ƆKƆNDƆ 21
Anango Yɔsɛfu wambôhetsha
ENDA dikɛnda dia pami ndo woho wende kɛtshikɛtshi tsho. Toko Yɔsɛfu. Anango wambôsondja le apami ango watatshu otsha l’Edjibito. Yɔsɛfu ayotonga fumbe lɛkɔ. Lande na akasale anango dikambo dia kɔlɔ dia ngasɔ na? Nɛ dia vɔ wakokaka Yɔsɛfu kandjema.
Shɛwɔ le Jakɔbɔ akalangaka Yɔsɛfu heyama. Nde akôsombɛ okutu w’otale wa dimɛna efula lo mɛnya ngandji kande le nde. Lam’akɛnyi nondo dikumi dia Yɔsɛfu woho akɔna wakôlangaka Jakɔbɔ, vɔ wakatatɛ mbôka kandjema ndo mbôhetsha. Koko ɔkɔkɔ okina wakikɔ wakawatɛkɔya mbôhetsha.
Yɔsɛfu akɛnyi alɔ ahende. L’alɔ akɔ ahende waki Yɔsɛfu anango wakôkusamɛka. Etena kakâsakwelaka Yɔsɛfu alɔ akɔ, anango wakadanɛka la kɛlɛ heyama.
Ko lushi lɔmɔtshi anango Yɔsɛfu wakatshu dia tolama ɛkɔkɔ wa shɛwɔ l’oswe, Jakɔbɔ mbatɛnde Yɔsɛfu dia towaenda woho wewɔ kana wekɔ la wolo. Anango kam’akawawɛnyi ayaye, amɔtshi a l’atei awɔ wakate vɔate: ‘Todiake!’ Koko Rubɛna, enondo awɔ tshɛ akate ate: ‘Kema, tonyosalake ɔsɔku!’ Lo dihole dia mbodiaka, vɔ wakande Yɔsɛfu ndo wakawodje lo difuku diaki kondjala l’ashi lɔkɔ. Ko vɔ wakadjasɛ dia shikikɛ kɛnɛ kahombawɔ sala lande.
Lo etena kakɔ apami w’Ase Ishamɛlɛ wakayayaka oma lo lɔkɛndɔ l’otale. Ko Juda akatela anango ate: ‘Nyoye tôsondja le Ase Ishamɛlɛ.’ Ko vɔ wakasale ɔsɔku. Vɔ wakasondja Yɔsɛfu l’oshinga wa tenyi dia fɛsa 20. Ande kɔlɔ lɛɛ!
Ayowototɛ shɛwɔ na? Vɔ wakadiake mbudi kɛmɔtshi ko vɔ tambiya okutu a dimɛna waki Yɔsɛfu lo dikila mbala efula. Vɔ wakatɔlɛ shɛwɔ ko vɔ mbotɛ vɔate: ‘Sho takatɔngɔnyi ɛngɔ kɛnɛ. Ohenda, ndo ohoshishima kana aha okutu wa Yɔsɛfu.’
Jakɔbɔ akawoshishima ko nde mbuta ate vɔ ɔnɛ. Nde akade koko ate: ‘Ekɔ paka nyama ka pango kakadiaki Yɔsɛfu.’ Ko aki paka ngasɔ mbakalange anango a Yɔsɛfu mbotɛ. Jakɔbɔ aki la lonyangu efula. Nde akalele nshi efula. Koko Yɔsɛfu komvɔ. Tênde kɛnɛ kakatôtombɛ lɛnɛ akandatshu.