleme lo dibuku di’ɛkɔndɔ wa watshɛyɛ.+ Wɛ ayɛna lo dibuku diakɔ di’ɛkɔndɔ ndo ayeya dia osomba ɔnɛ wekɔ osomba w’atɔmbɔki, osomba wa kɔlɔ le nkumi ya dikanga ndo le prɔvɛnsɛ, ndo lɔkɔ mbookongaka wanɛ watshutshuya anto lo ɔtɔmbɔkwɛlɔ oma ko nshi y’edjedja. Diakɔ diakalanyema+ osomba akɔ. 16 Tekɔ lo nanga mbewoya nkumekanga dia naka osomba ɔnɛ mbikama nto ndo naka mpele diawɔ nshila, kete wɛ hatɔlɔmbɔla ɛtshi ka nkɛtɛ ka la Wedi w’Ɔkɛdi nto.”+

17 Nkumekanga akatomɛ Rɛhumɛ owandji w’ɛlɔhɛ w’aseka lɛɛta nde la ofundji Shimishai la asekawɔ akina tshɛ wakadjasɛka la Samariya ndo l’ɛtshi ka nkɛtɛ tshɛ ka la wedi w’Ɔkɛdi dui ate:

“Mɔyɔ! Wonya ɔnɛ, 18 mukanda wakanyatotomɛ wambadiema hwe* la ntondo kami. 19 Lo ndjela didjango diami, eyangelo wakasalema ndo akɛnama dia oma ko edjedja, anto wa l’osomba akɔ wakalɔshana la nkumi ya dikanga, wakatɔmbɔkɔ ndo wakayala la ohedia.+ 20 Nkumi ya dikanga ya wolo yakolɛka la Jɛrusalɛma yakolɛka ndo l’ɛtshi ka nkɛtɛ k’otondo ka la Wedi w’Ɔkɛdi, ndo vɔ wakafutaka mikanda, elambo ndo ɛkɔngɔ le wɔ. 21 Ɔnkɔnɛ, nyodje didjango dia anto asɔ memadia olimu diaha osomba akɔ mbikama nto polo lam’ayomodjanga. 22 Nyonge la yambalo diaha minya yimba lo dikambo sɔ, diaha wahɔ wa nkumekanga ndanyema nto.”+

23 L’ɔkɔngɔ wa mukanda w’oma le nkumekanga Aratashasha mbadiema la ntondo ka Rɛhumɛ nde la ofundji Shimishai la asekawɔ, vɔ wakatshu esadi otsha la Jɛrusalɛma le ase Juda ko wakataashimba la wolo diaha vɔ ntetemala la olimu. 24 L’etena kɛsɔ ko olimu wa luudu la Nzambi laki la Jɛrusalɛma waya l’atei atei; ndo olimu akɔ wakemala laasɔ polo l’ɔnɔnyi wa 2 w’ɛlɔmbwɛlɔ ka Dariyo nkumekanga ka Pɛrɛsiya.+

5 Oma laasɔ, omvutshi Hangayi+ nde la omvutshi Zɛkariya+ okana wa Ido+ wakewoya ase Juda waki la Juda ndo la Jɛrusalɛma prɔfɛsiya lo lokombo la Nzambi k’Isariyɛlɛ lakaalɔmbɔlaka. 2 L’etena kɛsɔ mbakatatɛ Zerubabɛlɛ+ ɔna Shɛalatiyɛlɛ nde la Jeshua+ ɔna Jɛhɔzadaka mbika nto luudu la Nzambi+ laki la Jɛrusalɛma; ndo amvutshi wa Nzambi waki kaamɛ la wɔ wakaasukɛ.+ 3 L’etena kakɔ, Tatenai nguvɛrnɛrɛ ka l’ɛtshi ka nkɛtɛ ka la Wedi w’Ɔkɛdi* nde la Shetara-Bɔzenai la asekawɔ wakaye le wɔ ko wakawambola vate: “Akɔna ambonyodjangɛ dia mbika luudu lɔnɛ ndo dia nshidiya ehele kɛnɛ?”* 4 Oma laasɔ vɔ wakawambola nto vate: “Apami wakamba olimu wa wokelo ɔnɛ nkombo yawɔ?” 5 Koko Nzambi akendaka* dikumanyi di’ase Juda,+ ko vɔ kombaemadia polo lam’akawahombe ntoma alapɔlɔ le Dariyo ndo nkumekanga mbakaloya mukanda lo dikambo sɔ.

6 Awui wa lo mukanda wakafunde Tatenai nguvɛrnɛrɛ ka l’ɛtshi ka nkɛtɛ ka la Wedi w’Ɔkɛdi nde la Shetara-Bɔzenai la asekande nguvɛrnɛrɛ ya l’ɛse ya l’ɛtshi ka nkɛtɛ ka la wedi w’Ɔkɛdi otsha le nkumekanga Dariyo vɔ anɛ; 7 vɔ wakootomɛ alapɔlɔ ndo kɛnɛ kakawafunde tɔ kɛnɛ:

“Le nkumekanga Dariyo:

“Wɔladi tshɛ wayale la yɛ! 8 Nkumekanga le, eya dia sho takatshu lo prɔvɛnsɛ ka Juda lo luudu la Nzambi ka woke ndo lɔ lekɔ lo mbikama la ave wa weke wakangitɔma polo laawɔ ndo wambahɛ esembe la diko dia mpele. Anto wekɔ lo nkamba olimu akɔ la wangasanu tshɛ ndo olimu wekɔ lo tatshu dimɛna l’ɔtɛ wa welo wadjawɔ. 9 Ko takoke dikumanyi diawɔ ambola, takawambola ɔnɛ: ‘Akɔna ambonyodjangɛ dia mbika luudu lɔnɛ ndo dia nshidiya ehele kɛnɛ?’*+ 10 Ndo nto, takawambola nkombo yawɔ dia kewoya dia sho mfunda nkombo ya wanɛ walɔmbɔla.

