ƆKƆNDƆ 32
Asui dikumi
OHENDA esato ɛnɛ. Osato l’osato ekɔ lo mɛnya sui dimɔtshi diakatome Jehowa l’Edjibito. L’osato wa ntondo wɛ ekɔ lo mɛna Arɔna atɛta danga diande lo Ndjale ka Nilɛ. Etena kakandasale ɔsɔku, ashi wa lo ndjale wakakadimɔ dikila. Nse yakavu ndo ndjale kakatatɛ mbupola solo.
Malasɔ, Jehowa akatondja ɛkɔlɛ oma lo Ndjale ka Nilɛ. Vɔ wakakokanɛ—l’atshuka, lo wa poke y’ahɛwɔ diangɔ, lo mbeto yalala anto—ahole tshɛ. Etena kakavu ɛkɔlɛ akɔ, Ase Edjibito wakâtshumanya wembe wembe ndo wakapolaka solo hakoke.
Ko Arɔna akakɔmɔla danga diande lo kɛtɛ, ko ditshu diakakadimɔ mɛmbɛlɛ. Yɔ yele tofumbɔfumbɔ ta totshitshɛ talumatana. Mɛmbɛlɛ yaki sui dia sato lo kɛtɛ y’Edjibito.
Asui akina wotshikadi wakasoyaka paka Ase Edjibito ato aha Ase Isariyɛlɛ. Sui dia nɛi diaki: tshingo ya weke yakalolanɛ lo mvudu tshɛ y’Ase Edjibito. Sui dia tanu diaki le wa nyama. Ponda efula ndo ɛkɔkɔ la dongalonga diaki Ase Edjibito diakavu.
Malasɔ, Mɔsɛ nde l’Arɔna wakɔsɛ yema ya ditshu ko vɔ fumbola l’olongo. Diɔ diakatondja anto la wa nyama atshutshu wa weke weke. Ɔsɔ aki sui dia samalo.
L’ɔkɔngɔ a Mɔsɛ memɛ lonya lande l’olongo, Jehowa akatome ndjadi ndo mbɔkɔ. Aki mvula ka mbɔkɔ kakaleke woke kahatalɔka lakatɔngɔ Edjibito.
Sui di’enanɛi diaki lemba l’ɛndjɔ. Ɛndjɔ wa ngasɔ watɛnamaka ndoko lushi. Vɔ wakale oseka ema tshɛ kaki konanyema la mbɔkɔ.
Sui dia divua diaki wodjima. Nshi shato y’etondo, wodjima wa tshududu wakakombe kɛtɛ, koko lɛnɛ akadjasɛ Ase Isariyɛlɛ osase wakikɔ.
L’ɔkɔngɔ diko, Nzambi akatɛ anto ande dia vɔ kita dikila di’ɔna mbudi kana di’ɔn’ɔkɔkɔ lo katruma ya kuke ya lo mvudu yawɔ. Ko ondjelo wa Nzambi akakindola l’Edjibito w’otondo. Ondjelo kondjakaka ndoko onto lo luudu tshɛ lakandɛnyi dikila. Koko lo mvudu tshɛ yaki kondjala la dikila lo katruma, ondjelo a Nzambi akadiake ana wa nondo w’anto ndo wa nyama. Ɔsɔ aki sui dia dikumi.
L’ɔkɔngɔ wa sui sɔ dia komelo, Farawɔ akatɛ Ase Isariyɛlɛ dia vɔ monɛ. Wodja wa Nzambi wakayalɔngɔsɔla woho wa vɔ ntshɔ, ko l’otsho akɔ wakatombe oma l’Edjibito.