ƆKƆNDƆ 24

Yɔsɛfu ambohemba anango

YƆSƐFU akalange mbeya ɔnɛ kana anango 10 weke paka la tokanyi t’anto wa kɔlɔ. Diɔ diakɔ diakandawatɛ ate: ‘Nyu nyekɔ atɔpi. Nyu nyakaye dia ndjenda lɛnɛ ele wɔdu a wodja aso.’

Vɔ wakate vɔate: ‘Kema, sho bu atɔpi. Sho tekɔ anto w’ɛlɔlɔ. Sho tshɛ tekɔ ana w’onto ɔtɔi. Ana 12 mbakiso. Koko ɔnangɛso ɔtɔi aya bu, ndo kosɛso ka tshɛ ekɔ la ngelo nde la shɛso.’

Yɔsɛfu akasale oko onto lahawaetawɔ. Nde akadje ɔnangɛwɔ letawɔ Simɛyɔna lo lokanu, ko nde tshika akina anɛ dia vɔ mbɔsa mbo ya ndɛ ko kalola lakawɔ. Koko nde akawatɛ ate: ‘Lam’ayonyokalola, nyu pombaka ndja la kosɛnyu ka tshɛ.’

Etena kakawakalola lakawɔ la Kanana, vɔ wakatela shɛwɔ Jakɔbɔ awui tshɛ wakâkomela. Jakɔbɔ akanyange heyama. Nde akade koko ate: ‘Yɔsɛfu kema nto, ko ndo Simɛyɔna aya bu. Dimi hatonyokimuela onami Bɛndjamina.’ Koko etena kakatatɛ shila mbo yawɔ ya ndɛ, Jakɔba akâtshike dia vɔ ntshɔ la Bɛndjamina l’Edjibito, lâsɔ kokokiwɔ tokondja mbo ya ndɛ efula.

Kakianɛ Yɔsɛfu ambɛna anango wayaye. Nde ekɔ l’ɔngɛnɔngɛnɔ efula dia mɛna kosɛnde le Bɛndjamina. Lo mɛtɛ, ndoko onto l’atei awɔ lakeye ɔnɛ, onto la woke ɔnɛ Yɔsɛfu. Kakianɛ, Yɔsɛfu ambosala dikambo dimɔtshi dia pemba anango dikumi.

Nde akalodja mpaya yawɔ tshɛ tɔɔ tɔɔ la mbo ya ndɛ. Koko, aha la vɔ mbeya, nde akadje ndo dikɔhɔ diande di’oshinga a wolo lo mpaya kaki Bɛndjamina. L’ɔkɔngɔ a vɔ tshɛ kimɛ lɔkɛndɔ, waya ndo tshalola lo mboka, Yɔsɛfu akatome ekambi ande dia mbayela. Etena kakawawande, ekambi wakate vɔate: ‘Lande na kambonyotavi dikɔhɔ dia nkumɛso na?’

Ko vɔ wakate vɔate: ‘Sho hatovi dikɔhɔ sɔ.’ ‘Naka nyu ditana le ɔmɔtshi a l’atei aso, onto ɔsɔ pombaka diakema.’

Ko ekambi wakayange lo wa mpaya tshɛ, ko wakatotana dikɔhɔ lo mpaya kaki Bɛndjamina, oko wɛnayɛ lanɛ. Ekambi wakate vɔate: ‘Nyu akina anɛ, nyu kokaka ntshɔ, koko Bɛndjamina pombaka kalola laso.’ Kakɔna kayosala anango 10 kakianɛ na?

Vɔ tshɛ wakakalola la Bɛndjamina otsha le Yɔsɛfu. Yɔsɛfu akatɛ anango ate: ‘Nyu tshɛ kokaka ntshɔ lakanyu, koko Bɛndjamina pombaka tshikala lanɛ oko fumbe.’

Ko Juda akahola ate: ‘Naka Dimi kalola lakaso aha l’ɔna, papa ayovɔ, dikambo nde mbolangaka efula. Omalɔkɔ, lam’alangayɛ, tshika ɔna atshu lakaso kele dimi tshikale lanɛ oko fumbe kayɛ.’

Yɔsɛfu akɛnyi dia anango wakakadimɔ. Vɔ waya bu anto wa kɔlɔ efula. Tênde kakianɛ kɛnɛ kayanga Yɔsɛfu sala.

Etatelu 42:​9-38; 43:​1-34; 44:​1-34.