11 “Okadimwelo wakawatosha vɔ ɔnɛ: ‘Sho tekɔ ekambi wa Nzambi k’olongo la nkɛtɛ, ndo tekɔ lo mbika nto luudu lakakama ambeta ɛnɔnyi efula, luudu lakakama ko shidiyama+ oma le nkumekanga ka woke k’Isariyɛlɛ. 12 Koko lam’ele washɛso wakokiya Nzambi ka l’olongo+ nkɛlɛ, nde akaakimɔ lo anya wa Nɛbukadinɛza+ nkumekanga ka Babilɔna, ose Kaladiya lakalanya luudu+ lɔnɛ ko nde ntɔla anto otsha lo lɔhɔmbɔ la Babilɔna.+ 13 Koko lo ɔnɔnyi wa ntondo w’ɛlɔmbwɛlɔ ka Kurɔ nkumekanga ka Babilɔna, nkumekanga Kurɔ akadjanga dia mbika nto luudu la Nzambi+ lɔnɛ. 14 Ndo nto, nkumekanga Kurɔ akatondja diangɔ dia paonyi ndo dia mfɛsa oma lo tɛmpɛlɔ ka la Babilɔna, diangɔ dia lo luudu la Nzambi ka mɛtɛ diakɔshi Nɛbukadinɛza oma lo tɛmpɛlɔ ka la Jɛrusalɛma ko nde didja lo tɛmpɛlɔ ka la Babilɔna.+ Wakadisha pami kɛmɔtshi, lokombo lande Sheshibazara,*+ ɔnɛ lele Kurɔ akawodje nguvɛrnɛrɛ.+ 15 Kurɔ akawotɛ ate: “Ɔsa diangɔ nɛ kele tshɔka todidje lo tɛmpɛlɔ ka la Jɛrusalɛma ndo luudu la Nzambi lakame nto lo dihole diakilɔ ntondo.”+ 16 Ko Sheshibazara yakɔ akaye ndo nde akasale etshina ka luudu la Nzambi+ lele la Jɛrusalɛma; ndo lɔ lekɔ lo mbikama oma ko etena kɛsɔ polo kakianɛ, koko latashile.’+

17 “Laasɔ naka wɛ nkumekanga mɛnaka dimɛna, etawɔ dia eyangelo salema lo eombelo ka nkumekanga kele lengo la Babilɔna dia nshikikɛ kana nkumekanga Kurɔ akadjanga dia mbika nto luudu lakɔ la Nzambi lele la Jɛrusalɛma;+ ndo kototome yɛdikɔ yayɔsa nkumekanga lo dikambo sɔ.”

6 L’etena kɛsɔ nkumekanga Dariyo akadjanga, ko wakasale eyangelo lo diangɔ di’edjedja* lɛnɛ akawakitsha diangɔ dia nɛmɔ la Babilɔna. 2 Ko wakashola wɔɔmbɔ ɔmɔtshi lo dihole di’eshamelo dia la Ekibatana, lo prɔvɛnsɛ ka Mediya, ndo awui wayela anɛ wakafundama lɔkɔ:

3 “Lo ɔnɔnyi wa ntondo w’ɛlɔmbwɛlɔ ka nkumekanga Kurɔ, nkumekanga Kurɔ akadjanga lo kɛnɛ kendana la luudu la Nzambi la la Jɛrusalɛma+ ate: ‘Luudu lakɔ lakame nto oko dihole dia nambolaka elambo, ndo atshina alɔ pombaka salema; tanga dialɔ pombaka monga kubita 60,* woke alɔ kubita 60,+ 4 la ɛnɔngɔ 3 w’ave wa weke wakangitɔma polo laawɔ ndo ɔnɔngɔ 1 w’esembe;+ luudu la nkumekanga+ lakimɔ falanga yendana la dikambo sɔ. 5 Ndo nto, diangɔ dia paonyi la dia mfɛsa dia lo luudu la Nzambi diakatondja Nɛbukadinɛza oma lo tɛmpɛlɔ kaki la Jɛrusalɛma ko nde diela la Babilɔna+ diakaloyame dia diɔ todjama lo dihole diadiɔ lo tɛmpɛlɔ ka la Jɛrusalɛma ndo tokitshama lo luudu la Nzambi.’+

6 “Ɔnkɔnɛ, wɛ Tatenai nguvɛrnɛrɛ ka l’ɛtshi ka nkɛtɛ ka la Wedi w’Ɔkɛdi,* Shetara-Bɔzenai kaamɛ l’asekayɛ nguvɛrnɛrɛ ya l’ɛse ya l’ɛtshi ka nkɛtɛ ka la Wedi w’Ɔkɛdi,+ nyomɔ oma laawɔ. 7 Tanyofutanyake olimu wa luudu lakɔ la Nzambi. Nguvɛrnɛrɛ k’ase Juda nde la dikumanyi di’ase Juda wayoka luudu lakɔ la Nzambi nto lo dihole diakilɔ ntondo. 8 Ndo nto, dimi lambodjanga lo kɛnɛ kahombanyu salɛ dikumanyi di’ase Juda dia vɔ mbika luudu lakɔ la Nzambi nto nte: Oma lo eombelo ka nkumekanga,+ oma lo elambo wafutshama lo ɛtshi ka nkɛtɛ ka la Wedi w’Ɔkɛdi mbahombawɔ mbishaka apami asɔ falanga aha la ntshimbatshimba dia vɔ ntetemala la olimu aha la memadia.+ 9 Kɛnɛ tshɛ kele ohomba, mbuta ate ɛsɔngɔ wa ngɔmbɛ ya waomi+ ndo ɛkɔkɔ wa waomi+ la ɛsɔngɔ w’ɛkɔkɔ+ wendana la elambo wa lotshumba dikambo dia Nzambi ka l’olongo, eponga,+ lɛɛhɔ,+ wanu+ ndo esɔ,+ oko wata ɛlɔmbɛdi wele la Jɛrusalɛma mbahombanyu ntetemala mbashaka aha la taamu lushi la lushi, 10 dia vɔ ntetemala nambola elambo wangɛnyangɛnya Nzambi ka l’olongo ndo nɔmba dikambo dia lɔsɛnɔ la nkumekanga nde l’anande.+ 11 Dimi lambodjanga nto dia naka onto ɔmɔtshi ambɔnyɔla didjango nɛ, wayonya osembe oma lo luudu lande, ko mbohanɛ lɔkɔ, ndo luudu lande layonga nkomba k’anto tshɛ* l’ɔtɛ wa kɔlɔ kɛsɔ. 12 Nzambi lakasɔnɛ dihole sɔ+ dikambo dia lokombo lande kalanya nkumekanga tshɛ ndo onto tshɛ layonyiya lonya lande dia mɔnyɔla didjango nɛ ko nde ndanya luudu la Nzambi lele la Jɛrusalɛma. Dimi Dariyo kambodja didjango nɛ. Dialɛmiyame aha la ntshimbatshimba.”

13 Ko Tatenai nguvɛrnɛrɛ k’ɛtshi ka nkɛtɛ kele la Wedi w’Ɔkɛdi, Shetara-Bɔzenai+ ndo asekawɔ wakasale kɛnɛ tshɛ kakadjanga nkumekanga Dariyo aha la ntshimbatshimba. 14 Ndo dikumanyi di’ase Juda wakatetemala mbika ndo ntshɔ otsha la ntondo,+ wakatshutshuyama la ɛtɛkɛta wa prɔfɛsiya wa omvutshi Hangayi+ nde la Zɛkariya+ okana wa Ido; vɔ wakashidiya wokelo awɔ lo ndjela didjango dia Nzambi k’Isariyɛlɛ+ ndo didjango dia Kurɔ+ nde la Dariyo+ ndo Aratashasha+ nkumekanga ka Pɛrɛsiya. 15 Vɔ wakashidiya mbika luudu lakɔ lo ngɔndɔ ka Adara* nshi 3 lo ɔnɔnyi wa 6 w’ɛlɔmbwɛlɔ ka nkumekanga Dariyo.

16 Oma laasɔ, ase Isariyɛlɛ, ɛlɔmbɛdi, ase Lɛwi+ ndo anto akina tshɛ waki ntondo lo lɔhɔmbɔ wakasale osapwelo wa luudu la Nzambi la ɔngɛnɔngɛnɔ tshɛ. 17 Lo kɛnɛ kendana la osapwelo wa luudu lakɔ la Nzambi, vɔ wakakimɔ ngɔmbɛ ya waomi 100, ɛkɔkɔ wa waomi 200, ɛsɔngɔ w’ɛkɔkɔ 400, ndo weombe wa mbudi 12 wɔtɔnɛ la lofulo la waoho w’Isariyɛlɛ+ oko olambo wa pɛkato. 18 Vɔ wakasɔnɛ ɛlɔmbɛdi lo elui awɔ ndo ase Lɛwi lo elui awɔ dia kambaka olimu wa Nzambi la Jɛrusalɛma,+ lo ndjela kɛnɛ kofundami lo dibuku dia Mɔsɛ.+

19 Wanɛ waki ntondo lo lɔhɔmbɔ wakasale Dambo di’Elekanelo lo ngɔndɔ ka ntondo nshi 14.+ 20 Ɛlɔmbɛdi ndo ase Lɛwi tshɛ tshɛ wakayaɛdia;+ ɔnkɔnɛ vɔ tshɛ waki pudipudi. Vɔ wakadiake nyama k’olambo w’Elekanelo dikambo dia anto tshɛ waki ntondo lo lɔhɔmbɔ, dikambo dia asekawɔ ɛlɔmbɛdi ndo dikambo diawɔ vɔamɛ. 21 Oma laasɔ, ase Isariyɛlɛ wakakalola oma lo lɔhɔmbɔ wakale nyama kakɔ vɔ la onto tshɛ lakasangana kaamɛ la wɔ ndo lakayakakitola la mindo ya wedja waki lo ɛtshi ka nkɛtɛ kakɔ dia ntɛmɔla* Jehowa Nzambi k’Isariyɛlɛ.+ 22 Vɔ wakasale ndo Fɛtɛ ka mapa waha la wodoya+ la ɔngɛnɔngɛnɔ tshɛ l’edja ka nshi 7, nɛ dia Jehowa akaangɛnyangɛnya, ndo nde akadihola otema wa nkumekanga k’Asuriya otsha le wɔ,+ ko nde akaasukɛ* lo olimu wa luudu la Nzambi ka mɛtɛ, Nzambi k’Isariyɛlɛ.

7 L’ɔkɔngɔ w’akambo asɔ, Ɛzɛra*+ akakalola lo nshi yakalɔmbɔlaka Aratashasha+ nkumekanga ka Pɛrɛsiya. Nde aki ɔna Seraya,+ ɔna Azariya, ɔna Hilikiya,+ 2 ɔna Shaluma, ɔna Zadɔka, ɔna Ahitubɛ, 3 ɔna Amariya, ɔna Azariya,+ ɔna Merayota, 4 ɔna Zɛrahiya, ɔna Uzi, ɔna Buki, 5 ɔna Abishua, ɔna Finehasi,+ ɔna Eleazara,+ ɔna Arɔna+ owandji w’ɛlɔmbɛdi. 6 Ɛzɛra ɔsɔ kakaye oma la Babilɔna. Nde aki osangodi* wakayashaka efula* lo Ɛlɛmbɛ wa Mɔsɛ+ wakakimɔ Jehowa Nzambi k’Isariyɛlɛ. Nkumekanga akawosha kɛnɛ tshɛ kakandɔɔlɔmbɛ, nɛ dia lonya la Jehowa Nzambi kande laki kaamɛ la nde.

7 Ase Isariyɛlɛ amɔtshi, ɛlɔmbɛdi, ase Lɛwi,+ amembi,+ alami w’asoko+ ndo ekambi wa lo tɛmpɛlɔ*+ wakatshu la Jɛrusalɛma lo ɔnɔnyi wa 7 w’ɛlɔmbwɛlɔ ka nkumekanga Aratashasha. 8 Ɛzɛra akaye la Jɛrusalɛma lo ngɔndɔ ka 5 lo ɔnɔnyi wa 7 w’ɛlɔmbwɛlɔ ka nkumekanga. 9 Lo ngɔndɔ ka ntondo lushi 1, nde akatatɛ minda lɔkɛndɔ oma la Babilɔna, ko akayokoma la Jɛrusalɛma lo ngɔndɔ ka 5 lushi 1, nɛ dia lonya l’ɔlɔlɔ la Nzambi laki kaamɛ la nde.+ 10 Ɛzɛra akalɔngɔsɔla otema* ande dia mbeka Ɛlɛmbɛ wa Jehowa, dia mbakitanyiya+ ndo dia mbetsha wadjango la dombwelo dia lɔkɔ lo Isariyɛlɛ.+

11 Awui wa lo mukanda wakasha nkumekanga Aratashasha Ɛzɛra laki ɔlɔmbɛdi ndo osangodi,* manyi lo wekelo* wa ɛlɛmbɛ wa Jehowa ndo lo wadjango ande lo Isariyɛlɛ vɔ anɛ:

12 * “Dimi Aratashasha+ nkumekanga ka nkumi ya dikanga, lambofundɛ ɔlɔmbɛdi Ɛzɛra, osangodi* w’Ɛlɛmbɛ wa Nzambi ka l’olongo nte: Wɔladi wa kokele wayale la yɛ! Wonya ɔnɛ, 13 dimi lambodjanga dia onto tshɛ lele lo diolelo diami l’atei w’ase Isariyɛlɛ ndo ɛlɔmbɛdi awɔ la ase Lɛwi lalanga ntshɔ kaamɛ la yɛ otsha la Jɛrusalɛma atshu.+ 14 Nɛ dia wɛ ambotomama oma le nkumekanga nde l’andaki ande 7 dia tenda kana anto wa la Juda ndo wa la Jɛrusalɛma wekɔ lo nkitanyiya Ɛlɛmbɛ wa Nzambi kayɛ wele le yɛ,* 15 ndo dia tɔsa mfɛsa la paonyi yele nkumekanga nde l’andaki ande wakasha Nzambi k’Isariyɛlɛ kele edjaselo kande kekɔ la Jɛrusalɛma la lolango, 16 kaamɛ ndo mfɛsa tshɛ la paonyi tshɛ yakayalongola* lo prɔvɛnsɛ k’otondo ka Babilɔna, mbidja ndo woshasha wa la lolango wakakimɔ anto la ɛlɔmbɛdi dikambo dia luudu la Nzambi kawɔ lele la Jɛrusalɛma.+ 17 Ndo nyu pombaka nsomba ngɔmbɛ ya waomi,+ ɛkɔkɔ wa waomi,+ ɛsɔngɔ w’ɛkɔkɔ+ kaamɛ ndo elambo awɔ wa ntɔngɔ+ la elambo awɔ wa lotɛ+ la falanga shɔ aha la ntshimbatshimba, ko nyu nambola elambo akɔ lo elambwelo ka lo luudu la Nzambi kanyu lele la Jɛrusalɛma.

18 “Kɛnɛ kayoyɛna wɛ la ananyɔ ɔlɔlɔ dia nsala, kokisale la mfɛsa ndo la paonyi yayotshikala, lo ndjela lolango la Nzambi kanyu. 19 Diangɔ tshɛ diambowokosha dikambo dia olimu wa lo luudu la Nzambi kayɛ, kodikitsha la ntondo ka Nzambi la Jɛrusalɛma.+ 20 Ehomba ekina tshɛ wa lo luudu la Nzambi kayɛ walɔmbamayɛ dia nkimɔ, kowakimɔ oma lo eombelo ka nkumekanga.+

21 “Dimi nkumekanga Aratashasha lambodjangɛ amombi wa falanga tshɛ wa l’ɛtshi ka nkɛtɛ ka la Wedi w’Ɔkɛdi* dia ɛngɔ tshɛ kayoonyɔlɔmba ɔlɔmbɛdi Ɛzɛra,+ osangodi* w’Ɛlɛmbɛ wa Nzambi ka l’olongo, kanyowoshatɔ aha la ntshimbatshimba, 22 polo talata* 100 ya mfɛsa, tɛdikɔ ta kɔra* 100 t’eponga, tɛdikɔ ta bata* 100 ta wanu,+ tɛdikɔ ta bata 100 t’esɔ+ ndo lɛɛhɔ+ yɛdikɔ ya heyama mbadia. 23 Kɛnɛ tshɛ kambodjanga Nzambi ka l’olongo kasaleme la ohetoheto tshɛ dikambo dia luudu la Nzambi ka l’olongo,+ diaha nde momalɛ ase diolelo dia nkumekanga la anande.+ 24 Ndo nto, tambonyolaka diaha nyu mfutsha ɛlɔmbɛdi, ase Lɛwi, apomi wa mishiki,+ alami w’asoko, ekambi wa lo tɛmpɛlɔ*+ ndo ase olimu wa lo luudu lɔnɛ la Nzambi mikanda, elambo+ ndo ɛkɔngɔ.

25 “Koko wɛ Ɛzɛra, lo ndjela lomba lakayalongola oma le Nzambi kayɛ,* sɔna asambodi ndo toshushi dia nomboshaka anto tshɛ wele lo ɛtshi ka nkɛtɛ kele la Wedi w’Ɔkɛdi, wanɛ tshɛ weya ɛlɛmbɛ wa Nzambi kayɛ; ndo nyu pombaka mbetsha onto tshɛ laheye ɛlɛmbɛ akɔ.+ 26 Onto tshɛ lahatokitanyiya Ɛlɛmbɛ wa Nzambi kayɛ ndo ɛlɛmbɛ wa nkumekanga pombaka nomboshama aha la ntshimbatshimba, oyadi ndjakema, mbitshanyema, mbidjama kibawo kana mbidjama lo lokanu.”

27 Jehowa Nzambi ka watshɛso atombɔme, nde lodjisha kanyi l’otema wa nkumekanga dia mbetɛ luudu la Jehowa lele la Jɛrusalɛma+ dimɛna! 28 Ndo nde ambɔmɛnya ngandji kande ka kɔlamelo la ntondo ka nkumekanga+ nde l’andaki+ ande la ewandji wa wolo tshɛ wa nkumekanga. Ɔnkɔnɛ, dimi lakayala la dihonga,* nɛ dia lonya la Jehowa Nzambi kami laki kaamɛ la mi, ko dimi lakatshumanya ɛnɔmbɔdi* wa lo Isariyɛlɛ dia vɔ ntshɔ kaamɛ la mi.

8 Ɛtɛ wa nkumbo ya washɛwɔ ndo ofundjelo wa nkombo lo ndjela ɔlɔndji wa wanɛ wakaye kaamɛ la mi oma la Babilɔna etena kakalɔmbɔlaka nkumekanga Aratashasha+ vɔ ɛnɛ: 2 Oma le ana w’apami wa Finehasi:+ Ngɛrɛshɔmɛ; oma le ana w’apami wa Itamara:+ Danyɛlɛ; oma le ana w’apami wa Davidɛ: Hatushɛ; 3 oma le ana w’apami wa Shekaniya, l’atei w’ana w’apami wa Parɔshɛ: Zɛkariya la apami 150 wakafundjama nkombo waki kaamɛ la nde; 4 oma le ana w’apami wa Pahata-Mɔaba:+ Eliyeho-Enai ɔna Zɛrahiya la apami 200 waki kaamɛ la nde; 5 oma le ana w’apami wa Zatu:+ Shekaniya ɔna Jahaziyɛlɛ la apami 300 waki kaamɛ la nde; 6 oma le ana w’apami wa Adinɛ:+ Ɛbɛdɛ ɔna Jɔnatana la apami 50 waki kaamɛ la nde; 7 oma le ana w’apami wa Elama:+ Jɛshaya ɔna Ataliya la apami 70 waki kaamɛ la nde; 8 oma le ana w’apami wa Shefatiya:+ Zebadiya ɔna Mikayɛlɛ la apami 80 waki kaamɛ la nde; 9 oma le ana w’apami wa Jɔaba: Obadiya ɔna Jɛhiyɛlɛ la apami 218 waki kaamɛ la nde; 10 oma le ana w’apami wa Bani: Shelomita ɔna Jɔsifiya la apami 160 waki kaamɛ la nde; 11 oma le ana w’apami wa Bebai:+ Zɛkariya ɔna Bebai la apami 28 waki kaamɛ la nde; 12 oma le ana w’apami wa Azingadɛ:+ Johanana ɔna Hakatana la apami 110 waki kaamɛ la nde; 13 oma le ana w’apami wa Adɔnikamɛ,+ wanɛ wakayokomɛka nkalola nkombo yawɔ yɔ nyɛ: Elifɛlɛtɛ, Jeyɛlɛ ndo Shemaya la apami 60 waki kaamɛ la wɔ; 14 ndo oma le ana w’apami wa Bingivai:+ Utai nde la Zabudɛ la apami 70 waki kaamɛ la wɔ.

15 Dimi lakaasanganya lo ɔkɛdi waya oya la Ahava+ ko takahange laawɔ l’edja ka nshi 3. Koko lam’akamasɛdingola anto ndo ɛlɔmbɛdi, dimi kɔmɛna kaanga ose Lɛwi 1 laawɔ. 16 Ko lakatome dui dia telɛ Eliɛzɛrɛ, Ariyɛlɛ, Shemaya, Elɛnatana, Jaribɛ, Elɛnatana, Natana, Zɛkariya ndo Meshulama, wanɛ wakayalɔmbɔlaka anto, ndo Joyariba nde la Elɛnatana wanɛ waki embetsha. 17 Oma laasɔ, dimi lakawadjangɛ lo dikambo dia Ido laki ɔnɔmbɔdi lo dihole dielamɛ ɔnɛ Kasifiya. Dimi lakawatɛ dia vɔ mbutɛ Ido nde la anango, ekambi wa lo tɛmpɛlɔ* waki la Kasifiya dia vɔ nteela ekambi wahomba kambaka lo luudu la Nzambi kaso. 18 Lam’ele lonya l’ɔlɔlɔ la Nzambi kaso laki kaamɛ la so, wakela pami kɛmɔtshi ka kɛsɔ oma l’atei w’ana w’apami wa Mahili+ okana wa Lɛwi, ɔna Isariyɛlɛ, mbuta ate Sherebiya,+ ndo anande w’apami la anango, apami 18; 19 ndo Hashabiya kaamɛ la Jɛshaya oseka Merari,+ anango la anawɔ w’apami, apami 20. 20 Ekambi wa lo tɛmpɛlɔ* waki 220, wanɛ wele Davidɛ nde l’ewandji wakaakimɔ dia kambaka olimu w’ase Lɛwi, vɔ tshɛ wakelamɛ lo ndjela nkombo yawɔ.

21 Oma laasɔ, dimi lakewoya dia anto nkila mbo ya ndɛ lo ɔkɛdi wa Ahava, dia sho ndjakitshakitsha la ntondo ka Nzambi kaso, dia nyanga ɛlɔmbwɛlɔ oma le nde lo dikambo dia lɔkɛndɔ laso, dikambo diaso, dikambo dia anaso ndo dikambo dia diangɔ diaso tshɛ. 22 Dimi lakoke nsɔnyi dia nɔmba nkumekanga asɔlayi la ambahemi wa mfalasa dia vɔ tokokɛ oma le atunyi lo mboka, nɛ dia takatɛ nkumekanga shate: “Lonya l’ɔlɔlɔ la Nzambi kaso lekɔ kaamɛ la wanɛ tshɛ wooyanga,+ koko wolo ande ndo nkɛlɛ kande kekɔ le wanɛ tshɛ wawoka ɔkɔngɔ.”+ 23 Ɔnkɔnɛ, takakile mbo ya ndɛ ndo takalɔmbɛ Nzambi kaso lo dikambo sɔ, ko nde akoke ɔsɛngɔsɛngɔ aso.+

24 Oma laasɔ, l’atei w’ewandji w’ɛlɔmbɛdi, dimi lakakitsha 12 laande, mbuta ate Sherebiya nde la Hashabiya+ kaamɛ la anangɛwɔ amɔtshi 10. 25 L’ɔkɔngɔ wa laasɔ, dimi lakɛdika wotsho wa mfɛsa la paonyi ndo diangɔ dikina, woshasha wakakimɔ nkumekanga nde l’andaki ande la ewandji ande ndo ase Isariyɛlɛ tshɛ waki laawɔ dikambo dia luudu la Nzambi kaso.+ 26 Ko dimi lakawaɛdikɛ lo anya awɔ talata* 650 ya mfɛsa, diangɔ dia mfɛsa 100 diaki la yɛdikɔ ya talata 2, talata 100 ya paonyi, 27 tɔlɔngalɔnga 20 ta paonyi tele la yɛdikɔ ya darika* kinunu (1 000), ndo diangɔ 2 diakasalema la nkonga ka dimɛna, ka beela ka ngaingai, di’amɛna oko paonyi.

28 Oma laasɔ, lakawatɛ nte: “Nyu nyekɔ ekila le Jehowa,+ diangɔ nɛ diekɔ ekila ndo mfɛsa la paonyi nyɛ yekɔ woshasha wa la lolango wambokimɔma le Jehowa Nzambi ka watshɛnyu. 29 Nyodilame dimɛna polo lam’ayonyotodiɛdika la ntondo k’ewandji w’ɛlɔmbɛdi l’ase Lɛwi ndo ewandji wa mvudu ya washe ase Isariyɛlɛ, la Jɛrusalɛma+ lo mvudu ya l’etei* ya lo luudu la Jehowa.” 30 Ko ɛlɔmbɛdi l’ase Lɛwi wakɔshi mfɛsa la paonyi ndo diangɔ diakawawaɛdikɛ dia ditɔla la Jɛrusalɛma lo luudu la Nzambi kaso.

31 L’ɔkɔngɔ diko, takonɛɛ oma l’ɔkɛdi wa Ahava+ lo ngɔndɔ ka ntondo+ nshi 12 dia ntshɔ otsha la Jɛrusalɛma, ndo lonya la Nzambi kaso laki kaamɛ la so, ko nde akatotshungola oma l’anya w’otunyi ndo wa wanɛ wakatoholamɛ lo mboka. 32 Ko takakome la Jɛrusalɛma+ ndo takatshikala laawɔ l’edja ka nshi 3. 33 Lushi la 4, takɛdika wotsho wa mfɛsa, paonyi ndo diangɔ dikina lo luudu la Nzambi kaso,+ ko takadisha Mɛrɛmɔtɛ+ ɔna ɔlɔmbɛdi Uridja, ndo Eleazara ɔna Finehasi aki kaamɛ la nde; ndo nto, ase Lɛwi anɛ: Jɔzabada+ ɔna Jeshua nde la Noadiya ɔna Binui+ waki kaamɛ la wɔ. 34 Ɛngɔ tshɛ kakadiema ndo kakɛdikama wotsho atɔ, ndo wotsho w’ɛngɔ tshɛ wakafundama. 35 Wanɛ wakatombe oma lo lɔhɔmbɔ, wanɛ waki ntondo lo lɔhɔmbɔ, wakalambola Nzambi k’Isariyɛlɛ elambo wa lotshumba ɛnɛ: Ngɔmbɛ 12 ya waomi+ dikambo dia Isariyɛlɛ w’otondo, ɛkɔkɔ 96 wa waomi,+ ɛsɔngɔ w’ɛkɔkɔ 77 wa waomi, ndo weombe wa mbudi+ 12 oko olambo wa pɛkato; diangɔ sɔ tshɛ diaki olambo wa lotshumba le Jehowa.+

36 Oma laasɔ, takasha waa satrapɛ* ya nkumekanga+ ndo nguvɛrnɛrɛ ya l’ɛtshi ka nkɛtɛ ka la Wedi w’Ɔkɛdi*+ wadjango wa nkumekanga, ko vɔ wakasukɛ wodja ndo luudu la Nzambi ka mɛtɛ.+

9 Kam’akashile akambo asɔ salema, ewandji wakaye le mi ko wakambutɛ vate: “Ase Isariyɛlɛ vɔ la ɛlɔmbɛdi l’ase Lɛwi hawoyakakitodi l’ase wedja ndo la ditshelo diawɔ dia wɔnɔnyi,+ ditshelo di’ase Kanana, ase Hiti, ase Perizi, ase Jɛbusɛ, ase Amɔna, ase Mɔaba, ase Edjibito+ ndo ase Amɔra.+ 2 Vɔ wambɔsa anawɔ amɔtshi wa wamato, ko wambaatshuka ndo wambaatshukɛ anawɔ w’apami.+ Wonya ɔnɛ vɔ l’anawɔ*+ w’ekila wambɔsɔhana l’ase wedja.+ Ewandji la topita tolɛ mbamboleka nshisha kɔlamelo lo ndjasha lo akambo asɔ.”

3 Kam’akamoke dui sɔ, lakaatshatsha dihɔndɔ diami ndo okutu ami wele bu l’anya, ndo lakahatola yema ya divo dia l’ɔtɛ ami la ndɛdu yami, ko lakadjasɛ la lɔkɔnyɔ l’efula. 4 Oma laasɔ, anto tshɛ wakalɛmiyaka* ɛtɛkɛta wa Nzambi k’Isariyɛlɛ wakatshumana lalemi l’ɔtɛ wakashisha anto wakaye oma lo lɔhɔmbɔ kɔlamelo, etena kakamadjasɛ lele la lɔkɔnyɔ l’efula polo l’etena k’olambo wa ntɔngɔ wa la dikɔlɔ.+

5 L’etena k’olambo wa ntɔngɔ wa la dikɔlɔ,+ dimi lakemala oma lo nsɔnyi kami, la dihɔndɔ diami ndo la okutu ami wele bu l’anya wambaatshatshema, ko lakake adwe ndo lakawedia anya ami otsha le Jehowa Nzambi kami. 6 Ko lakate nte: “Nzambi kami le, lekɔ la nsɔnyi ndo la okandokando dia mbedia elungi kami otsha le yɛ, wɛ Nzambi kami, nɛ dia munga yaso yaya efula laadiko dia ɛtɛ aso ndo onongo wele la so wambodɛ polo l’olongo.+ 7 Oma ko nshi ya watshɛso polo ndo ɛlɔ, onongo wele la so wookongaka woke;+ ndo l’ɔtɛ wa munga yaso, sho, nkumi ya dikanga yaso ndo ɛlɔmbɛdi aso takakimɔma lo anya wa nkumi ya dikanga y’ase wedja, lo lokuwa la ta,+ lo lɔhɔmbɔ,+ lo dimbo+ ndo lo nsɔnyi, oko wediɔ ɛlɔ.+ 8 Koko wonya ɔnɛ, tambohomɔ lokolo l’ɔlɔ le Jehowa Nzambi kaso lo tshanda mɔtshi, lo mbetawɔ dia atshikadi amɔtshi mpandɔ ndo lo tosha dihole di’ekokelo* lo dihole diande di’ekila,+ dia wɛ Nzambi kaso mpɛtsha washo aso ngaingai ndo dia nyomotosha yema ya lɔsɛnɔ lo lɔhɔmbɔ laso. 9 Nɛ dia kaanga mbeso mfumbe,+ Nzambi kaso kotokalɛ lo lɔhɔmbɔ laso; koko nde akafudia ngandji kande ka kɔlamelo le so la ntondo ka nkumi ya dikanga ya Pɛrɛsiya,+ dia nyomotosha lɔsɛnɔ la oyango wa sho mbetola luudu la Nzambi+ kaso, dia nyomɔlɔngɔsɔla ahole wakalalana ndo dia tosha ehele k’ave* la Juda ndo la Jɛrusalɛma.

10 “Nzambi kaso le, wonya ɔnɛ akokaso mbuta nto l’ɔkɔngɔ wa kɛnɛ kambosalema? Nɛ dia sho takasɛkɛ ɛlɛmbɛ ayɛ, 11 wakayatosha lo tshimbo y’ekambi ayɛ amvutshi, ata wate: ‘Wodja wayanganyu tɔsa wekɔ wodja wa mindo l’ɔtɛ wa mindo y’anto wa lo bɛtshi dia nkɛtɛ diakɔ, l’ɔtɛ wa ditshelo diawɔ dia wɔnɔnyi diambowolodia wodja akɔ oma lo koma nyɛ polo lo koma kina la mindo yawɔ.+ 12 Ɔnkɔnɛ, tanyotshukanyake ananyu wa wamato le anawɔ w’apami ndo tanyotshukɛke ananyu w’apami anawɔ wa wamato;+ ndo tanyoyangake pondjo wɔladi awɔ ndo ɔngɔnyi+ awɔ, dia nyu ndeka monga la wolo ndo ndɛ diangɔ dia amɛna dia lo wodja ndo nyu mbowɔsa dikambo dia ananyu pondjo pondjo.’ 13 L’ɔkɔngɔ wa kɛnɛ tshɛ kakatokomɛ l’ɔtɛ w’etsha aso wa kɔlɔ ndo shaka y’onongo waki la so, nɛ dia wɛ Nzambi kaso hatosalɛ akambo lo ndjela munga yaso,+ ndo wɛ aketawɔ dia sho wanɛ wele lanɛ panda;+ 14 onde tayɔnyɔla ɛlɛmbɛ ayɛ nto ndo tayodja sheke ya diwala* la anto wasala akambo wa wɔnɔnyi+ anɛ? Onde wɛ hatotomalɛ polo lo wɛ toshila oshiki aha la ntshika ndooko otshikadi kana ohandɔ? 15 Jehowa Nzambi k’Isariyɛlɛ le, wɛ ekɔ ɔlɔlɔ,+ nɛ dia polo ndo ɛlɔ sho tambohanda oko atshikadi. Sho anɛ tele la ntondo kayɛ la onongo aso, nɛ dia hatokoke memala la ntondo kayɛ l’ɔtɛ wa dikambo sɔ.”+

10 Etena kakalɔmbaka+ Ɛzɛra ndo kakandasholaka pɛkato, alela ndo etami ekukumadi la ntondo ka luudu la Nzambi ka mɛtɛ, olui a woke w’apami, wamato ndo ana w’ase Isariyɛlɛ wakatshumana lalende mbodinga, nɛ dia anto wakalelaka wolo efula. 2 Ko Shekaniya ɔna Jɛhiyɛlɛ+ l’atei w’ana w’apami wa Elama+ akatɛ Ɛzɛra ate: “Sho komonga la kɔlamelo le Nzambi kaso lo woho wakatatshuke* wamato w’ase wedja oma l’atei w’ase wodja+ ɔnɛ. Kaanga mbediɔ ngasɔ, elongamelo kekekɔ dikambo dia Isariyɛlɛ. 3 Kakianɛ, nyoye todje sheke sho la Nzambi kaso+ dia nkɛndja wadi akɔ tshɛ ndo ana wakatoote la wɔ lo ndjela ɛlɔmbwɛlɔ ka Jehowa ndo ka wanɛ walɛmiya* ɛlɛmbɛ wa Nzambi kaso.+ Nyɛsɔ tosale akambo lo ndjela Ɛlɛmbɛ. 4 Emala, nɛ dia dikambo nɛ diekɔ ɔkɛndɛ ayɛ ndo sho tekɔ kaamɛ la yɛ. Yakeketsha ndo sala dui dimɔtshi.”

5 Ko Ɛzɛra akemala ndo akatshibia ewandji w’ɛlɔmbɛdi, ase Lɛwi ndo Isariyɛlɛ w’otondo dia nsala kɛnɛ kakatama.+ Ko vɔ wakatshibe. 6 Oma laasɔ, Ɛzɛra akemala oma la ntondo ka luudu la Nzambi ka mɛtɛ ndo akatshu lo luudu* la Jɛhɔhanana ɔna Eliyashibɛ. Kaanga mbakandatshu lɛkɔ, nde kɔɔndɛ ndooko ɛngɔ ndo kɔɔnɔ ashi, nɛ dia nde akalelaka lo woho wakashisha wanɛ wakaye oma lo lɔhɔmbɔ kɔlamelo.+

7 L’ɔkɔngɔ wa laasɔ, vɔ wakewoya lo Juda y’otondo ndo la Jɛrusalɛma dia anto tshɛ waki ntondo lo lɔhɔmbɔ nsangana la Jɛrusalɛma; 8 ndo lo ndjela yɛdikɔ y’ewandji la dikumanyi, onto tshɛ laki koondja lo etena ka nshi 3, wakahombe mbɔsa* diangɔ diande tshɛ ndo nde akahombe minyɛma oma l’etshumanelo ka wanɛ wakaye oma lo lɔhɔmbɔ.+ 9 Ɔnkɔnɛ, apami tshɛ w’ase Juda ndo w’aseka Bɛnjamina wakasangana la Jɛrusalɛma la ntondo ka nshi 3 nshila, mbuta ate lo ngɔndɔ ka divwa nshi 20. Anto tshɛ wakadjasɛ lo sɛkɛ dia luudu la Nzambi ka mɛtɛ, wadidima l’ɔtɛ wa dikambo sɔ ndo l’ɔtɛ wa mvula ka wolo.

10 Oma laasɔ, ɔlɔmbɛdi Ɛzɛra akemala ko akawatɛ ate: “Nyu nyamboshisha kɔlamelo lo ntshuka wamato w’ase wedja ekina,+ ndo lo nsala dikambo sɔ, nyu nyambofudia onongo w’Isariyɛlɛ. 11 Ɔnkɔnɛ, nyoshole kɔlɔ yanyu le Jehowa Nzambi ka watshɛnyu ndo nyosale lolango lande. Nyoyakakitole l’ase wodja ɔnɛ ndo la wadi anɛ w’oma lo wedja ekina.”+ 12 Ko etshumanelo k’otondo wakakadimola la dui dia wolo vate: “Ɔkɛndɛ aso ele wa nsala paka oko watayɛ. 13 Koko anto wekɔ efula ndo tekɔ lo eleko k’avula. Hatotokoka memala l’andja, ndo dikambo nɛ hatotɔsɛ lushi 1 kana nshi 2 tsho, nɛ dia lo dikambo nɛ, sho tambɔtɔmbɔkɔ lo yɛdikɔ y’efula. 14 Ɔnkɔnɛ lam’alangayɛ, etawɔ dia ewandji aso monga enyimpala w’etshumanelo k’otondo;+ ndo etawɔ dia wanɛ tshɛ wele lo esomba aso wakatshuke wamato w’ase wedja ekina ndjaaka lo etena kayoshikikɛma, kaamɛ la dikumanyi ndo la toshushi ta lo osomba l’osomba polo lam’ayotonya nkɛlɛ kadɔdɔ katooka Nzambi kaso lo dikambo nɛ oma le so.”

15 Koko Jɔnatana ɔna Asahɛlɛ nde la Jahazeya ɔna Tikiva wakatone dui sɔ, ko Meshulama nde la Shabɛtai+ wanɛ waki ase Lɛwi wakaasukɛ. 16 Kaanga mbakidiɔ ngasɔ, wanɛ waki ntondo lo lɔhɔmbɔ wakasale kɛnɛ kaketawɔma; ndo ɔlɔmbɛdi Ɛzɛra nde la ɛtɛ wa nkumbo ya washɛwɔ, wanɛ tshɛ wakashilama nkombo wakatokana lo shɔpɔ lo ngɔndɔ ka 10 lushi 1 dia menda dikambo sɔ; 17 ko lo ngɔndɔ ka ntondo lushi 1, vɔ wakashidiya l’apami tshɛ wakatshuke wamato w’ase wedja ekina. 18 Ko akayoshɔma dia ana w’apami amɔtshi w’ɛlɔmbɛdi anɛ wakatshuke wamato w’ase wedja ekina:+ Ana w’apami wa Jeshua+ ɔna Jɛhɔzadaka la anango: Maseya, Eliɛzɛrɛ, Jaribɛ ndo Ngedaliya. 19 Koko vɔ wakalake* dia nkɛndja wadiɛwɔ ndo lam’ele vɔ waki la onongo, vɔ wakahombe nkimɔ ɔkɔkɔ w’omi l’ɔtɛ w’onongo awɔ.+

20 L’atei w’ana w’apami wa Imɛrɛ:+ Hanani nde la Zebadiya; 21 l’atei w’ana w’apami wa Harimɛ:+ Maseya, Elidja, Shemaya, Jɛhiyɛlɛ ndo Uziya; 22 l’atei w’ana w’apami wa Pashura:+ Eliyɔɛnai, Maseya, Ishimaɛlɛ, Netanɛlɛ, Jɔzabada ndo Eleasa. 23 L’atei w’ase Lɛwi: Jɔzabada, Shimei, Kɛlaya (mbuta ate Kɛlita), Petahiya, Juda ndo Eliɛzɛrɛ; 24 l’atei w’amembi: Eliyashibɛ; ndo l’atei w’alami w’asoko: Shaluma, Tɛlɛmɛ ndo Uri.

25 Oma lo Isariyɛlɛ, l’atei w’ana w’apami wa Parɔshɛ:+ Ramiya, Iziya, Malakidja, Midjamina, Eleazara, Malakidja ndo Bɛnaya; 26 l’atei w’ana w’apami wa Elama:+ Mataniya, Zɛkariya, Jɛhiyɛlɛ,+ Abidi, Jɛrɛmɔtɛ ndo Elidja; 27 l’atei w’ana w’apami wa Zatu:+ Eliyɔɛnai, Eliyashibɛ, Mataniya, Jɛrɛmɔtɛ, Zabada ndo Aziza; 28 l’atei w’ana w’apami wa Bebai:+ Jɛhɔhanana, Hananiya, Zabai ndo Atalai; 29 l’atei w’ana w’apami wa Bani: Meshulama, Maluka, Adaya, Jashubɛ, Sheala ndo Jɛrɛmɔtɛ; 30 l’atei w’ana w’apami wa Pahata-Mɔaba:+ Adiana, Kelala, Bɛnaya, Maseya, Mataniya, Bɛzalɛlɛ, Binui ndo Manase; 31 l’atei w’ana w’apami wa Harimɛ:+ Eliɛzɛrɛ, Ishidja, Malakidja,+ Shemaya, Shimɛyɔna, 32 Bɛnjamina, Maluka ndo Shemariya; 33 l’atei w’ana w’apami wa Hashuma:+ Matɛnai, Matatahɛ, Zabada, Elifɛlɛtɛ, Jɛrɛmayi, Manase ndo Shimei; 34 l’atei w’ana w’apami wa Bani: Maadai, Amurama, Uɛlɛ, 35 Bɛnaya, Bedeya, Keluhi, 36 Vaniya, Mɛrɛmɔtɛ, Eliyashibɛ, 37 Mataniya, Matɛnai ndo Jasu; 38 l’atei w’ana w’apami wa Binui: Shimei, 39 Shelemiya, Natana, Adaya, 40 Makinadɛbai, Shashai, Sharai, 41 Azarɛlɛ, Shelemiya, Shemariya, 42 Shaluma, Amariya ndo Yɔsɛfu; 43 ndo l’atei w’ana w’apami wa Nɛbɔ: Jeyɛlɛ, Matitiya, Zabada, Zebina, Jadai, Jɔɛlɛ ndo Bɛnaya. 44 Wasɔ tshɛ wakatshuke wamato w’oma lo wedja ekina,+ ndo vɔ wakakɛndja wadiɛwɔ kaamɛ la anawɔ.+